Mak 9

1Kơnràñ tơs î ƀòn gô lah: “Iyŏ ngăn, ăñ tơs î oh mi rôh lŏ lah tom du pơnah cro ndăng ñă nơ̆m dô la tơmpôl cro iyŏ ngăn la ơ̆ mơ̆t nơ̆m jơno sơ̆t lai jơ ƀòn gô lăng tơmpơl lơgơ Yang Tơm Trồ dê trôh î gơnăp-gơnoăr.” 2Pro nge ma-ngkơi, Yang Jesu iyà Pier, Jakơ gư̆m Jăng sŏng gư̆n bơlăm dêh nư̆ng ƀòn gô swà hao nơ̆m du-lăm yồ yơng, gừn Kơnràñ sơlơ̆ să sơđàp măt ƀòn gô. 3Ao Kơnràñ sơlôh jîng ang tơcrà phadêh ngăn, bẵu phăk, tien gơs ơ̆ cro jăk pîh găy nơ̆m dunya dô digơlăn lơh bẵu dî gư̆ptî gư̆n. 4Êli băl î Môise dî ƀòn gô lăng tơmpơl, gư̆m bea hê ông gư̆n ndăng răk-sa î Yang Jesu. 5Tơm tô̆ pẵư dẵư, Pier tơs î Yang Jesu lah: “Raƀi, niem ngăn ma ƀòn mơ̆n ăm nơ̆m dô, ƀòn hî digơlăn tơngñă păy-lăm kơjang, du-lăm ma Kơnràñ, du-lăm ma Môise gư̆m du-lăm ma Êli.” 6(Bơh ông ơ̆ gư̆t ông păl pẵư dẵư tơs jơno găy, tài bơh ƀòn gô kơ̆mbrit-kơ̆mbròt ngăn.) 7Sŏng gư̆n du khô̆k tô̆ hoa trôh tơmbàk ƀòn gô, gư̆m jơno tơs tơlôh bơh nơ̆m khô̆k tô̆ lah: “Dô la Kon kơñ-kơloh Ăñ dê. Iet cĕ jơno Kon gư̆n.” 8Khơñ ngăn, tơm tô̆ lăng tĕdơ, ƀòn gô ơ̆ hôm tơmpơl du hôi cro găy nde ăm î mơ̆n, nư̆ng du hôi Yang Jesu gời.

9Tơm tô̆ ƀòn gô swà bơh cŭng-yồ jư, Kơnràñ ƀăn ƀòn gô lah bư̆ng tơs wăl î cro găy bơh lơ̆gay jơno ƀòn gô tơmpơl, dilah hôm dahrăư trôh tô̆ tơnge Kon-Mơnùs bơh anẵu sơ̆t jîng wăl. 10Ƀòn gô prăp ndăp jơno gư̆n nơ̆m nhòng tĕdơ ƀòn gô, tơmbơyê î găp lăng “bơh anẵu sơ̆t jîng wăl” la mơmơh. 11Ƀòn gô ƀoah lùp î Kơnràñ, tơs lah: “Ngglơh lơ̆gay cro bơtău jơno-bơlăm tơs la Êli păl trôh lai?” 12Sŏng gư̆n Kơnràñ tơs î ƀòn gô lah: “Ngăn la Êli trôh lai lơi mhơ̆ tơngñă wăl lơ̆gay bră. Tîrơ̆ gừn jơno dî cêh bơh Kon-Mơnùs lah Kơnràñ păl kŏng khăi jơno sơòs-sơngeh gư̆m kŏng lăng ơ̆săp-ơ̆său la mơmơh? 13Mơya, ăñ tơs î oh mi lah Êli sŏng trôh ngăn lờt, gừn cro sŏng lơh gư̆t nhẵư jơno ƀòn gô kơñ î ông, jăt gư̆ptî jơno dî cêh bơh ông.”

