Galati 4

1Mơya ăñ kơñ tơs lah trôh dî jơ găy cro cơdô̆ hôm la cro kơmom, gừn cro rơ̆ ơ̆ phadêh găy î du hôi cro ăm lơh dê̆, bulah gô la cro pơnhơm lơ̆gay srăy-brê dê. 2Tơblơ̆ wăl, cro gư̆n ăm nteàh gơnoăr cro ăt-bồ hîh nhă î lơ̆gay cro rong sem trôh dî tô̆ tơnge sŏng dî lơh nên lai cro bàp dê. 3Kŭng gư̆p tîrơ̆ ya, tơm tô̆ ƀòn mơ̆n hôm la cro kơmom, ƀòn mơ̆n kŏng ăm lơh dê̆ ma lơ̆gay jơno lơh nên ƀră ƀrài dunya dê. 4Mơya tơm jơ tô̆ tơnge dî wêl-tăl trôh lờt, Yang Tơm Trồ sŏng pơđơ Kon Kơnràñ, tơm tô̆ bơda tơlôh bơh du hôi cro-ua, bơda tơlôh nteàh jơno-bơlăm, 5lơi Kơnràñ dŏng tăc tơwai lơ̆gay cro ăm nteàh jơno-bơlăm, lơi ma ƀòn mơ̆n digơlăn dưñ dî gơnoăr lơh jîng kon rong. 6Pơnah nde, bơh oh mi rôh lŏ la kon, gư̆n-jîng Yang Tơm Trồ sŏng pơđơ Hwîng Yang Kon Kơnràñ dê mơ̆t ngglăm nùs ƀòn mơ̆n, dreo dơng lah: “Aba, Bàp.” 7Gư̆n-jîng oh mi rôh lŏ ơ̆ hôm iyŏ la cro ăm lơh dê̆ te, mơya la kon, mà dilah la kon, gừn kŭng la cro cơdô̆ kơnơm bơh Yang Tơm Trồ.

8Mơya bơh lai ƀua, tơm tô̆ hôm dahrăư gư̆t Yang Tơm Trồ, oh mi rôh lŏ sŏng kŏng ăm lơh dê̆ ma lơ̆gay jơno mà gôtrê bơh să-jăn ơ̆-iyŏ la hwîng găy ơ̆h. 9Hôm jơ dô tơm tô̆ sŏng đăl gư̆t Yang Tơm Trồ, mà iyŏ ngăn rlo la sŏng dî Yang Tơm Trồ gư̆t trôh, gừn amơh oh mi rôh lŏ tơmblăc trê wăl î lơ̆gay jơno lơh nên ơ̆ dơng mang î ơ̆ kwơ, oh mi rôh lŏ kơp kơñ ăm lơh dê̆ ma jơno gư̆n du dơ̆ te ya? 10Oh mi rôh lŏ kŭng hôm lăng nge, kơnnhe, kơnnhe koh î năm! 11Ăñ kơlôi ngăn bơh oh mi rôh lŏ, kơ̆mbrit lah ăñ sŏng sơòs-sơngeh dubă ơ̆ kwơ nhòng tĕdơ oh mi rôh lŏ.

