Mak 10

1Ma-ngkơi jơ ñă atẵy, Kơnràñ swà bơh nơ̆m anẵu gư̆n trôh nơ̆m ƀòn Juđe î nơ̆m ƀòn mađah manăy dà măy Jôđăn, sŏng gư̆n lang bol hoa găp trôh î Kơnràñ du dơ̆ te. Kơnràñ ƀăn mơntău te ƀòn gô gư̆ptî Kơnràñ ờs dơm lơh. 2Tơm tô̆ lơ̆gay cro Pharisi trôh en. Ƀòn gô lùp Kơnràñ lah Jơno bơlăm tom e gơnoăr du hôi bo-klo lơi căư bo-ua hala ơ̆, lơi lòng Kơnràñ. 3Mơya, lơi kla wăl dẵư, Kơnràñ tơs î ƀòn gô lah: “Môise sŏng ƀăn mơntău ƀòn mê jơno găy?” 4Ƀòn gô tơs lah: “Môise e gơnoăr bo-klo cêh sră tơmlơi căư găp sŏng gư̆n lơi bo-ua swà.” 5Mơya Yang Jesu tơs î ƀòn gô lah: “Tài bơh jơno kơdăng nùs ƀòn mê dê, gư̆n-jîng ông cêh tơlôh jơno bơlăm gư̆n ma ƀòn mê. 6Pơnah nde, bơh sơm sơntơm jơno bơjîng ù-teàh,

‘Kơnràñ sŏng mon bơjîng ƀòn gô, du hôi klo î du hôi ua.’

7‘Tài bơh jơno gư̆n, cro-klo rơp swà tơlôh bơh mơi î bàp mơ̆n,

8gừn bea hê rơp dî gôjîng du rlău băl.’

Gư̆n-jîng, ƀòn gô ơ̆ tom iyŏ la bea te mà la du rlău băl. 9Gư̆n-jîng, jơno găy mà Yang Tơm Trồ sŏng tơmkăt wăl lờt, gừn kon-mơnùs bư̆ng lơh tơmcơlah.” 10Tơm tô̆ ăm nơ̆m hîh, lơ̆gay cro bơtê lùp wăl Kơnràñ bơh bră dô. 11Kơnràñ tơs î ƀòn gô lah: “Cro găy tơmlơi căư bo-ua mơ̆n gừn tơmhòp î du hôi cro nde, gừn cro gư̆n tìs-glài ăm sơlăp-sơbêl î bo-ua. 12Gừn dilah cro-ua, tơm tô̆ sŏng tơmlơi căư bo-klo mơ̆n, bo cro nde, gừn gô tìs-glài ăm sơlăp-sơbêl.”

13Cro iyà trôh ma Kơnràñ lơ̆gay kơmom êt lơi Kơnràñ digơlăn ăn tê cŭngsî ƀòn gô, mơya lơ̆gay cro bơtê ƀoah-đas ƀòn gô. 14Mơya, tơm tô̆ lăng tơmpơl jơno tîgư̆n, Yang Jesu tơcao gư̆m tơs î ƀòn gô lah: “Lơi cĕ lơ̆gay kơmom êt trôh băl î ăñ, gừn bư̆ng cơkhă ƀòn gô, bơh lơgơ Yang Tơm Trồ dê gôtrê ma lơ̆gay cro găy gư̆ptî ƀòn gô. 15Iyŏ ngăn, ăñ tơs î oh mi, cro găy ơ̆ dưñ lăñ lơgơ Yang Tơm Trồ dê gư̆ptî du hôi kơmom êt, gừn cro rơ̆ nên-nôn ngăn ơ̆ dî mơ̆t nơ̆m gư̆n.” 16Ma-ngkơi jơ pồ lơ̆gay kơmom êt nơ̆m kơđu tê Kơnràñ, ăn tê cŭngsî ƀòn gô, Kơnràñ e lơnge.

17Tơm tô̆ Kơnràñ sơntơm swà gung, du hôi cro năy cơplŏk trôh, gừn ma-ngkơi jơ cơdơn krô̆ng sơđàp Kơnràñ, cro gư̆n lùp Kơnràñ lah: “Ơ Cro Bơtău Lơbăn-Niem, ăñ păl lơh amơh lơi digơlăn dưñ-lăñ jơno jîng miek miek?” 18Mơya Yang Jesu tơs î gô lah: “Ngglơh mê hôi ăñ la lơbăn-niem? Ơ̆ cro găy lơbăn-niem sî nư̆ng du hôi Yang Tơm Trồ. 19Mê gư̆t sŏng lơ̆gay jơno-bơlăm: ‘Bư̆ng tơngsơ̆t cro, bư̆ng ăm sơlăp-sơbêl, bư̆ng kơntô̆ng-kơño, bư̆ng lơh cư̆ng-blăc, bư̆ng blăc-pơlum, păl don kingam mơi bàp mơ̆n.’” 20Mơya gô tơs î Kơnràñ lah: “Ơ cro bơtău, ăñ sŏng prăp jư lơ̆gay jơno gư̆n bơh tơm jơ ăñ hôm êt.” 21Mơya tơm tô̆ lăng ma gô, Yang Jesu kơñ-kơloh gô, gừn Kơnràñ tơs î gô lah: “Mê hôm prŏi du jơno; swà cĕ, brău lơ̆ lơ̆gay jơno găy mê dî, tơmpà ma cro kơsòt, gừn mê rơp dî phăn-ƀan dơng mang cŭngsî trồ, gừn trôh madô hă, swà jăt cĕ ăñ.” 22Mơya môh măt gôjîng moat-jrum bơh jơno gư̆n, gô jê-kơkua ngglăm nùs swà pleh, bơh gô ndăng dî khăi ngăn jini-jơno.