14Tơm tô̆ trôh nơ̆m anẵu lơ̆gay cro bơtê hôm wăl, ƀòn gô tơmpơl du tơmpôl lang bol khăi ngăn ăm tĕdơ ƀòn gô gư̆m lơ̆gay cro bơtău jơno-bơlăm ndăng tơmbơkai î lơ̆gay cro bơtê gư̆n. 15Jơ gư̆n, tơm tô̆ tơmpơl Kơnràñ, tơmpôl lang bol ndrăt-ndròt, gừn ma-ngkơi jơ cơplŏk trôh băl î Kơnràñ, ƀòn gô lùp còp-să Kơnràñ. 16Kơnràñ lùp lơ̆gay cro bơtê lah: “Oh mi ndăng tơmbơkai î ƀòn gô bơh bră găy?” 17Du hôi cro nơ̆m tơmpôl lang bol kla dẵư Kơnràñ lah: “Ơ cro bơtău, ăñ iyà trôh ma cro bơtău du hôi kon klo ăñ dê, kŏng du hôi hwîng cà kơmblău lơh. 18Gừn dilah kơp dơ̆ găy gô digơlăn lơh kon ăñ, gừn gô kơ̆p sơmprah kon êt nteàh, sŏng gư̆n kon êt kơmbôh dà dreo, tơget sề, î kơdăng să, Ăñ sŏng dăn lơ̆gay cro bơtê cro bơtău lơi ƀòn gô tơmprơh cà, mà ƀòn gô ơ̆ tăl pran.” 19Jơ gư̆n, tơm tô̆ kla wăl dẵư ƀòn gô, Kơnràñ tơs lah: “Ơ jơi bơtien ơ̆ don tò, ăñ rơp ăm î ƀòn mê trôh dî jơ găy? Ăñ rơp kŏng ăt-ăl ƀòn mê trôh dî jơ găy? Iyà cĕ kon êt trôh ma ăñ.” 20Ƀòn gô iyà kon êt trôh ma Kơnràñ, gừn tơm tô̆ tơmpơl Kơnràñ, hwîng cà khơñ ngăn lơh kon êt rôt-cơdoh, gừn tơm tô̆ blă nơ̆m ù, kon êt cơdoh-cơđlang, kơmbôh dà dreo. 21Kơnràñ lùp bàp kon êt dê lah: “Nhẵư dơ̆ bră tîdô tom tơlôh î kon êt lờt?” Ông kla dẵư lah: “Bơh jơ hôm êt. 22Gô kư̆ mbư̆ng miek kon êt, dơ̆ gừn mơ̆t nơ̆m oềs, dơ̆ gừn jư nơ̆m dà, lơi tơngroh kon êt, mơya dilah cro bơtău digơlăn lơh dî jơno găy, bơh nùs kơñ-kơloh ƀòn hî, dăn cro bơtău dŏng ƀòn hî.” 23Jơ gư̆n, Yang Jesu tơs î gô lah: “‘Dilah ăñ digơlăn’? Lơ̆gay bră la digơlăn î cro don.” 24Ƀăt jơ gư̆n, ma-ngkơi jơ dreo dơng, bàp kon êt tơs lah: “Ăñ don! Dăn cro bơtău dŏng-kơl bơh jơno ơ̆ don ăñ dê!” 25Sŏng gư̆n tơm tô̆ tơmpơl tơmpôl lang bol ndăng cơplŏk trôh anẵu ƀòn gô, Yang Jesu ƀoah-đas hwîng cà, pơđơ ma cà lah: “Ơ hwîng cà kơmblău î tê̆-tua năy, ăñ e gơnoăr pơđơ ma mê păl tơlôh bơh kon êt gư̆m ơ̆ dơ̆ găy mơ̆t ñăp nơ̆m gô te.” 26Ma-ngkơi jơ sŏng dreo kơkrẵy dơng î lơh ma kon êt rôt-cơdoh kơdăng, cà tơlôh makin gừn kon êt gôjîng gư̆ptî cro sơ̆t, tien gơs khăi cro tơs lah: “Kon êt sơ̆t lờt.” 27Mơya tơm tô̆ dưñ kơ̆p tê kon êt, Yang Jesu tề gô lôh, gừn kon êt ñă atẵy. 28Ma-ngkơi jơ Kơnràñ sŏng swà mơ̆t nơ̆m hîh lờt, lơ̆gay cro bơtê Kơnràñ lùp dêh Kơnràñ lah: “Ngglơh ƀòn hî ơ̆ tơmprơh dî hwîng cà gư̆n?” 29Kơnràñ kla dẵư î ƀòn gô lah: “Tơmpôl cà dô, Ơ̆ cro găy digơlăn tơmprơh dî dilah ơ̆ bơh î hôi-dăn gư̆m ăt sa.”

30Gừn bơh nơ̆m anẵu gư̆n tơlôh swà, ƀòn gô swà găn ƀòn Galile, mà Kơnràñ ơ̆ kơñ e cro găy gư̆t, 31bơh Kơnràñ ndăng ƀăn mơntău lơ̆gay cro bơtê Kơnràñ, gư̆m tơs băl î ƀòn gô lah: “Kon-Mơnùs mơñ kŏng phi jao nơ̆m tê cro, ƀòn gô rơp tơngsơ̆t Kơnràñ, tơm tô̆ sŏng kŏng tơngsơ̆t, Kơnràñ rơp jîng wăl nơ̆m păy nge ma-ngkơi.” 32Mơya ƀòn gô ơ̆ wơng jơno dô, î kơ̆mbrit ơ̆ khơ̆n lùp Kơnràñ.

