Mak 2

1Tơm jơ trê wăl nơ̆m ƀòn dơng Kapenaum nhẵư nge ma-ngkơi, lang bol kơnău la Kơnràñ ndăng ăm nơ̆m hîh. 2Gừn khăi cro sŏng tơmƀù wăl tien gơs ơ̆ hôm anẵu te, ƀăt nơ̆m anẵu mpông tơlôh mơ̆t kŭng ơ̆, hôm Kơnràñ bơtău jơno Yang ma ƀòn gô. 3Du pơnah cro trôh băl ma Kơnràñ, iyà jăt du hôi cro kwềt-kơte, dî tung bơh puôn hê cro. 4Bơh ơ̆ trôh en dî Kơnràñ tài bơh lang bol, ƀòn gô kơđẵư tơkang hîh lăp anẵu Kơnràñ ăm, gừn ma-ngkơi jơ sŏng kơđẵư dî jơno hwơng, ƀòn gô tơngduh cơnờng nteàh mà cro kwềt-kơte ndăng bĭc. 5Tơm jơ tơmpơl jơno don ƀòn gô dê, Yang Jesu tơs î cro kwềt-kơte lah: “Ơ kon, tồi-glài kon dî hồ lờt!” 6Mơya nhẵư hê cro bơtău jơno bơlăm ndăng nggui nơ̆m gư̆n bơyê ngglăm nùs ƀòn gô lah: 7“Ngglơh cro dô tơs î tîgư̆n? Gô sơmăm tìs î Yang ngăn! Cro găy dî gơnoăr hồ glài sî nư̆ng du hôi Yang Tơm Trồ?” 8Ƀăt jơ gư̆n, bơh Yang Jesu sŏng gư̆t nơ̆m hwîng-nùs mơ̆n lah ƀòn gô ndăng kơlôi dêh ngglăm nùs tîgư̆n. Kơnràñ tơs î ƀòn gô lah: “Ngglơh ƀòn mê kơlôi lơ̆gay jơno gư̆n ngglăm nùs? 9Jơno găy la ƀoan rlo lơi tơs î cro kwềt-kơte, ‘Tồi-glài mê sŏng dî hồ!’ hala tơs ‘Ñă cĕ atẵy, kơđu cơnờng mê cŭngsî gừn lơbà swà!’? 10Mơya lơi lơ̆gay ƀòn mê gư̆t lah Kon-Mơnùs nơ̆m ù dô dî gơnoăr hồ glài”, Kơnràñ tơs î cro kwềt-kơte lah: 11“Ăñ pơđơ mê ñă cĕ atẵy, kơđu cơnờng mê cŭngsî, gừn swà trê nơ̆m hîh mơ̆n.” 12Tîrơ̆ la ma-ngkơi jơ ñă atẵy gừn khơñ ngăn kơđu cơnờng cŭngsî, gô tơlôh swà sơđàp măt lơ̆gay cro, tien gơs cro găy kŭng ndrăt-ndròt gư̆m jong-rơ Yang Tơm Trồ, tơs lah: “Ƀòn mơ̆n hôm dahrăư tơmpơl bră gư̆p tîgư̆n.”

13Kơnràñ tơlôh swà te tî mằ dàlîng, gừn du lang bol trôh băl ma Kơnràñ, sŏng gư̆n Kơnràñ ƀăn mơntău ƀòn gô. 14Tơm jơ ndăng swà găn, Kơnràñ tơmpơl Lebi, kon klo Alphe dê, ndăng nggui nơ̆m anẵu rê̆ dia, gừn Kơnràñ tơs î gô “Jăt cĕ ăñ!” Ma-ngkơi jơ ñă atẵy, gô jăt Kơnràñ.

15Bră tơmtom nơ̆m jơ Kơnràñ ndăng nggui sa nơ̆m hîh gô, khăi cro rê̆ dia kŭng gư̆ptî cro glài nggui sa băl î Yang Jesu gư̆m lơ̆gay cro bơtê Kơnràñ, bơh khăi cro kŭng sŏng jăt Kơnràñ. 16Tơm tô̆ lơ̆gay cro bơtău jơno-bơlăm mađah tơmpôl Pharisi tơmpơl lah Kơnràñ nggui sa băl î lơ̆gay cro glài gư̆m tơmpôl cro rê̆ dia, ƀòn gô tơs î lơ̆gay cro bơtê Kơnràñ lah: “Ngglơh ông gư̆n sa băl î tơmpôl rê̆ dia î cro glài?”

