Galati 3

1Ơ, lơ̆gay cro Galati wì-lơngôh! Mơ̆t cro sŏng juh-bơklah oh mi rôh lŏ, tơm tô̆ mà sơđàp măt oh mi rôh lŏ, Yang Dŏng-klàs Jesu kŏng pư̆ng điñ cŭng sî pư̆ng sŏng dî tơs sơđah dubă nê̆-năn. 2Ăñ nư̆ng kơñ jôi swì jơno dô bơh oh mi rôh lŏ lah: Oh mi rôh lŏ sŏng dưñ-lăñ dî Yang Hwîng kơnơm bơh bră lơh-jăt jơno-bơlăm hala bơh jơno kơnău jăt nơ̆m jơno don? 3Oh mi rôh lŏ wì-lơngôh tîgư̆n ya? Tơm tô̆ sŏng sơntơm bơh î Yang Hwîng Goh, tom iyŏ jơ dô oh mi rôh lŏ ndăng lơh tơngsŏng bơh î poăc-să? 4Tom iyŏ oh mi rôh lŏ sŏng kŏng gư̆t nhẵư jơno gleh-glăr lơi ơ̆ dî kwơ găy? — Dilah ngăn tîrơ̆ gừn iyŏ ngăn la ơ̆ kwơ! 5Tîgư̆n, Bơtao e Yang Hwîng ma oh mi rôh lŏ gư̆m lơh lơ̆gay bră gơnăp-gơnoăr nhòng tĕdơ oh mi rôh lŏ, rơ̆ la bơh bră lơh-jăt jơno-bơlăm, hala bơh jơno kơnău jăt nơ̆m jơno don? 6Gư̆ptî Abraham “don kơnơm Yang Tơm Trồ gừn rơ̆ la jơno lơi ông dî sơnăn la tơpăt-durư̆ng,” 7Gư̆n-jîng păl wơng gư̆t lah tơmpôl găy dî jơno don, rơ̆ la kon so Abraham dê. 8Mơya tơm tô̆ tơmpơl lai lah Yang Tơm Trồ sơnăn cro lang bol bơdih la tơpăt-durư̆ng kơnơm bơh jơno don, gừn Sră-Goh sŏng tơs bơtău Jơno Niem lai ma Abraham lah: “Kơp lang bol rơp dî lơnge bơh anẵu kon.” 9Gư̆n-jîng, cro găy dî jơno don gừn dî lơnge băl î Abraham, cro dî jơno don. 10Gư̆t nhẵư hê cro kơnơm nơ̆m bră lơh-jăt jơno-bơlăm gừn ăm nteàh jơno sràt-rma; bơh tom cêh lah: “Dî păl ngăn sràt-rma kơp cro ơ̆ kơđư̆ng nùs î kơp jơno dî cêh nơ̆m sră jơno-bơlăm lơi lơh-jăt gô.” 11Mơya nê̆-năn ngăn lah ơ̆ cro găy kơnơm bơh jơno-bơlăm dî sơnăn tơpăt-durư̆ng sơđàp măt Yang Tơm Trồ, bơh “cro tơpăt-durư̆ng rơp jîng kơnơm bơh jơno don.” 12Hôm jơno-bơlăm gừn ơ̆ tơlôh bơh jơno don, mơya “Cro lơh kơp bră jơno-bơlăm dê rơp jîng kơnơm bơh gô.” 13Yang Dŏng-Klàs sŏng tăc tơwai ƀòn mơ̆n klàs bơh jơno sràt-rma jơno-bơlăm dê tơm tô̆ kŏng sràt-rma măư ma ƀòn mơ̆n — bơh jơno tom cêh lah: “Dî păl ngăn sràt-rma cro găy kŏng iyông cŭng sî pư̆ng” — 14lơi jơno lơngăp-lơnge Abraham dê trôh ma cro lang bol bơdih nơ̆m Yang Dŏng-Klàs Jesu, lơi ma ƀòn mơ̆n digơlăn dưñ-lăñ dî jơno hăư pơngon gôtrê bơh Yang Hwîng kơnơm bơh jơno don.

