2 Timôthe 3

1Mơya kon păl gư̆t jơno dô, rơ̆ la nơ̆m lơ̆gay nge lŭi-dơ̆t, rơp tơmtom tô̆ jơ gleh-glăr kălkê. 2Bơh cro rơp kơloh sătan, ham-hà jên-priè, tơngyeh să, pơnhừ-să, sơmăm tìs-glài î Yang Tơm Trồ, ơ̆ don dẵư mơi bàp, ơ̆ kah jơno e gời, ơ̆ sang-goh, 3ơ̆ dî jơno kơñ-kơloh, ơ̆ tơmrơm băl, ham tơs bờk, ơ̆ gư̆t kơhea, jañ mơsăk, ơ̆ kơloh jơno niem, 4blơ̆-dră, ơ̆ gư̆t kơlôi-kơ̆mbrit, bơcrì să, kơñ-kơloh jơno hơn-sờ dunya rlo kơñ-kơloh Yang Tơm Trồ, 5lơh pleh gư̆ptî môh măt don-duh, mơya khan lơi căư jơno gơnăp-gơnoăr jơno don-duh. Pleh wĭc cĕ lơ̆gay cro gư̆n.

6Bơh nhòng tơmpôl ƀòn gô la tơmpôl cro rlèt mơ̆t nơ̆m hîh cro, mơ̆ndơm lơ̆gay cro-ua wì-lơngôh, bîng-jut tồi-glài, kŏng pơlum bơh wêl-tăl jơno ham-kơñ, 7bơtê miek mà ơ̆ dơ̆ găy digơlăn swà trôh anẵu gư̆t wơng khăi jơno tơpăt-ngăn. 8Jannes î Jamber sŏng tơmdră Môise tîgay, gừn tơmpôl cro dô kŭng ndăng tơmdră jơno tơpăt-ngăn tîrơ̆, ƀòn gô la tơmpôl cro dî nùs-nhơ̆m roh-rùi la tơmpôl cro blăc blơ̆ gôtrê bơh jơno don. 9Mơya ƀòn gô rơp ơ̆ swà wĭc rlo dî, bơh jơno wì-lơngôh ƀòn gô rơp sơlôh gôjîng nê̆-năn sơđàp lơ̆gay cro, kŭng gư̆ptî jơno wì-lơngôh bea hê cro năy sŏng kơnău makin.

10Mơya kon sŏng jăt tơm-en jơno bơtău, jîng amơh, jơno tơnggumăy, jơno don, nùs kŏng-ăt, jơno kơñ-kơloh, jơno ăt-ăl ăñ dê, 11lơ̆gay jơno kơ̆p rôn-bơklơ̆n, lơ̆gay jơno gleh-glăr gư̆ptî sŏng tơngtrôh ma ăñ nơ̆m Antiôt, Ikôni î Listrơ, băl î lơ̆gay jơno kơ̆p-cơkhă mà ăñ păl kŏng. Gừn Yang sŏng dŏng-klàs ăñ bơh sơ lơ̆gay jơno gư̆n. 12Mà ngăn, lơ̆gay cro găy kơñ jîng dubă don-duh nơ̆m Yang Dŏng-Klàs Jesu kŭng rơp kŏng kơ̆p rôn-bơklơ̆n. 13Hôm cro bờk-mơsăk î cro blăc pơlum sŏng ơ̆-rgê rơp jîng ơ̆-rgê rlo te, tơs blăc cro î kŏng cro tơs blăc. 14Mơya, kon kư̆ ăm te cĕ nơ̆m lơ̆gay jơno mà kon sŏng bơtê î don ngăn, bơh gư̆t sătan mơ̆n sŏng bơtê lơ̆gay jơno gư̆n bơh sơ cro găy, 15gừn lah bơh jơ hôm kơmom, mê sŏng bơtê gư̆t Sră-Goh, digơlăn lơh kon jăk-sai lơi dî dŏng tơwai bơh jơno don nơ̆m Yang Jesu Krist.

16Du Sră-Goh la jơno khôm nhim Yang Tơm Trồ; î la jơno dî kwơ ma bră ƀăn mơntău, ƀoah-đas, mhơ̆ tơngniem, bơtău tơnggư̆t nơ̆m jơno tơpăt-durư̆ng, 17lơi cro Yang Tơm Trồ digơlăn gôjîng wêl-tăl, dî rcăng wêl-tăl ma lơ̆gay bră niem.