23Ma-ngkơi jơ lăng tĕdơ, Yang Jesu tơs î cro bơtê lah: “kălkê gư̆t nhẵư ma lơ̆gay cro dî khăi jini-jơno lơi mơ̆t dî nơ̆m lơgơ Yang Tơm Trồ dê!” 24Lơ̆gay cro bơtê ndrăt-ndròt ngăn bơh lơ̆gay jơno Kơnràñ tơs. Mơya du dơ̆ te, tơm tô̆ kla dẵư, Yang Jesu tơs î ƀòn gô lah: “Ơ ƀòn kon, ngăn la kălkê gư̆t nhẵư lơi mơ̆t nơ̆m lơgơ Yang Tơm Trồ! 25Gôtrê bơh Lakđa trŏ mơ̆t tî trôm jrư̆m, gư̆n la bră ƀòn rlo ma cro kơnhơ̆p mơ̆t nơ̆m lơgơ Yang Tơm Trồ dê.” 26Sŏng gư̆n ƀòn gô ndrăt-ndròt ngăn, tơs î Kơnràñ lah: “Tîgư̆n mơ̆t cro digơlăn dŏng klàs?” 27Lăng ma ƀòn gô, Yang Jesu tơs lah: “Jơno lơh ơ̆ dî î kon-mơnùs, mơya ơ̆-iyŏ î Yang Tơm Trồ. Tài bơh î Yang Tơm Trồ, lơ̆gay bră digơlăn.” 28Pier pẵư dẵư tơs î Kơnràñ lah: “Kơnràñ lăng dô, ƀòn hî sŏng lơi căư lơ̆gay jơno mà swà jăt Kơnràñ.” 29Yang Jesu kla dẵư lah: “Iyŏ ngăn, ăñ tơs î oh mi, ơ̆ tom cro găy lơi căư hîh tơ̆m, oh mi, rôh lŏ, mơi bàp, kon so, ù-teàh tài bơh ăñ î Jơno Niem, 30mà ơ̆ dưñ lăñ dî rlo ma du-rhieng dơ̆ jơ dô nơ̆m rai dô: gôtrê bơh hîh tơ̆m, oh mi, rôh lŏ, mơi, kon, srăy-brê băl î jơno kơ̆p-cơkhă, î jơno jîng miek miek nơ̆m rai ma-ngkơi dô trôh, 31Mơya khăi cro mađàp rơp gôjîng dơ̆t-lŭi, gừn cro dơ̆t-lŭi rơp gôjîng mađàp.”

32Jơ gư̆n, ƀòn gô ndăng nơ̆m nggùl gung swà trôh lêh nơ̆m Jerusalem, gừn Yang Jesu ndăng swà lai ƀòn gô. Ƀòn gô ndrăt-ndròt, hôm lơ̆gay cro swà jăt ma-ngkơi gừn kơ̆mbrit kơ̆mbròt. Ma-ngkơi jơ bơlăm jư̆t-bea hê cro bơtê ăm dêh, Kơnràñ sơntơm tơs î ƀòn gô bơh lơ̆gay bră mơñ tơngtrôh ma Kơnràñ, 33lah: “Lăng dô, ƀòn mơ̆n ndăng swà trôh nơ̆m Jerusalem, gừn Kon-Mơnùs rơp kŏng phi jao ma lơ̆gay cro gơnoăr ăn jơno duh-khoai î lơ̆gay cro gơnoăr cêh, sŏng gư̆n ƀòn gô rơp tơng-añ glài tơngsơ̆t Kơnràñ gừn jao Kơnràñ ma lang bol bơdih. 34Ƀòn gô rơp tơngyŏ-tơnghiel Kơnràñ, soh Kơnràñ, pơng lơh Kơnràñ, gư̆m tơngsơ̆t sơ̆t Kơnràñ, mơya păy nge ma-ngkơi Kơnràñ rơp jîng wăl.”

