Tit 1

1Pol, dê̆-gơna Yang Tơm Trồ î cro gơnoăr bơtău dơng Yang Dŏng-Klàs Jesu, bơh jơno don tơmpôl cro dî Yang Tơm Trồ săc-rwơh gư̆m wơng gư̆t jơno-tơpăt dî păl î nùs don kơ̆mbrit Yang, 2băl î jơno cang-kơnơm nên-nôn bơh jơno jîng miek miek mà Yang Tơm Trồ, Bơtao ơ̆ tơs blăc, sŏng hăư pơngon bơh lai lơ̆gay kơp rai. 3Mơya ñăm nơ̆m tô̆ tơnge, Kơnràñ sŏng e tơnggư̆t lai jơno Kơnràñ bơh bră tơs tơnggư̆t jơno niem mà ăñ sŏng dî jao phi jăt gơnoăr pơđơ Yang Tơm Trồ dê, Yang Dŏng-Klàs ƀòn mơ̆n dê. 4Pơyoa ma Tit, kon ngăn ăñ dê nơ̆m jơno don băl. Dăn jơno sơmah î jơno lơngăp-lơnge bơh Yang Tơm Trồ, la Bàp, î Yang Dŏng-Klàs Jesu, Yang Dŏng-Klàs ƀòn mơ̆n dê, trôh nơ̆m kon.

5Ăñ sŏng ăn wăl kon nơ̆m Kret bơh jơno rơndăp dô, rơ̆ la lơi kon digơlăn rơndăp tăp sên lơ̆gay bră hôm dahrăư lơh sŏng î pồ bơtao lơ̆gay cro kwăng kra nơ̆m kơp ƀòn dơng gư̆ptî ăñ sŏng sơđah ma kon — 6cro gư̆n păl ơ̆ tom anẵu găy ƀoah-đas dî, la bo-klo nư̆ng du hôi bo-ua, dî kon so don-tơpăt, ơ̆ kŏng yă glài bơh rai-jîng jăt nùs kơñ hala ală-alai. 7Bơh cro jư mpôl păl ơ̆ tom anẵu găy ƀoah-đas dî, gư̆ptî la cro ăt-bồ hîh Yang Tơm Trồ, ơ̆ pơnhừ-să, ơ̆ sơmao dôh nùs, ơ̆ jròt ñô alăk, ơ̆ tơm mơ̆n cŏk, î ơ̆ ham-hà, 8ala bơh gư̆n la păl wă-rẵu năc, kơñ-kơloh jơno niem, căk-cê, tơpăt-ngăn, sang-ngơt, gư̆t kơhea, 9jư kơđư̆ng jơno niem dî păl don iyŏ ngăn î jơno bơtău, lơi ma cro gư̆n dî gơnoăr-pran lơi gư̆m mơ̆ndơm-mơ̆nieng cro nde bơh î jơno ƀăn mơntău niem-lơhơn, gư̆m mhơ̆ bơtău cro tơmdră.

10Bơh tom khăi cro tơmdră, tơmpôl cro tơs jơno pơnhừ-să, î tơmpôl cro blăc-pơlum, lai ngăn la mađah tơmpôl cro koh kato. 11Bră păl lơh la khă ƀòn gô ăm-ƀơt dẵư. Ƀòn gô ndăng lơh sơlô̆ng-sơlăng jơh lơ̆gay hîh nhă, tơm jơ bơtău lơ̆gay jơno ơ̆ dî păl bơtău, tài bơh jơno công nha ƀasmôh ƀasmăt. 12Du hôi nơ̆m khà ƀòn gô, rơ̆ la lơ̆gay cro gơnoăr-hwơr sătan ƀòn gô, sŏng tơs lah: “Cro Kret la tơmpôl cro tơs blăc, lơ̆gay jơno puôn jư̆ng mơsăk, lơ̆gay klô̆ng hơm cơ-ăng alah-atà.” 13Jơno lơh cư̆ng dô la ngăn. Bơh jơno gư̆n, ƀoah-đas cĕ ƀòn gô dubă krañ-cê, lơi ƀòn gô digơlăn dî pran-kơdăng nơ̆m jơno don, 14ơ̆ ăn nùs kơlôi nơ̆m lơ̆gay bră ơ̆ tom ngăn cro Juđa hala jơno pơđơ bơlăm bơtău tơmpôl cro tơmdră wăl î jơno tơpăt-ngăn. 15Jơh lơ̆gay jơno sang lơhiê lêh ma tơmpôl cro găy sang lơhiê. Mơya gôtrê î cro sơmơ̆-sơmĭñ gư̆m ơ̆ don, gừn ơ̆ tom jơno găy sang lơhiê, mà băl î tơngoh gư̆m nùs-nhơ̆m ƀòn gô sŏng kŏng lơh gôjîng sơmơ̆-sơmĭñ. 16Ƀòn gô tơs ƀòn gô gư̆t Yang Tơm Trồ, mơya, nơ̆m bră lơh ƀòn gô dê, ƀòn gô khan lơi căư Kơnràñ, gôjîng dî păl sơmơ̆-sơmĭñ, ơ̆ don jơno, gư̆m ơ̆ dî păl î kơp bră niem-lơhơn găy.