33Ƀòn gô swà trôh nơ̆m ƀòn dơng Kapenaum, gừn tơm tô̆ mơ̆t sŏng nơ̆m hîh, Kơnràñ lùp ƀòn gô lah: “Oh mi ờs tơmbơyê bră găy nơ̆m swà gung?” 34Mơya ƀòn gô ăm-ƀơt, bơh ƀòn gô sŏng tơmbơkai î găp nơ̆m gung swà lăng cro găy la dơng ñư̆k. 35Gừn ma-ngkơi jơ sŏng nggui nteàh, Kơnràñ hôi jư̆t-bea hê cro bơtê jơnư̆m wăl gư̆m tơs î ƀòn gô lah: “Dilah cro găy kơñ lơh găl, cro rơ̆ păl lơh cro dơ̆t-lŭi nơ̆m lơ̆gay cro î la cro dŏng bră ma lơ̆gay cro.” 36Săc-rwơh du hôi kon êt, Kơnràñ ăn kon êt ăm nhòng ƀòn gô, sŏng gư̆n ma-ngkơi jơ pồ kon êt nơ̆m tê, Kơnràñ tơs î ƀòn gô lah: 37“Cro găy e sơnăn ăñ wă-rẵu du hôi nơ̆m lơ̆gay kon êt gư̆ptî dô gừn cro rơ̆ wă-rẵu ăñ, gư̆m dilah cro găy wă-rẵu ăñ gừn cro rơ̆ ơ̆ dî nư̆ng wă-rẵu ăñ, mà gư̆m wă-rẵu Bơtao pơđơ ăñ trôh.” 38Jăng tơs î Kơnràñ lah: “Ơ cro bơtău, ƀòn hî sŏng tơmpơl du hôi cro năy e sơnăn cro bơtău tơmprơh cà gừn ƀòn hî sŏng khă cro gư̆n wăl, tài bơh cro gư̆n ơ̆ jăt ƀòn mơ̆n.” 39Mơya Yang Jesu kla dẵư lah: “Bư̆ng khă cro gư̆n, bơh ơ̆ tom cro găy la cro e sơnăn ăñ lơh gơnoăr phadêh sŏng gư̆n digơlăn ma-ngkơi gư̆n sràt-rma ăñ. 40Bơh cro găy ơ̆ tơmdră î ƀòn mơ̆n rơ̆ la jơno du nùs băl î ƀòn mơ̆n. 41Tài bơh cro găy e sơnăn ăñ dờp ma oh mi du cơdŏ dà bơh oh mi gôtrê mađah Yang Dŏng-Klàs, iyŏ ngăn ăñ tơs î oh mi lah cro gư̆n nên-nôn ngăn la ơ̆ roh phăn-ƀan gô. 42Hôm cro găy lơh sơmăm tìs ma du hôi nơ̆m lơ̆gay kơmom êt dô la lơ̆gay cro don kơnơm anẵu ăñ, gừn niem rlo ma cro gư̆n la gô kŏng kăt du mpăl lô̆ dơng sî ngkău gô sŏng gư̆n mbư̆ng nơ̆m dàlîng. 43Dilah kơ̆mpang tê oh mi digơlăn lơh ma oh mi sơmăm tìs, păl koh gô cĕ. Jơno niem rlo ma oh mi la kŏng sồt-rmañ mà dî mơ̆t nơ̆m anẵu jơno jîng, niem rlo la dî bea ƀĕ kơ̆mpang tê mà swà mơ̆t nơ̆m brŏng-oềs, oềs ơ̆ dơ̆ găy sơ̆t 44(anẵu tuh rhai ƀòn gô ơ̆ sơ̆t, î oềs ơ̆ tơngsơ̆t dî). 45Dilah kơ̆mpang jư̆ng oh mi digơlăn lơh ma oh mi sơmăm tìs, păl koh gô cĕ. Jơno niem rlo ma oh mi la î jư̆ng kut mà dî mơ̆t nơ̆m anẵu jơno jîng, niem rlo la dî bea ƀĕ jư̆ng mà kŏng mbư̆ng nơ̆m brŏng-oềs 46(anẵu tuh rhai ƀòn gô ơ̆ sơ̆t, î oềs ơ̆ tơngsơ̆t dî). 47Dilah măt oh mi lơh ma oh mi sơmăm tìs, kơkwè cĕ gô makin. Jơno niem rlo ma oh mi la bơh î du đah măt mà dî mơ̆t nơ̆m lơgơ Yang Tơm Trồ, niem rlo la dî bea đah măt mà kŏng mbư̆ng nơ̆m brŏng-oềs, 48anẵu tuh rhai ƀòn gô ơ̆ sơ̆t î oềs ơ̆ tơngsơ̆t dî. 49Bơh lơ̆gay cro rơp kŏng boh bơh î oềs. 50Boh la jơno niem, mơya dilah boh gôjîng ha-ău ăng, oh mi rơp cĕ gô bơh jơno cĕ găy? Oh mi păl dî boh nơ̆m să, gư̆m jîng du nùs băl î găp.”