Philip 4

1Tîrơ̆ gừn, ơ oh mi rôh lŏ kơñ-kơloh gư̆m kah sơdơ ăñ dê, jơno sơhờp-sờhơn î sơgơn ăñ jê, ơ oh mi rôh lŏ, ñă kơđư̆ng cĕ gư̆p tîgư̆n nơ̆m Yang.

2Ăñ bơtău tơngkah Ebôđi î bơtău tơngkah Sintikơ păl tom du nùs-kơlôi băl nơ̆m Yang. 3Nên-nôn ngăn lah, ăñ kŭng dăn amî, ơ cro bơyô don-tơpăt ngăn, dăn amî dŏng lơ̆gay cro-ua gư̆n, ƀòn gô sŏng kŏng sơòs-sơngeh băl î ăñ ma Jơno Niem, kŭng băl î Klemăng gư̆m lơ̆gay oh mi bơyô nde ăñ jê, mà sơnăn măt ƀòn gô dê ăm nơ̆m sră jơno jîng lờt.

4Hơn-sờ cĕ nơ̆m Yang miek miek. Ăñ rơp tơs wăl te: Hơn-sờ cĕ hă. 5Lơi cĕ lơ̆gay ma cro gư̆t jơno kŏng-ăt oh mi rôh lŏ dê. Yang sŏng mơñ en lờt. 6Bư̆ng kơlôi-rcăng bơh jơno găy, gôtơblơ̆ wăl, nơ̆m jơh lơ̆gay jơno, bơh î jơno hôi-dăn gư̆m răc-dăn băl î jơno ưnngai, lơi cĕ lơ̆gay jơno kơñ dăn oh mi rôh lŏ dê dî tơs sơđah ma Yang Tơm Trồ, 7gừn jơno lơngăp-lơnge Yang Tơm Trồ dê, la jơno yơng rlo jơh lơ̆gay jơno wơng gư̆t, rơp lăng jư nùs oh mi rôh lŏ î nùs kơlôi oh mi rôh lŏ dê nơ̆m Yang Dŏng-Klàs Jesu.

8Ma-ngkơi gư̆n, ơ oh mi rôh lŏ, dilah jơno găy la tơpăt-ngăn, dilah jơno găy màng-ryŭ; Dilah jơno găy tơpăt-durư̆ng, dilah jơno găy sang-ngơt, dilah jơno găy păl kơñ-kơloh, dilah jơno găy tom pơndrơ niem, dilah jơno găy lơbăn-niem gư̆m dilah jơno găy păl jong-rơ, gừn oh mi păl kơlôi trôh gô. 9Lơ̆gay jơno oh mi rôh lŏ sŏng bơtê gư̆t, sŏng dưñ dî, sŏng kơnău gư̆m sŏng tơmpơl bơh anẵu ăñ, gừn lơh-jăt cĕ lơ̆gay jơno gư̆n, gừn Yang Tơm Trồ lơngăp-lơnge rơp ăm băl î oh mi rôh lŏ.

10Ăñ dî nùs hơn-sờ ngăn nơ̆m Yang, tài bơh trôh dî jơ dô oh mi rôh lŏ kơlôi-rcăng wăl trôh ăñ, Tơs ngăn nơ̆m bră dô, oh mi rôh lŏ ờs sŏng kơlôi-rcăng trôh ăñ, mơya ơ̆ tom dî tŭ lơm pah lơi lơh. 11Gư̆n ơ̆-iyŏ la ăñ kơñ tơs bơh jơno kơñ ngui ăñ jê, bơh ăñ sŏng bơtê păl niem-nùs bulah ăñ ăm nơ̆m jơno găy. 12Ăñ gư̆m gư̆t jơno kơsòt-rƀah, gư̆m gư̆t dî jơno tơngkah-tơngkăñ. Kơp du-lăm jơno î lơ̆gay kơp bră găy, ăñ sŏng dî bơtê băl î jơ hơm-le gư̆m tơm jơ kŏng jơgloh, băl î jơ dî tơngkah gư̆m tơm jơ kŏng prŏi. 13Ăñ tăl pran lơh dî lơ̆gay jơno kơnơm bơh Bơtao bơtăl ma ăñ pran-kơdăng. 14Mơya, oh mi rôh lŏ sŏng lơh niem tơm tô̆ tơmpà băl jơno sơòs-sơngeh ăñ jê. 15Ơ oh mi rôh lŏ ƀòn dơng Philip, oh mi rôh lŏ kŭng gư̆t lah nơ̆m dơ̆ bơhsơm jơno niem dê, tơm tô̆ ăñ tơlôh bơh nơ̆m lơgơ Maseđoan, ơ̆ tom Hîh Jư̆m Goh găy tơmpà î ăñ nơ̆m bră dờp phăn ngui sa, sî nư̆ng du hôi oh mi rôh lŏ, 16bơh nơ̆m Tesalônika, oh mi rôh lŏ bea păy dơ̆ pơyoa jơno kơñ ngui ma ăñ. 17Rơ̆ ơ̆-iyŏ la ăñ kơp kơñ jôi jơno e gời, mà ăñ kơp kơñ jôi jơno công nha bơtăl tơngkah-tơngkăñ nơ̆m jơno pơnah dî kwơ oh mi rôh lŏ dê. 18Mơya ăñ ndăng dî wêl-tăl lơ̆gay jơno gư̆m tơngkah-tơngkăñ te; Ăñ sŏng dî wêl-tăl, tơm tô̆ dưñ bơh anẵu Eppaphôđik jơno e gời trôh bơh oh mi rôh lŏ, la mơñà ƀôhơ̆, la jơno ăn duh-khoai sŏng dî dưñ-lăñ, la jơno niem nùs Yang Tơm Trồ. 19Yang Tơm Trồ ăñ jê rơp hăư wêl-tăl lơ̆gay jơno kơñ ngui oh mi rôh lŏ jăt jơno kơnhơ̆p Kơnràñ dê nơ̆m jơno gơklŏ anẵu Yang Dŏng-Klàs Jesu. 20Dăn jơno gơklŏ gôtrê ma Yang Tơm Trồ, Bàp ƀòn mơ̆n, trôh dî miek miek ơ̆lơ̆ ơ̆lŭi. Amen.

21Dăn còp-să lơ̆gay cro sang-goh ngglăm Yang Dŏng-Klàs Jesu; Lơ̆gay oh mi ăm băl î ăñ còp-să oh mi rôh lŏ. 22Lơ̆gay cro sang-goh còp-să oh mi rôh lŏ, mà lai ngăn la tơmpôl cro gôtrê ma hîh nhă Sesa.

23Dăn jơno sơmah Yang dê la Yang Dŏng-Klàs Jesu ăm băl î hwîng-nùs oh mi rôh lŏ. Amen.