Kôlôse 2

1Bơh ăñ kơñ oh mi rôh lŏ gư̆t ăñ tom jơno tơmlơh dơng ngăn tîgư̆n ma oh mi rôh lŏ, gư̆m ma lơ̆gay cro don anẵu Laodise, băl î gư̆t nhẵư hê cro te hôm dahrăư tơmpơl măt ăñ bơh pơnah poăc-să, 2lơi nùs ƀòn gô dî mơ̆ndơm-mơ̆nieng, tơm tô̆ dî tơmklăc-băl î găp nơ̆m jơno kơñ-kơloh, î blăc lêh ma lơ̆gay jơno tơngkah-tơngkăñ bră wơng gư̆t wêl-tăl nên-nôn ngăn, iyà trôh jơno đăl gư̆t jơno ndăp-ndơ Yang Tơm Trồ dê, rơ̆ la Yang Dŏng-Klàs, 3mà nơ̆m Kơnràñ la jơno prăp ăn ndăp-ndơ lơ̆gay kơp jơno phăn mang jăk-sai î wơng gư̆t. 4Ăñ tơs jơno dô lơi ơ̆ cro găy digơlăn blăc-pơlum oh mi rôh lŏ bơh î jơno tơs bơkah lơnguơ̆t. 5Bơh bulah iyŏ ngăn la ăñ ơ̆ tom măt nhòng să-jăn, mơya ăñ ăm î oh mi rôh lŏ nhòng hwîng-nùs, sơhờp-sờhơn gư̆m lăng tơmpơl jơno rơndăp tăp seng niem nhòng oh mi rôh lŏ, băl î jơno don pran-kơdăng oh mi rôh lŏ nơ̆m Yang Dŏng-Klàs.

6Gư̆n-jîng, tơm jơ oh mi rôh lŏ sŏng don dờp Yang Dŏng-Klàs Jesu la Yang, gừn păl lơbà swà cĕ nhòng Kơnràñ, 7kŏng pư̆ng reah î dî băt bơtao nơ̆m Kơnràñ, dî kơđư̆ng-bơkhê băl nhòng jơno don, jăt gư̆ptî jơno oh mi rôh lŏ sŏng dî ƀăn mơntău, gư̆m tơngkah-tơngkăñ nhòng jơno ưnngai.

8Kơhea-să cĕ, lơi ơ̆ tom du hôi cro găy gư̆n rơp la cro kơ̆p jư oh mi rôh lŏ bơh î jơno gư̆t rgê gư̆m nơ̆m jơno pơlum mơ̆ndơm hwơng gời, jăt jơno ờs dơm rai yo kon-mơnùs dê, jăt lơ̆gay jơno lơh nên dunya dê, mà ơ̆-iyŏ jăt Yang Dŏng-Klàs. 9Bơh nơ̆m Kơnràñ, jơh lơ̆gay jơno bîng wêl-tăl nùs-nhơ̆m Yang Tơm Trồ dê ăm lơ̆ nơ̆m să-jăn, 10gừn oh mi rôh lŏ sŏng dî lơh bîng wêl-tăl nơ̆m Kơnràñ, Bơtao la găl nơ̆m lơ̆gay kơp gơnoăr-pran gư̆m gơnoăr cahrña, 11mà nơ̆m Bơtao gư̆n, oh mi rôh lŏ kŭng dî koh kato bơh gơnoăr koh kato ơ̆-iyŏ bơh tê cro lơh nên, mơya bơh î bră lơi căư nùs-nhơ̆m poăc-să, rơ̆ la bơh î gơnoăr koh kato Yang Dŏng-Klàs dê, 12bơh sŏng dî tăp băl î Kơnràñ nơ̆m gơnoăr lơh ƀaptem, gừn nơ̆m Kơnràñ oh mi rôh lŏ sŏng dî jîng wăl kơnơm bơh jơno don anẵu gơnăp-gơnoăr Yang Tơm Trồ dê, Bơtao lơh Kơnràñ jîng wăl bơh anẵu sơ̆t. 13Gôtrê ma pơnah oh mi rôh lŏ, tơm jơ ndăng sơ̆t roh nơ̆m lơ̆gay jơno tìs-glài î nơ̆m bră să-jăn hôm dahrăư koh kato mơ̆n dê, gừn Kơnràñ sŏng lơh oh mi rôh lŏ dî jîng băl î Kơnràñ, bơh hồ-toh sŏng lơ̆gay jơno tìs-glài ma ƀòn mơ̆n, 14sŏng jut lơhiê sră bơ-a cêh bơh jơno lơh nên glài tơmdră ƀòn mơ̆n, gư̆n ờs la jơno tơmdră wăl î ƀòn mơ̆n, gừn Kơnràñ sŏng tă tư̆ng gô klàs bơh nhòng gô, tơm tô̆ pư̆ng điñ gô nơ̆m cŭng sî pư̆ng, 15rơmbăt căư lơ̆gay gơnoăr-pran î gơnoăr ăt-bồ, Kơnràñ sŏng lơh ƀòn gô sơlôh jơno tơngyŏ-tơnghiel ma dunya, tơm tô̆ pha-lĭn ƀòn gô cŭng sî pư̆ng.

16Gư̆n-jîng, bư̆ng lơi cro găy cahrña oh mi rôh lŏ bơh jơno sa î bơh jơno ñô, hala nơ̆m bơh jơno bơjư̆m-sa dê, nge khe mhăy, hala nge Saƀat, 17mà ƀòn gô nư̆ng la rồp-să dê nơ̆m lơ̆gay jơno mơñ trôh, hôm pơnah să-jăn gôtrê bơh Yang Dŏng-Klàs. 18Bư̆ng lơi cro găy lơh oh mi rôh lŏ lơh roh phăn ƀan, tơm tô̆ rang sơđah lơh bleh tơng-êt să gư̆m jơno duh khoai cro gơndrơh, kơnơm nơ̆m jơno găy mơ̆n sŏng tơmpơl, sơlôh jîng pơnhừ să dubă ơ̆ kwơ bơh nùs-kơlôi jăt să-jăn mơ̆n dê, 19gư̆m ơ̆ kađòng bơkhê sơ Găl, mà bơh anẵu Kơnràñ, lơ̆ du-lăm să-jăn kơnơm bơh lơ̆gay ple klăc tơm cơdô̆ gư̆m soan ơră dî rong-siem gừn tơmklăc-băl î găp; să-jăn gôjîng dơng î pran ayoa dơng trôh bơh Yang Tơm Trồ.

20Dilah oh mi rôh lŏ sŏng sơ̆t băl î Yang Dŏng-Klàs, tơlôh klàs bơh lơ̆gay gơnoăr bră dunya dê, gừn amơh lơh nơ̆m jơ ndăng hôm jîng nơ̆m dunya, oh mi rôh lơ̆ wăl duh bră nteàh lơ̆gay jơno gô dê: 21“Ơ̆ iyà, ơ̆ lièp, ơ̆ tơbi!” 22Rơ̆ la lơ̆gay gơnoăr bră mà jơh lơ̆gay kŭng bơlăm trôh jơno roh tơcoh tơm tô̆ kơñ ngui, jăt lơ̆gay jơno sơđah bơlăm î jơno bơtău tơngkah kon-mơnùs dê? 23Bulah tîgư̆n la jơno găy, bulah prăp bîng gôlơh gư̆ptî jăk-sai nơ̆m jơno pơđơ bơlăm dêh, băl î jơno niem lơbăn î gleh-glăr să-jăn dê, gừn ơ̆ tom jơno kwơ mang găy tơmdră wăl jơno ham-kơñ să-jăn dê.