Galati 2

1Ma-ngkơi jư̆t-puôn năm, ăñ swà wăl lêh nơ̆m Jerusalem băl î Ƀanaƀa, kŭng bơlăm Tit swà băl. 2Jơ gư̆n, jăt jơno e tơnggư̆t lai, ăñ sŏng swà gừn tơs nê̆-năn sơđàp măt ƀòn gô Jơno Niem mà ăñ tơs bơtău nhòng tĕdơ tơmpôl lang bol bơdih, mơya jăt jơno kơlôi dêh tơmpôl cro dî tien pơndrơ, kơ̆mbrit lah jăt jơno găy gư̆n mà mơ̆n ndăng cơplŏk hala sŏng cơplŏk nơ̆m jơno ơ̆ kwơ. 3Bulah tîgư̆n, ƀăt băl î Tit, cro swà băl î ăñ, la cro Grek, kŭng ơ̆ kŏng bơklơ̆n păl koh kato. 4Mà bră gư̆n la tài bơh tơmpôl oh mi mablăc mơ̆t òm, la tơmpôl cro sŏng mơ̆t òm lơi lăng jơno khăt-gơboh ƀòn hî dê, la jơno khăt-gơboh mà ƀòn hî dî nhòng Yang Dŏng-Klàs Jesu, lơi ma ƀòn gô digơlăn kơ̆p ƀòn hî lơh dê̆, 5gư̆n-jîng ƀòn hî kŭng ơ̆ tom jơno tơmñương găp sơđàp măt ƀòn gô nơ̆m du jơno găy ơ̆h, lơi jơno tơpăt-ngăn Jơno Niem dê digơlăn ăm miek î oh mi rôh lŏ. 6Hôm gôtrê ma pơnah tơmpôl cro digơlăn la kơnă tien pơndrơ găy gư̆n (bulah lai ƀua ƀòn gô dî la kơnă găy, gừn kŭng ơ̆ tom phadêh găy gôtrê î ăñ, Yang Tơm Trồ ơ̆ lăng dơng mang mađah makin kon-mơnùs dê) — ngăn, tơmpôl cro dơng mang gư̆n ơ̆ bơtăl te jơno găy ma ăñ ơ̆h. 7Mơya gôtơblơ̆ wăl, tơm tô̆ đăl gư̆t lah ăñ sŏng dî jao gơnoăr bră tơs bơtău Jơno Niem ăn lơi ma cro hôm dahrăư kŏng koh kato, kŭng gư̆p Pier la ăn lơi ma cro kŏng koh kato 8(bơh Bơtao sŏng lơh bră nhòng Pier lơi lơh gơnoăr bră cro gơnoăr bơtău dơng gôtrê ma cro kŏng koh kato, kŭng sŏng lơh bră nhòng ăñ gôtrê ma cro lang bol bơdih), 9gừn ma-ngkơi jơ đăl gư̆t dî jơno sơmah sŏng dî e ma ăñ, gừn Jakơ, Sepha, gư̆m Jăng, tơmpôl cro gư̆ptî la kơp ƀĕ jrŏng, sŏng jao tê ma tơmklăc-băl î Ƀanaƀa gư̆m ăñ, lơi ƀòn hî gừn swà trôh ma lơ̆gay lang bol bơdih, hôm ƀòn gô swà ma lơ̆gay cro kŏng koh kato, 10nư̆ng ƀăn tơngkah lah ƀòn hî păl sơdơ trôh cro kơsòt, gư̆n la jơno mà ăñ kŭng sŏng ngăc-ngăr ngăn lơh.