35Jakơ î Jăng, bea hê kon klo Seƀeđe dê, trôh tơmtom Kơnràñ, tơs î Kơnràñ lah: “Ơ cro bơtău, ƀòn hî kơp kơñ lah dilah jơno găy ƀòn hî răc-dăn î cro bơtău, cro bơtău rơp lơh ma ƀòn hî.” 36Sŏng gư̆n Kơnràñ tơs î ƀòn gô lah: “Oh mi kơñ ăñ lơh jơno găy ma oh mi?” 37Bơh gư̆n ƀòn gô tơs î Kơnràñ lah: “Dăn ăn lơi ƀòn hî amơh lơh ƀòn hî digơlăn nggui nơ̆m anẵu gơklŏ cro bơtău, du hôi mađah ma cro bơtău gừn du hôi mađah eo cro bơtău.” 38Mơya Yang Jesu tơs î ƀòn gô: “Oh mi ơ̆ gư̆t sătan mơ̆n ndăng dăn jơno găy. Oh mi digơlăn ñô wan mà ăñ ñô, hala kŏng lơh ƀaptem gư̆ptî gơnoăr ƀaptem mà ăñ kŏng ya?” 39Ƀòn gô tơs î Kơnràñ lah: “Ƀòn hî digơlăn.” Sŏng gư̆n Yang Jesu tơs î ƀòn gô lah: “Wan mà ăñ ñô, Oh mi rơp ñô, î gơnoăr ƀaptem mà ăñ kŏng lơh, oh mi rơp kŏng lơh. 40Mơya lơi nggui mađah ma hala mađah eo ăñ dê gừn ơ̆-iyŏ bơh ăñ rcăng rơndăp, mơya ăn lơi ma cro dî rcăng lai.” 41Tơm tô̆ kơnău bră dô, jư̆t-bea hê cro bơtê năy tơcao nùs î Jakơ î Jăng. 42Ma-ngkơi jơ hôi ƀòn gô trôh, Yang Jesu tơs î ƀòn gô lah: “Oh mi gư̆t lah lơ̆gay cro dî pồ tơngñă ăt-bồ lơ̆gay lang bol bơdih gừn rôn-bơklơ̆n lang bol, gừn lơ̆gay cro dî gơnoăr bră dơng ƀòn gô gừn ngui gơnoăr-pran lơh rôn-bơklơ̆n cro nde. 43Mơya jơno bră ơ̆-iyŏ gư̆p tîgư̆n nơ̆m nhòng oh mi. Tơblơ̆ wăl, cro găy kơñ gôjîng dơng nơ̆m nhòng oh mi rơp păl lơh cro dŏng bră ma oh mi, 44gừn cro găy kơñ lơh cro bơlăm-găl nơ̆m nhòng oh mi rơp păl lơh cro dê̆ ma lơ̆gay cro. 45Bơh Kon-Mơnùs tien gơs ơ̆ trôh lơi dî dŏng bră, mơya la lơi dŏng bră î kŏng sơ̆t să-jăn mơ̆n lơh jơno tơwai măư ma khăi cro.”

46Ƀòn gô swà mơ̆t nơ̆m ƀòn dơng Jerikô, gừn nơ̆m jơ Kơnràñ ndăng tơlôh swà bơh nơ̆m Jerikô băl î lơ̆gay cro bơtê Kơnràñ gư̆m tơmpôl lang bol khăi, gừn Ƀatime, kon klo Time dê, la du hôi cro ñô̆ng măt dăn sa ndăng nggui tikîng gung. 47Tơm tô̆ kơnău gư̆t lah gư̆n la Yang Jesu cro Nasaret, gô sơntơm dreo dơng î tơs lah: “Ơ Jesu, Kon bơtao Dabit, dăn kơñ-kơloh ăñ!” 48Khăi cro ƀoah-đas amî dô lơi gô ăm-ƀơt. Mơya gô kư̆ dreo dơng rlo ma rơ̆ lah: “Kon bơtao Dabit, dăn kơñ-kơloh ăñ!” 49Ma-ngkơi jơ ăm ñă wăl, Yang Jesu tơs lah: “Hôi cĕ amî gư̆n.” Sŏng gư̆n ƀòn gô hôi cro ñô̆ng măt gư̆n, tơs î gô lah: “Ơ-iyơ̆h ơ̆! Ñă cĕ atẵy! Cro bơtău ndăng hôi mê.” 50Sŏng gư̆n tơm tô̆ mbư̆ng ao rơnjai gô ăm du đah, ñă atẵy, gô trôh băl ma Yang Jesu. 51Lơi kla dẵư î gô, Yang Jesu tơs lah: “Mê kơñ ăñ lơh jơno găy ma mê?” Bơh gư̆n cro ñô̆ng măt kla dẵư î Kơnràñ lah: “Raƀi, rơ̆ la ăñ kơñ digơlăn lăng tơmpơl.” 52Bơh gư̆n Yang Jesu tơs î gô lah: “Swà cĕ. Jơno don mê dê sŏng sămƀeah ma mê.” Khơñ ngăn, gô dî lăng tơmpơl sŏng gư̆n gô swà jăt Kơnràñ nơ̆m gung.