15Ơ oh mi rôh lŏ, ăñ tơs jăt gung dà kon-mơnùs. Bulah tîgay, ơ̆ cro găy digơlăn jut căư hala bơtăl nơ̆m jơno hăư-băl sŏng dî cro lơh nên. 16Pơnah nde, lơ̆gay jơno hăư pơngon gừn sŏng dî tơs î Abraham gư̆m ma nŏk-noi ông dê. Jơno gư̆n ơ̆ tơs “gư̆m e ma lơ̆gay nŏk-noi” gư̆ptî sơđah bơh khăi cro, mơya la “gư̆m e ma nŏk-noi kon dê” gư̆ptî sơđah bơh du hôi cro mà rơ̆ la Yang Dŏng-Klàs. 17Mơya gôtrê bơh jơno ăñ kơñ tơs rơ̆ la: Tơm tô̆ jơno tom sơđah tơlôh ma-ngkơi puôn-rhieng păy-jư̆t năm, jơno-bơlăm ơ̆ jut so jơno hăư-băl sŏng dî Yang Tơm Trồ lơh nên lai mađàp gư̆n lơi lơh jîng ơ̆ kwơ mang jơno hăư pơngon. 18Bơh dilah srăy-brê trôh bơh jơno-bơlăm, gừn srăy-brê gư̆n ơ̆ hôm la bơh jơno hăư pơngon. Mơya Yang Tơm Trồ sŏng e jơno sơmah ma Abraham kơnơm bơh jơno hăư pơngon. 19Tîrơ̆ gừn, jơno-bơlăm lơi lơh jơno găy? Jơno-bơlăm sŏng dî bơtăl te tài bơh lơ̆gay jơno tìs-glài, ma-ngkơi jơ dî dờp e bơh lơ̆gay cro gơndrơh kơnơm bơh tê du hôi cro ăm nơ̆m pah gời, trôh dî jơ găy nŏk-noi tom tơlôh, mà jơno hăư pơngon sŏng dî pồ lơh nên gôtrê bơh nŏk-noi gư̆n. 20Mơya, cro ăm nơ̆m pah gời gừn ơ̆ ăn lơi e ma du đah, mà Yang Tơm Trồ gừn nư̆ng dul. 21Tîgư̆n, jơno-bơlăm swà tơblơ̆ wăl jơno hăư pơngon ya? Jơno gư̆n la ơ̆ tô̆ găy ơ̆h! Bơh dilah jơno bơlăm dî dờp e mà digơlăn iyà wăl jơno jîng, gừn nên-nôn ngăn jơno tơpăt-durư̆ng rơp trôh bơh jơno-bơlăm. 22Mơya Sră-Goh sŏng tơng-gron lơ̆gay nteàh gơnoăr tồi-glài lơi kơnơm bơh jơno don anẵu Yang Dŏng-Klàs Jesu, jơno hăư pơngon digơlăn dî dờp e ma tơmpôl cro dî nùs don.

23Mơya, lai jơ jơno don gư̆n trôh, ƀòn mơ̆n ờs kŏng kơ̆p jư nteàh gơnoăr jơno-bơlăm, tơm tô̆ kŏng kơ̆p tơng-gron trôh dî jơ jơno don dî rang sơđah makin. 24Tien gơs, jơno-bơlăm sŏng gôjîng cro gơnoăr ăt-bồ ƀòn mơ̆n dê gôtrê lêh ma Yang Dŏng-Klàs, lơi ƀòn mơ̆n digơlăn dî sơnăn tơpăt-durư̆ng kơnơm bơh jơno don. 25Mơya ma-ngkơi jơ jơno don trôh, ƀòn mơ̆n ơ̆ hôm ăm nteàh gơnoăr cro gơnoăr ăt-bồ te. 26Bơh lơ̆gay oh mi rôh lŏ la kon Yang Tơm Trồ dê kơnơm bơh jơno don anẵu Yang Dŏng-Klàs Jesu. 27Bơh dilah tơmpôl găy sŏng kŏng lơh ƀaptem nơ̆m Yang Dŏng-Klàs gừn kŭng cù dưñ Yang Dŏng-Klàs. 28Ơ̆ tơmcơlah dêh cro Juđa hala cro Grek, ơ̆ tơmcơlah cro ăm lơh dê̆ hala cro khăt-gơboh, ơ̆ tơmcơlah cro-klo hala cro-ua, bơh lơ̆gay oh mi rôh lŏ la dul nơ̆m Yang Dŏng-Klàs Jesu. 29Mà dilah oh mi rôh lŏ gôtrê ma Yang Dŏng-Klàs, gừn oh mi rôh lŏ la kon so Abraham dê, la cro cơdô̆ jăt jơno hăư pơngon.