11Mơya tơm tô̆ Sepha swà trôh nơ̆m Antiôt gừn ăñ sŏng tơmdră ƀăt sơđàp măt ông bơh ông ờs dî păl kŏng ƀoah-đas. 12Bơh lai jơ lơ̆gay cro bơh Jakơ trôh, ông ờs sa băl î tơmpôl lang bol bơdih. Mơya tơm tô̆ ƀòn gô trôh, ông sŏng ruc mande gư̆m pleh să mơ̆n dêh du đah, bơh kơ̆mbrit tơmpôl cro gôtrê ma jơno kơñ prăp jư jơno-bơlăm kŏng koh kato. 13Gư̆m tơmpôl cro Juđa hôm wăl kŭng tơmơ̆t băl dubă blăc blơ̆ jăt ông, tien gơs ƀăt băl î Ƀanaƀa kŭng kŏng pơlum jăt jơno lơh blăc blơ̆ ƀòn gô dê. 14Mơya tơm tô̆ ăñ tơmpơl lah ƀòn gô ndăng ơ̆ lơh jơno-tơpăt jăt jơno tơpăt-ngăn Jơno Niem dê, ăñ sŏng tơs î Sepha sơđàp măt kơp hê cro lah: “Dilah mê, la cro Juđa, jîng gư̆ptî cro lang bol bơdih mà ơ̆ gư̆ptî cro Juđa, gừn lơh mơmơh mê digơlăn pơđơ cro lang bol bơdih păl jîng gư̆ptî cro Juđa?” 15Ƀòn hî la cro Juđa bơh jơ mhăy bơda, ơ̆-iyŏ cro glài tơlôh bơh cro lang bol bơdih. 16Mơya bơh gư̆t lah ơ̆ du hôi cro găy dî sơnăn tơpăt-durư̆ng kơnơm bơh bră lơh-jăt jơno-bơlăm, sî nư̆ng kơnơm bơh jơno don anẵu Yang Dŏng-Klàs Jesu, gư̆n-jîng ƀòn hî sŏng ăn nùs don anẵu Yang Dŏng-Klàs Jesu, lơi ƀòn hî dî sơnăn tơpăt-durư̆ng kơnơm bơh jơno don anẵu Yang Dŏng Klàs mà ơ̆-iyŏ kơnơm bơh bră lơh-jăt jơno-bơlăm. Bơh kơp poăc-să rơp ơ̆ dî sơnăn tơpăt-durư̆ng bơh bră lơh-jăt jơno-bơlăm. 17Mơya dilah, tơm jơ ndăng jôi kơp jơno dî sơnăn tơpăt-durư̆ng nơ̆m Yang Dŏng-Klàs, sătan ƀòn hî kŭng kŏng swì tơmpơl la cro glài, gừn jơno Yang Dŏng-Klàs la cro duh bră ma tồi-glài dê? Jơno gư̆n la ơ̆ tom ơ̆h! 18Bơh dilah ăñ băt tơngñă wăl lơ̆gay jơno mà ăñ sŏng tơngroh, gừn ăñ cư̆ng-tang să ăñ la cro lơh tìs jơno-bơlăm. 19Tài bơh kơnơm bơh jơno-bơlăm, ăñ sŏng sơ̆t gôtrê ma jơno-bơlăm, lơi ăñ digơlăn jîng ma Yang Tơm Trồ. Ăñ sŏng kŏng pư̆ng điñ nơ̆m sî pư̆ng băl î Yang Dŏng-Klàs. 20Bulah ăñ ơ̆ hôm jîng te, mơya Yang Dŏng-Klàs jîng nơ̆m ăñ. Hôm rai-jîng mà ăñ jơ dô ndăng jîng nơ̆m să-jăn, gừn ăñ jîng nơ̆m jơno don anẵu Kon Yang Tơm Trồ, Bơtao sŏng kơloh ăñ î phi sătan Kơnràñ măư ma ăñ. 21Ăñ ơ̆ lơi căư jơno sơmah Yang Tơm Trồ dê ơ̆h, bơh dilah jơno tơpăt-durư̆ng la bơh jơno-bơlăm, tîrơ̆ gừn Yang Dŏng-Klàs sŏng sơ̆t dubă ơ̆ kwơ!