2 Timôthe 2

1Gư̆n-jîng, ơ kon ăñ, lơi cĕ sătan kon dî pran-kơdăng nơ̆m jơno sơmah anẵu Yang Dŏng-Klàs Jesu. 2Lơ̆gay jơno kon sŏng kơnău bơh anẵu ăñ nhòng khăi cro lơh cư̆ng, jao cĕ jơno gư̆n ma tơmpôl cro păl don nên-nôn mà ƀòn gô kŭng rơp dî jơno rgê lơi ƀăn mơntău cro nde. 3Kŏng gleh-glăr cĕ băl î ăñ, gư̆ptî du hôi cro lĭñ jăk Yang Dŏng-Klàs Jesu dê. 4Tơm tô̆ lơh lĭñ, ơ̆ cro găy lơi mơ̆n kŏng mơwăl lơ̆gay bră rai-jîng lang bol, lơi ma cro lĭñ gư̆n digơlăn lơh niem-nùs cro sŏng hôi-săc mơ̆n. 5Kŭng tîgư̆n, tơm tô̆ cro găy gư̆n mơ̆t nơ̆m jơno tơm-pơđoan, cro gư̆n rơp ơ̆ dî sơgơn pha-lĭn dilah ơ̆ tơm-pơđoan jăt jơno-bơlăm. 6Cro lơh bră miê jơdeh-jơdai păl dî dưñ-lăñ công nha lai ngăn. 7Kơlôi-sơnư̆ng cĕ jơno ăñ ndăng tơs, bơh Yang rơp dờp e ma kon jơno gư̆t wơng nơ̆m lơ̆gay bră.

8Kah sơdơ cĕ trôh Yang Dŏng-Klàs Jesu, sŏng dî lơh jîng wăl bơh anẵu sơ̆t, gôtrê nŏk-noi Dabit, jăt gư̆ptî Jơno Niem ăñ dê, 9bơh Jơno Niem gư̆n, ăñ kŏng gleh-glăr tien gơs kŏng căp gư̆ptî du hôi cro tìs-glài. Mơya, jơno tơs Yang Tơm Trồ gừn ơ̆ kŏng căp ờ. 10Gư̆n-jîng, ăñ kŏng-ăt lơ̆gay jơno bơh tơmpôl cro dî săc-rwơh, lơi ƀòn gô kŭng digơlăn dî jơno dŏng-klàs nơ̆m Yang Dŏng-Klàs Jesu, băl î jơno gơklŏ miek miek. 11Jơno dô la păl don nên-nôn:

“Bơh dilah ƀòn mơ̆n ngăn sŏng sơ̆t î Kơnràñ, gừn ƀòn mơ̆n kŭng rơp jîng î Kơnràñ.

12Dilah ƀòn mơ̆n kŏng-ăt dî, gừn ƀòn mơ̆n kŭng rơp ăt-bồ băl î Kơnràñ.

Dilah ƀòn mơ̆n khan lơi căư Kơnràñ, gừn Kơnràñ kŭng rơp khan lơi căư ƀòn mơ̆n.

13Dilah ƀòn mơ̆n ơ̆ don-tơpăt, gừn Kơnràñ kư̆ hôm lơh-jăt jơno hăư,

bơh Kơnràñ ơ̆-rgê khan dêh sătan mơ̆n.”

14Tơs tơngkah cĕ kon so Yang lơ̆gay jơno rơ̆, nơ̆m jơno ƀăn bơtău ƀòn gô sơđàp măt Yang Tơm Trồ lơi bư̆ng tơmbơkai bơh jơno cêh gơtha, bơh ơ̆ tom jơno kwơ găy, nư̆ng iyà trôh jơno tơngroh î cro kơnău. 15Lơh jơh lơ̆ nùs cĕ lơi sơđah să tơm kon gư̆ptî cro dî dưñ-lăñ sơđàp Yang Tơm Trồ, du hôi cro lơh bră ơ̆ ƀasmăt, tơs bơtău iyŏ ngăn jơno tơpăt-ngăn. 16Pơnah nde, pleh cĕ lơ̆gay jơno tơmbơyê dunya ơ̆ kwơ, bơh jơno gư̆n bơlăm trôh anẵu dơ̆t jrô rlo te nơ̆m jơno ơ̆ duh kơ̆mbrit, 17î jơno tơmbơyê tơmpôl ƀòn gư̆n rơp lơh tơlôh jơno lơh tơrãy gư̆ptî reh ja ƀô ôm, mà nhòng pơnah gư̆n la Himene î Philetus, 18tơmpôl cro sŏng swà tìs gôtrê bơh jơno tơpăt-ngăn, tơm tô̆ tơs lah jơno jîng wăl sŏng tơlôh lờt, î ƀòn gô ndăng lơh kơ̆mprah jơno don du khà cro. 19Mơya, mơnang bơkhê Yang Tơm Trồ kŭng hôm kơđư̆ng bơkhê tơm tô̆ dî jơno tăp ƀăng-kì dô: “Yang gư̆t cro găy gôtrê ma Kơnràñ” î “Cro găy hôi-dăn sơnăn Yang păl pleh wĭc bơh sơ jơno ơ̆ tơpăt-durư̆ng.”

20Pơnah nde, nơ̆m du-lăm hîh dơng, ơ̆ dî tom nư̆ng pŏk bơh î màh î priè, mà kŭng tom pŏk bơh î sî î ù kơnañ, du pơnah ngui ma bră ryŭ-ryơ̆m, mà du pơnah nde ăn lơi ma bră ơ̆ dơng mang. 21Gư̆n-jîng, dilah cro găy sŏng rao lơhiê mơ̆n bơh sơ lơ̆gay jơno gư̆n, gừn cro rơ̆ rơp la pŏk ăn lơi ma bră ryŭ-ryơ̆m, sŏng dî ăn lơi dêh, dî kwơ î Cro pơnhơm, dî rcăng lơs ma kơp bră niem.

22Toat wĭc cĕ bơh sơ lơ̆gay jơno ham-kơñ cro pơnu, mà tơte jăt jơno tơpăt-durư̆ng, jơno don, jơno kơñ-kơloh, băl î jơno tơmrơm î tơmpôl cro hôi-dăn Yang bơh î nùs-nhơ̆m sang lơhiê. 23Mơya khan lơi căư cĕ lơ̆gay jơno tơmbơkai wì-lơngôh î lula, bơh gư̆t lah jơno gư̆n lơh tơlôh nư̆ng jơno tơmbơkai. 24Cro duh bră Yang ơ̆ tơmbơkai, mơya păl lơh niem î lơ̆gay cro, dî jơno rgê ƀăn mơntău, ăt-ăl, 25nư̆ng tơs î tơmpôl cro tơmdră mơ̆n bơh î jơno niem-lơhơn, digơlăn Yang Tơm Trồ rơp e ma ƀòn gô nùs tơcao mbư̆ng glài lơi gư̆t wơng jơno-tơpăt niem, 26gừn ƀòn gô digơlăn ang tơngoh klàs bơh sơ brăm ƀai cà-ràk, ma-ngkơi jơ kŏng gô kơp tơng-gron lơi lơh-jăt nùs-kơñ gô.