2 Timôthe 4

1Ăñ krañ-cê ƀăn tơngkah kon sơđàp măt Yang Tơm Trồ î Yang Dŏng-Klàs Jesu, Bơtao rơp cahrña cro jîng băl î cro sơ̆t, bơh jơno sơđah-să Kơnràñ î dà lơgơ Kơnràñ, lah: 2Tơs bơtău cĕ Jơno Yang; păl rcăng, bulah nơ̆m jơno bơtoah hala ơ̆ bơtoah; lơh-glài tơmal cĕ, ƀoah-đas, bơtău tơngkah bơh î lơ̆gay jơno kŏng-ăt î jơno ƀăn mơntău. 3Bơh rơp trôh tô̆ tơnge, tơm tô̆ cro ơ̆ kŏng dơi jơno ƀăn mơntău niem-lơhơn. Ala sơgư̆n, ƀòn gô rơp tơnggom ma sătan mơ̆n lơ̆gay cro bơtău jăt nùs ham-kơñ dêh sătan mơ̆n, lơh bơkah tua, 4sŏng gư̆n ơ̆ nư̆ng bră sêt wăl tua ơ̆ kơñ iet jơno tơpăt-ngăn, mà hôm tơmblăc iet lêh lơ̆gay bră gơlîng-gơlang. 5Mơya kon păl ang tơngoh nơ̆m lơ̆gay bră. Kŏng-ăt cĕ jơno gleh-glăr. Lơh cĕ bră lơh cro bơtău Jơno Niem. Lơh cĕ wêl-tăl gơnoăr bră kon dê.

6Hôm ăñ gừn ndăng kŏng tôh tơlơ̆p gư̆ptî jơno ăn duh-khoai lờt, î tô̆ tơnge sang rai ăñ dê mơn trôh en sŏng. 7Ăñ sŏng tơmlơh nơ̆m du jơno tơmlơh niem; ăñ sŏng toat sŏng jơno cơplŏk; ăñ sŏng jư kơđư̆ng jơno don. 8Jơ dô, sơgơn jơno tơpăt-durư̆ng sŏng ăn lơi lơs ma ăñ, rơ̆ la sơgơn mà Yang, Cro Kwăng Cahrña tơpăt-durư̆ng, rơp dờp e ma ăñ nơ̆m nge gư̆n, mà ơ̆ dî ăn lơi nư̆ng ma ăñ, mơya hôm e ma jơh lơ̆gay tơmpôl cro kơñ-kơloh jơno tơngtrôh Kơnràñ dê.

9Grat cĕ lơ̆gay pran lơi trôh ơm tơmtom ăñ, 10bơh Demas sŏng lơi căư ăñ, bơh gô ham-kơñ rai dô, gừn gô sŏng swà trôh nơ̆m Tesalônika. Kretsen sŏng swà nơ̆m Galati, Tit swà nơ̆m Dalmati. 11Hôm nư̆ng Luka ăm î ăñ. Ma-ngkơi jơ wă-rẵu Mak, bơlăm cĕ gô swà jăt î kon tài bơh gô dî kwơ ma ăñ nơ̆m gơnoăr bră. 12Ăñ sŏng pơđơ Ticikơ swà trôh nơ̆m Ephesô. 13Tơm tô̆ kon swà, iyà cĕ băl î ao răm mà ăñ ăn lơi nơ̆m anẵu Katpus nơ̆m ƀòn dơng Trôas, băl î nhẵư păng sră, lai ngăn la lơ̆gay sră kato.

14Tê cro rgê lơh kong, sơnăn la Aleksandrơ sŏng lơh bờk ăñ khăi ngăn. Yang rơp kla wăl gô jăt gư̆ptî lơ̆gay bră gô lơh, 15la cro mà kon kŭng păl kơhea, tài bơh gô jơh nùs tơmdră pran-kơdăng jơno bơtău ƀòn mơ̆n.

16Nơ̆m dơ̆ tơmpẵu sơm ăñ dê, ơ̆ tom cro găy ñă băl î ăñ, mơya lơ̆gay kơp cro kŭng lơi căư ăñ. Dăn glài gư̆n ơ̆ tôh wăl cŭngsî ƀòn gô. 17Mơya Yang sŏng ăm en ăñ î lơh ma ăñ pran-kơdăng, lơi bơh ăñ, bră tơs tơnggư̆t Jơno Niem dî lơh wêl-tăl, î jơh lơ̆gay lang bol bơdih kŭng digơlăn kơnău dî. Ăñ kŭng sŏng dî dŏng-tă bơh sơ kơndẵư klîh-phơ̆m. 18Yang rơp dŏng-tă ăñ klàs bơh sơ kơp bră bờk-mơsăk î rơp ăn lơi ăñ ma lơgơ Kơnràñ. Dăn jơno gơklŏ gôtrê ma Kơnràñ trôh dî miek miek ơ̆ lơ̆. Amen.

19Còp-să cĕ Prissil î Akwila, băl î lơ̆ hîh nhă Ônesiphôrus. 20Erastus ăm wăl nơ̆m Kôrintô, hôm Trôphim bơh kòp jê gư̆n-jîng ăñ ăn lơi wăl nơ̆m Miletus. 21Grat lơ̆ pran cĕ trôh lai nơ̆m kơnnhe lơngềt. Ơbulus, î Puden, Linus, Claudia, gư̆m lơ̆gay oh mi kŭng còp-să kon.

22Dăn Yang ăm î hwîng-nùs kon. Dăn jơno sơmah ăm î oh mi rôh lŏ.