12Ơ oh mi rôh lŏ, ăñ dăn oh mi rôh lŏ păl gôjîng gư̆ptî ăñ, bơh ăñ kŭng gư̆ptî oh mi rôh lŏ. Oh mi rôh lŏ ơ̆ lơh jơno găy tìs sơloah î ăñ dư̆ng-iè găy ơ̆h. 13Oh mi rôh lŏ gư̆t lah kơnơm bơh jơno lơbăn-lơñô nơ̆m să-jăn dô, ăñ sŏng tơs bơtău Jơno Niem ma oh mi rôh lŏ nơ̆m dơ̆ sơm. 14Î jơno lòng nơ̆m oh mi rôh lŏ nơ̆m anẵu nhòng să-jăn ăñ, oh mi rôh lŏ ơ̆ lăng ơ̆săp-ơ̆său, kŭng ơ̆ tơm khan. Gôtơblơ̆ wăl, oh mi rôh lŏ sŏng wă-rẵu ăñ gư̆ptî cro gơndrơh Yang Tơm Trồ dê, gư̆ptî Yang Dŏng-Klàs Jesu. 15Tîrơ̆ gừn, jơno sơhờp-sờhơn gư̆n oh mi rôh lŏ dê anẵu găy teh? Bơh ăñ lơh cư̆ng bơh oh mi rôh lŏ lah, dilah dî, oh mi rôh lŏ gư̆n sŏng kơkwè gơ-măt mơ̆n dê, dờp e gời ma ăñ. 16Bơh gư̆n la, ăñ sŏng gôjîng cro tơmdră oh mi rôh lŏ dê bơh tơs jơno ngăn î oh mi rôh lŏ ya? 17Lơ̆gay tơmpôl gư̆n ngăc-ngăr î oh mi rôh lŏ, ơ̆-iyŏ bơh nùs niem, mơya ƀòn gô kơñ cơlah oh mi rôh lŏ dêh mande, lơi oh mi rôh lŏ ngăc-ngăr î ƀòn gô. 18Mơya kŏng ngăc-ngăr ma kơp dơ̆ ma jơno niem la niem, gừn ơ̆-iyŏ nư̆ng jơ ăñ tom măt î oh mi rôh lŏ. 19Ơ ƀòn kon ăñ jê, bơh ƀòn kon mà ăñ păl kŏng jơno jê-kơkua mơñ bơda du dơ̆ te trôh dî jơ Yang Dŏng-Klàs dî gôjîng rồp-să nơ̆m ƀòn kon! 20Pơnah nde, ăñ kơp kơñ ăm en î ƀòn kon ƀăt nơ̆m jơ dô î tơmbơgăl dẵư tơs ăñ jê, bơh ăñ ndăng mơrêh-mơrăñ bơh ƀòn kon.

21Ơ tơmpôl cro kơñ ăm nteàh jơno-bơlăm, dờp cĕ ma ăñ gư̆t, oh mi rôh lŏ ơ̆ iet kơnău jơno-bơlăm ya? 22Bơh jơno tom cêh lah Abraham dî bea hê kon klo, du hôi la bơh cro-ua ăm lơh dê̆, î du hôi la bơh cro-ua bo tơm khăt-gơboh. 23Mơya, kon bơh cro-ua ăm lơh dê̆ dî bơda jîng jăt đah să-jăn, hôm kon bơh cro-ua khăt-gơboh dî bơda jîng bơh jơno hăư pơngon. 24Lơ̆gay bră dô gừn dî tơs trôh gư̆ptî du jơno pơ̆niyô, bơh bea hê cro-ua gư̆n la bea jơno hăư-băl. Du jơno hăư-băl nơ̆m yồ Sinai, bơda jîng kon cro ăm lơh dê̆. Rơ̆ la Agar. 25Agar la yồ Sinai nơ̆m anẵu Araƀi; gừn kŭng gư̆ptî î ƀòn dơng Jerusalem nge dô, bơh ƀòn dơng gư̆n băl î kon so gô ndăng ăm lơh dê̆. 26Mơya Jerusalem cŭngsî trồ gừn dî khăt-gơboh, ma rơ̆ la mơi ƀòn mơ̆n dê. 27Bơh jơno tom cêh lah:

“Sơhờp-sờhơn cĕ, ơ cro kơnên, la cro-ua ơ̆ bơda dî;

Pẵư dẵư dơng î sơhờp-sờhơn dreo dơng, ơ cro ơ̆ jê-kơkua bơh jơno bơda kon;

Bơh kon so cro-ua kŏng lơi căư dê khăi rlo kon so cro-ua dî bo-klo.”

28Ơ oh mi rôh lŏ, gư̆ptî Isăk, oh mi rôh lŏ la kon jơno hăư pơngon dê. 29Mơya, gư̆ptî jơ bơh yo, cro kon dî bơda jăt poăc-să lơh bờk-mơsăk kon bơda jăt Yang Hwîng, gư̆p tîgay, gừn jơ dô kŭng gư̆ptî rơ̆ ya. 30Mơya Sră-Goh tơs jơno găy? “Tơmprơh cĕ cro-ua ăm lơh dê̆ î kon gô dê. Bơh kon cro-ua ăm lơh dê̆ dê nên-nôn ngăn rơp ơ̆ dưñ-lăñ băl î kon cro-ua khăt-gơboh dê.” 31Gư̆n-jîng, ơ oh mi rôh lŏ, ƀòn mơ̆n ơ̆-iyŏ la kon cro-ua ăm lơh dê̆ ơ̆h, mơya la kon cro-ua khăt-gơboh dê.