2 Kôrintô 13

1Dô la dơ̆ păy ăñ trôh î oh mi rôh lŏ. “Kơp bră rơp dî tơs wăl bơh jơno tơs bea hala păy hê cro lơh cư̆ng.” 2Ăñ sŏng tơs e tơnggư̆t lờt tơm tô̆ ăñ trôh dơ̆ bea, gừn jơ dô, bulah ơ̆ tom măt, ăñ kŭng tơs î tơmpôl cro bơh lai sŏng tìs-glài, băl î lơ̆gay tơmpôl cro hôm wăl lah dilah ăñ digơlăn trôh anẵu dô du dơ̆ te, ăñ rơp ơ̆ hồ-toh ma cro găy, 3tài bơh oh mi rôh lŏ kơñ tơmpơl cư̆ng-tang Yang Dŏng-Klàs ndăng tơs bơtău anẵu ăñ, la Bơtao ơ̆ lơbăn-lơñô î oh mi rôh lŏ ơ̆, mơya pran-kơdăng ngăn nhòng oh mi rôh lŏ. 4Bơh Kơnràñ kŏng pư̆ng điñ cŭng sî pư̆ng nơ̆m jơno lơbăn-lơñô, mơya Kơnràñ ndăng jîng bơh jơno gơnăp-gơnoăr Yang Tơm Trồ dê. Bơh ƀòn hî kŭng lơbăn-lơñô nơ̆m Kơnràñ, mơya ƀòn hî rơp jîng î Kơnràñ bơh jơno gơnăp-gơnoăr Yang Tơm Trồ jăt bơh oh mi rôh lŏ.

5Oh mi rôh lŏ lăng swì dêh cĕ sătan mơ̆n tom iyŏ la mơ̆n ndăng ăm nơ̆m jơno don. Lơh cư̆ng cĕ bơh să tơm mơ̆n. Hala oh mi rôh lŏ ơ̆ gư̆t wơng nê̆ dî bơh să tơm lah Yang Dŏng-Klàs Jesu ăm nhòng mơ̆n ơ̆h — dilah tîgư̆n, gừn tom iyŏ oh mi rôh lŏ la cro blăc-pơlum ya? 6Mơya ăñ kơp kơñ la oh mi rôh lŏ rơp gư̆t wơng lah să tơm ƀòn hî ơ̆-iyŏ la cro blăc-pơlum. 7Hôm ƀòn hî hôi-dăn î Yang Tơm Trồ lơi oh mi rôh lŏ ơ̆ lơh jơno găy tìs, ơ̆-iyŏ lơi să tơm ƀòn hî digơlăn rang sơđah mơ̆n la păl dưñ dờp, mơya la lơi oh mi rôh lŏ digơlăn lơh jơno niem, bulah să tơm ƀòn hî gôlơh gư̆ptî ơ̆ dî dưñ dờp. 8Bơh ƀòn hî ơ̆ digơlăn lơh du jơno găy tơmdră wăl î jơno tơpăt-ngăn, tơblơ̆ wăl ƀòn hî la bơh jơno tơpăt-ngăn. 9Bơh ƀòn hî sơhờp-sờhơn tơm tô̆ ƀòn hî gừn lơbăn-lơñô hôm oh mi rôh lŏ dî pran-kơdăng. Ƀòn hî kŭng hôi-dăn ma jơno dô: jơno wêl-tăl oh mi rôh lŏ dê. 10Bơh jơno rơ̆, ăñ cêh lơ̆gay jơno dô tơm tô̆ ơ̆ tom măt, lơi trôh jơ ăñ tom măt gừn ăñ rơp ơ̆ kă lơh dubă krañ-cê î oh mi rôh lŏ jăt gơnoăr bră ăñ — la gơnoăr bră Yang jao ma ăñ lơi băt bơtao oh mi rôh lŏ ơ̆-iyŏ lơi lơh tơlah oh mi rôh lŏ.

11Lŭi-dơ̆t, ơ oh mi rôh lŏ, sơhờp-sờhơn cĕ! Tơmblăc cĕ trôh jơno wêl-tăl, lơi cĕ sătan dî mơ̆ndơm-mơ̆nieng, du nùs băl î găp, ăm tơmrơm băl î găp. Yang Tơm Trồ jơno kơñ-kơloh î jơno lơngăp-lơnge rơp ăm î oh mi rôh lŏ.

12Còp-să cĕ găp bơh î jơno cư̆m sang-goh. Lơ̆gay cro sang-goh còp-să oh mi rôh lŏ.

13Dăn jơno sơmah Yang, la Yang Dŏng-Klàs Jesu, băl î jơno kơñ-kơloh Yang Tơm Trồ gư̆m jơno gô tơmklăc-băl Yang Hwîng Goh ăm î lơ̆gay oh mi rôh lŏ.