Galati 1

1Pol, du hôi cro gơnoăr bơtău dơng — ơ̆-iyŏ trôh bơh kon-mơnùs, kŭng ơ̆ bơh du hôi cro găy, mơya bơh Yang Dŏng-Klàs Jesu gư̆m bơh Yang Tơm Trồ, la Bàp, Bơtao sŏng lơh Kơnràñ jîng wăl bơh anẵu sơ̆t — 2băl î lơ̆gay oh mi ăm î ăñ, pơyoa lơ̆gay Hîh Jư̆m Goh nơ̆m Galati: 3Dăn jơno sơmah trôh nơ̆m oh mi rôh lŏ băl î jơno lơngăp-lơnge bơh Yang Tơm Trồ, la Bàp, î Yang ƀòn mơ̆n la Yang Dŏng-Klàs Jesu, 4Bơtao sŏng phi să mơ̆n bơh tồi-glài ƀòn mơ̆n, lơi Kơnràñ digơlăn dŏng-tă ƀòn mơ̆n klàs bơh rai-jîng bờk-mơsăk jai dô, jăt nùs-kơñ Yang Tơm Trồ dê, Bàp ƀòn mơ̆n. 5Dăn jơno gơklŏ gôtrê ma Kơnràñ trôh dî miek miek ơ̆lơ̆ ơ̆lŭi. Amen.

6Ăñ ndrăt-ndròt tơm tô̆ oh mi rôh lŏ kađa tơmblăc lơi căư bơh Bơtao sŏng hôi-săc mơ̆n bơh jơno sơmah Yang Dŏng-Klàs dê lơi swà jăt du jơno niem nde, 7mà Jơno Niem gừn ơ̆ tom phadêh ơ̆h, mơya nư̆ng bơh nhẵư hê cro năy la tơmpôl cro lơh tơng sơlô̆ng-sơlăng oh mi rôh lŏ gừn kơñ tơs tơmbờk Jơno Niem Yang Dŏng-Klàs dê. 8Mơya bulah sătan ƀòn hî, hala cro gơndrơh bơh trồ, tơs bơtău ma oh mi rôh lŏ du jơno niem nde î Jơno Niem mà ƀòn hî sŏng tơs bơtău ma oh mi rôh lŏ, gừn cro rơ̆ păl kŏng sràt-rma. 9Gư̆ptî ƀòn hî sŏng tơs bơh lai ƀua lờt, gừn jơ dô ăñ tơs du dơ̆ te: “Dilah cro găy gư̆n tơs bơtău ma oh mi rôh lŏ du jơno niem phadêh î Jơno Niem mà oh mi rôh lŏ sŏng dưñ-lăñ, gừn cro rơ̆ păl kŏng sràt-rma.” 10Bơh jơ dô, ăñ ndăng lơh niem-nùs kon-mơnùs hala Yang Tơm Trồ? Hala tom iyŏ ăñ ndăng jôi jơno lơh niem-nùs cro? Dilah ăñ ờs ndăng lơh niem-nùs cro, gừn nên-nôn ngăn ăñ ơ̆-iyŏ la dê̆-gơna Yang Dŏng-Klàs dê.

11Ơ oh mi rôh lŏ, ăñ dăn rang sơđah oh mi rôh lŏ gư̆t bơh Jơno Niem ăñ sŏng dî tơs bơtău, lah Jơno Niem rơ̆ ơ̆-iyŏ la lơh-jăt bơh du hôi cro găy. 12Bơh ăñ ơ̆ dưñ-lăñ Jơno Niem rơ̆ bơh du hôi cro găy, ăñ kŭng ơ̆ dî bơtău, mơya gư̆n la bơh jơno e tơnggư̆t lai Yang Dŏng-Klàs Jesu dê. 13Tài bơh oh mi rôh lŏ sŏng kơnău gư̆t rai-jîng bơh lai ăñ jê nhòng cro Juđa, rơ̆ la ăñ ờs kơ̆p rôn-bơklơ̆n khăi ngăn Hîh Jư̆m Goh Yang Tơm Trồ dê, gư̆m kư̆ jôi gung tơngsơ̆t tơmpôl gư̆n. 14Î ăñ sơlơ te nơ̆m gung duh-khoai cro Juđa rlo lơ̆gay cro durư̆ng băl năm nhòng lang bol ăñ, tơm tô̆ gôjîng ngăc-ngăr ngăn bơh lơ̆gay jơno ờs yo ông-pang ăñ jê. 15Mơya tơm tô̆ Yang Tơm Trồ, Bơtao sŏng ăn dêh ăñ bơh nhòng klô̆ng mơi mơ̆n, gừn sŏng hôi-săc ăñ bơh jơno sơmah Kơnràñ, niem-nùs 16Jơno e tơnggư̆t lai Kon Kơnràñ nhòng ăñ, lơi ăñ digơlăn tơs bơtău bơh Kon gư̆n nhòng tĕdơ lang bol bơdih, gừn ƀăt jai gư̆n ăñ ơ̆ bơyê î rlău gư̆m mham, 17ăñ kŭng ơ̆ swà lêh nơ̆m Jerusalem lơi tơmtom lơ̆gay cro cro gơnoăr bơtău dơng lai mađàp ăñ. Ala bơh gư̆n, ăñ sŏng swà trôh nơ̆m Araƀi, sŏng gư̆n blăc trê wăl nơ̆m Damas.

18Tơmjăt bơh gư̆n, păy năm ma-ngkơi, ăñ swà lêh nơ̆m Jerusalem lơi lơh mơng măt î Sepha gư̆m ăm wăl băl î ông gư̆n jư̆t-prăm nge. 19Mơya ăñ ơ̆ tơmtom du hôi cro găy nhòng lơ̆gay cro gơnoăr bơtău dơng, sî nư̆ng Jakơ, oh klo Yang dê. 20Gôtrê bơh lơ̆gay jơno ăñ sŏng cêh ma oh mi rôh lŏ, lăng cĕ dô, sơđàp măt Yang Tơm Trồ, ăñ ơ̆ tơs blăc. 21Sŏng gư̆n, ăñ swà trôh nơ̆m lơ̆gay lơgơ Siri dê gư̆m Silisi. 22Jơ gư̆n, ăñ hôm dahrăư dî kơp Hîh Jư̆m Goh nhòng Yang Dŏng-klàs nơ̆m Juđe gư̆t măt. 23Mơya lơ̆gay cro don ờs nư̆ng kơnău lah: “Cro bơh lai kơ̆p rôn-bơklơ̆n ƀòn mơ̆n jai dô ndăng tơs bơtău jơno don mà cro gư̆n bơh lai ƀua jôi jơno tơngroh,” 24gư̆n-jîng ƀòn gô jong-rơ Yang Tơm Trồ tài bơh ăñ.