17Ma-ngkơi jơ kơnău jơno gư̆n, Yang Jesu tơs î ƀòn gô: “Cro pran-kơdăng ơ̆ tom kă tơmtom bơh cro gơnoăr sơnăm, mơya la cro kŏng kòp jê. Ăñ ơ̆ trôh lơi hôi jà cro tơpăt-durư̆ng, mà la hôi cro glài.”

18Hôm lơ̆gay cro bơtê Jăng dê gư̆m cro Pharisi ndăng ăt sa, ƀòn gô kŭng trôh î lùp Kơnràñ lah: “Tài bơh jơno găy mà cro bơtê Jăng dê gư̆m cro bơtê cro Pharisi dê ăt sa, mơya cro bơtê Kơnràñ dê ơ̆ ăt sa?”

19Yang Jesu tơs î ƀòn gô lah: “Cro năc nggui sa tơmhòp ơ̆ digơlăn ăt sa nơ̆m jơ bơtô klo hôm ăm î ƀòn gô, iyŏ ơ̆? Dilah nhẵư jŏ ƀòn gô tom bơtô klo ăm î mơ̆n, gừn ƀòn gô ơ̆ digơlăn ăt sa dî. 20Mơya lơ̆gay nge rơp trôh, la dơ̆ mà bơtô klo sŏng dî iyà swà bơh ƀòn gô, gừn jơ rơ̆, ƀòn gô rơp ăt sa nơ̆m lơ̆gay nge gư̆n. 21Ơ̆ cro găy tơmbôl du blieng bơtơi mhăy nơ̆m ao yo, mơya dilah tom cro găy lơh tîgư̆n, gừn lơh ơ̆ tĕ anẵu blieng tơmbôl dui nơ̆m anẵu ao, anẵu bơtơi mhăy î bơtơi yo, sŏng gư̆n anẵu tĕ tơmpơl ƀiƀà rlo ma rơ̆. 22Ơ̆ cro găy ăn alăk mhăy nơ̆m lîng kato yo, mơya Dilah tom cro găy lơh tîgư̆n, gừn alăk rơp lơh tơhà bơcah lîng kato, sŏng gư̆n băl alăk î lîng kato kŏng roh băl, ala bơh gư̆n, alăk mhăy ăm nơ̆m lîng kato mhăy.”

23Bră tơmtom nơ̆m nge Saƀat, tơm tô̆ Yang Jesu swà găn nhẵư anẵu srăy kôi, lơ̆gay cro bơtê Kơnràñ sơntơm katĕ lơngkòt kôi-mi nơ̆m jơ swà gung. 24Cro Pharisi tơs î Kơnràñ lah: “Lăng năy, ngglơh ƀòn gô lơh jơno ơ̆ dî păl nơ̆m nge Saƀat?” 25Kơnràñ tơs î ƀòn gô lah: “Ƀòn mê hôm dahrăư sên sră bră Dabit — bơtao î lơ̆gay cro swà băl î gô — sŏng lơh tơm jơ bơtao kơñ sa î jơgloh ơ̆h? 26Tîgay mà gô sŏng swà mơ̆t hîh Yang Tơm Trồ nơ̆m rai Abiatha cro gơnoăr dơng ăn jơno duh-khoai, gư̆m sa ƀăñ duh-khoai, la ƀăñ ơ̆ dî gơnoăr sa, sî nư̆ng kơp cro gơnoăr ăn jơno duh-khoai, gừn gô kŭng tơmpà ma lơ̆gay cro ndăng ăm băl î gô?”

27Kơnràñ tơs î ƀòn gô lah: “Nge Saƀat dî pồ tơngñă tài bơh kon-mơnùs, ơ̆-iyŏ kon-mơnùs tài bơh nge Saƀat. 28Gư̆n-jîng, Kon-Mơnùs la Yang, ƀăt băl nge Saƀat dê.”