Kôlôse 1

1Pol, cro gơnoăr bơtău dơng Yang Dŏng-Klàs Jesu dê jăt nùs-kơñ Yang Tơm Trồ, gư̆m Timôthe, cro oh mi ƀòn mơ̆n dê, 2pơyoa ma lơ̆gay cro sang-goh î oh mi rôh lŏ don-tơpăt nơ̆m Yang Dŏng-Klàs nơ̆m anẵu Kôlôse. Dăn jơno sơmah î jơno lơngăp-lơnge bơh Yang Tơm Trồ, la Bàp î Yang ƀòn mơ̆n, la Yang Dŏng-klàs Jesu, trôh nơ̆m oh mi rôh lŏ.

3Ƀòn hî ưnngai Yang Tơm Trồ, Bàp Yang ƀòn mơ̆n dê, la Yang Dŏng-Klàs Jesu, nơ̆m kơp dơ̆ hôi-dăn ma oh mi rôh lŏ, 4bơh sŏng kơnău gôtrê bơh jơno don oh mi rôh lŏ dê nơ̆m Yang Dŏng-Klàs Jesu î gôtrê bơh jơno kơñ-kơloh mà oh mi rôh lŏ ăn lơi ma lơ̆gay kơp cro sang-goh, 5tài bơh jơno cang-kơnơm dî ăn lơi ma oh mi rôh lŏ nơ̆m cŭngsî lơ̆gay dăp trồ, la jơno mà oh mi rôh lŏ sŏng kơnău bơh lai ƀua nơ̆m jơno niem jơno tơpăt-ngăn dê, rơ̆ la Jơno Niem, 6la jơno ndăng tom nhòng oh mi rôh lŏ, mà jơno Niem gư̆n ndăng tơlôh công nha î dî teh dơng nơ̆m jơh lơ̆gay dunya tîgay, gừn kŭng gư̆p tîgư̆n nơ̆m oh mi rôh lŏ, ƀăt bơh nge oh mi rôh lŏ sŏng kơnău î bơtê gư̆t jơno sơmah Yang Tơm Trồ nhòng jơno tơpăt-ngăn, 7gư̆ptî oh mi rôh lŏ sŏng bơtê gư̆t bơh Epapras, cro lơh bră băl kơñ-kơloh ngăn ƀòn hî dê, gô la du hôi dê̆-gơna don-tơpăt Yang Dŏng-Klàs dê ala măt ƀòn hî, 8gừn la cro sŏng e ma ƀòn hî gư̆t jơno kơñ-kơloh oh mi rôh lŏ nhòng Yang Hwîng Goh.

9Bơh gư̆n, bơh nge ƀòn hî kơnău tîgư̆n, gừn ƀòn hî ơ̆ bơdê jơno hôi-dăn ma oh mi rôh lŏ gư̆m răc-dăn, lơi ma oh mi rôh lŏ dî bîng-jut jơno wơng gư̆t nùs-kơñ Kơnràñ nơ̆m lơ̆gay jơno jăk-sai î jơno wă wơng đah hwîng, 10lơi lơbà swà dî păl ngăn î Yang nơ̆m kơp gung dà niem nùs kơñ Kơnràñ, dî tơlôh công nha nơ̆m kơp bră lơbăn-niem, dî teh dơng nơ̆m jơno đăl gư̆t Yang Tơm Trồ, 11dî pran-kơdăng î bîng-jut pran jăt jơno gơnăp-gơnoăr jơno gơklŏ Kơnràñ dê, lơi lơh kơđư̆ng nùs gư̆m ăt-ăl bơh î nùs sơhờp-sờhơn, 12ăn jơno ưnngai Bàp, Bơtao sŏng lơh oh mi rôh lŏ tăl pơnah ăm nơ̆m jơno ngui băl srăy-brê î lơ̆gay cro sang-goh nơ̆m jơno ang. 13Să tơm Bơtao gư̆n sŏng dŏng tă ƀòn mơ̆n klàs bơh nơ̆m gơnoăr-pran jơno kơnăm ñô̆ng, î iyà ƀòn mơ̆n trôh nơ̆m dà lơgơ Kon kơñ-kơloh Kơnràñ dê, 14nơ̆m Kon gư̆n, ƀòn mơ̆n dî jơno dŏng tơwai, rơ̆ la jơno hồ-toh tồi-glài. 15Kon gư̆n la rồp-să Yang Tơm Trồ dê ơ̆ tơmpơl dî, la Bơtao tom lai ñư̆k nơ̆m lơ̆gay jơno mon bơjîng. 16Bơh nơ̆m Kon, lơ̆gay jini-jơno cŭngsî trồ băl î nteàh ù, tơmpơl hala ơ̆ tơmpơl, kŭng sŏng dî mon bơjîng. Bulah la sơban bơtao, hala gơnoăr ăt-bồ, hala gơnoăr-pran, hala gơnoăr cahrña, gừn lơ̆gay dî mon bơjîng bơh Kon î bơh Kon. 17Kon gư̆n tom lai lơ̆gay jini-jơno, gừn lơ̆gay jini-jơno tơmklăc-băl î găp nơ̆m Kon. 18Kon gư̆n kŭng la găl să-jăn dê, rơ̆ la Hîh Jư̆m Goh. Să tơm Kon gư̆n la sơntơm bơhsơm, la Bơtao tom lai ñư̆k bơh nhòng cro sơ̆t, lơi ma kon gư̆n lơh jîng Bơtao iyà găl nơ̆m lơ̆gay jini-jơno. 19Bơh Yang Tơm Trồ sŏng sơhờp nùs lơi ma lơ̆gay jơno dî wêl-tăl ăm nơ̆m Kon, 20gư̆m kơnơm bơh Kon lơi lơh tơmrơm wăl jơh lơ̆gay jơno î să tơm Kơnràñ, bulah la kơp jơno nơ̆m ù-teàh, hala kơp jơno cŭngsî trồ, bơh sŏng iyà trôh jơno tơmrơm kơnơm bơh Kon gư̆n, kơnơm bơh mham cŭng sî pư̆ng Kon dê. 21Bơh lai, tơm tô̆ oh mi rôh lŏ kŏng cro lăng la gư̆ptî cro crêh măt î cro tơmdră nhòng nùs-kơlôi, nơ̆m lơ̆gay bơh bră bờk-mơsăk. 22Mà jơ dô, oh mi rôh lŏ sŏng dî tơmrơm wăl kơnơm jơno sơ̆t nơ̆m să-jăn Kon dê, lơi tơng sơđah oh mi rôh lŏ sơđàp măt Kơnràñ, la jơh lơ̆gay cro sang-goh, ơ̆ têl sồt, gư̆m ơ̆ tom anẵu ƀoah-đas, 23nư̆ng la dilah oh mi rôh lŏ kư̆ ăm nơ̆m jơno don, pư̆ng reah, kơđư̆ng-bơkhê, gư̆m ơ̆ kŏng doh bơh jơno cang-kơnơm Jơno Niem dê mà oh mi rôh lŏ sŏng kơnău, la Jơno Niem sŏng dî tơnggư̆t ma kơp jơno mon bơjîng nteàh trồ, mà bơh gư̆n ăñ, Pol, sŏng sơlôh jîng du cro duh bră.

24Jơ dô ăñ sơhờp-sờhơn nơ̆m lơ̆gay gleh-glăr ăñ jê bơh oh mi rôh lŏ, gừn bơh î să-jăn mơ̆n, ăñ ndăng bơbua bîng lơ̆gay pơnah hôm prŏi nơ̆m jơno jê-kơkua Yang Dŏng-Klàs dê, tài bơh să-jăn Kơnràñ, rơ̆ la Hîh Jư̆m Goh, 25mà bơh gư̆n, ăñ sŏng sơlôh jîng la cro duh bră, jăt jơno gơnoăr bră Yang Tơm Trồ dê, mà bră gư̆n sŏng dî jao ma ăñ bơh oh mi rôh lŏ, lơi lơh wêl-tăl bră bơtău jơno Yang Tơm Trồ dê. 26Rơ̆ la jơno ndăp-ndơ sŏng dî pôn-ndăp bơh lơ̆gay kơp rai gư̆m kơp khăi nŏk-noi, mà jơ dô, jơno ndăp-ndơ gư̆n sŏng dî sơđah tơmpơl ma jơh lơ̆gay cro sang-goh Kơnràñ dê, 27la lơ̆gay cro mà Yang Tơm Trồ kơñ rang sơđah mơmơh la jơno kơnhơ̆p-mơ̆nda jơno gơklŏ jơno-tơpăt ndăp-ndơ dê dô nhòng tĕdơ lơ̆gay lang bol bơdih, gư̆n la Yang Dŏng-Klàs nơ̆m oh mi rôh lŏ, rơ̆ la jơno cang-kơnơm jơno gơklŏ. 28Gư̆n la Bơtao mà ƀòn hî bơtău tơs, tơm tô̆ ƀăn tơngkah lơ̆gay cro, gư̆m bơtău tơngkah lơ̆gay cro î jơh lơ̆gay jơno jăk-sai, lơi ƀòn hî digơlăn tơs sơđah lơ̆gay cro la wêl-tăl nơ̆m Yang Dŏng-Klàs. 29Kŭng bơh jơno gư̆n, mà ăñ kŏng sơòs-sơngeh, tơmlơh jơh pran jăt gư̆ptî kơnơm pran Kơnràñ dê ndăng lơh bră dubă gơnăp-gơnoăr nơ̆m ăñ.