2 Kôrintô 9

1Gôtrê bơh bră tơmdŏng lơ̆gay cro sang-goh, gừn dô la bră ơ̆ kă ăñ cêh sră pơyoa ma oh mi rôh lŏ. 2Bơh ăñ gư̆t jơno rcăng nùs oh mi rôh lŏ, la jơno mà ăñ ala măt oh mi rôh lŏ tơngyeh î lơ̆gay cro don nơ̆m Maseđoan, lah Hîh Jư̆m nơ̆m Acai sŏng rcăng bơh năm lai, î nùs ngăc-ngăr oh mi rôh lŏ sŏng hôi jà khăi cro nơ̆m ƀòn gô. 3Mơya ăñ sŏng pơđơ nhẵư hê oh mi nde năy swà, lơi jơno tơngyeh ƀòn hî dê bơh oh mi rôh lŏ ơ̆ gôjîng ơ̆ kwơ nơ̆m jơno dô, lơi ma oh mi rôh lŏ digơlăn rcăng gư̆ptî ăñ sŏng tơs. 4Bulah ơ̆, dilah nhẵư hê oh mi nơ̆m Maseđoan digơlăn swà băl ăñ î tơmpơl jơno hôm dahrăư rcăng anẵu oh mi rôh lŏ, gừn ƀòn hî kŏng ƀasmăt — rơ̆ la hôm dahrăư tơs trôh oh mi rôh lŏ — bơh jơno don kơnơm kơđư̆ng gư̆n ƀòn hî dê. 5Gư̆n-jîng ăñ kơlôi păl pơđơ khơñ lơ̆gay oh mi rơ̆ la bră păl lơh, lơi ma ƀòn gô digơlăn trôh sơđàp măt oh mi rôh lŏ î rcăng lai bơh khà phăn-ƀan mà oh mi rôh lŏ sŏng hăư, lơi dî jơno rcăng jăt bră gư̆n gư̆ptî du jơno lơnge, mà ơ̆-iyŏ gư̆ptî bră kŏng rôn-bơklơ̆n.

6Pơnah nde, ăñ tơs jơno dô: cro găy sêh êt dư̆ng găy gừn rơp koh êt dư̆ng rơ̆, gừn cro găy sêh nơ̆m kơp anẵu lơnge gừn rơp koh nơ̆m kơp anẵu lơnge. 7Kơp cro ăn cĕ jăt jơno mơ̆n sŏng lơh nên lai nơ̆m nùs, ơ̆-iyŏ tơlôh bơh jơno moat-jrum hala bơh kŏng rôn-bơklơ̆n, bơh Yang Tơm Trồ kơloh cro niem-nùs dờp gời. 8Hôm Yang Tơm Trồ dî gơnoăr lơh lơ̆gay jơno dờp gời tơngkah-tơngkăñ ma oh mi rôh lŏ, lơi nơ̆m lơ̆gay bră tăl miek lơ̆gay jơno kơñ ngui, oh mi rôh lŏ digơlăn lơh kơp bră niem dubă tơngkah-tơngkăñ. 9Gư̆ptî tom cêh lah:

“Cro tơmpà phăn-mơna mơ̆n, cro găy tơmpà ma cro kơsòt,

gừn jơno tơpăt-durư̆ng gô hôm wăl trôh dî miek miek.”

10Pơnah nde, Bơtao e gơ ma cro sêh î ƀăñ lơi lơh jơno sa rơp dờp e dubă tơngkah-tơngkăñ, rơp lơh gơ oh mi rôh lŏ gôjîng khăi hơt, î rơp lơh lơ̆gay ple-bơkao jơno tơpăt-durư̆ng oh mi rôh lŏ sơlơ khăi ngăn, 11tơm tô̆ dî tơngkah-tơngkăñ nơ̆m kơp jơno lơi jơh nùs lơh bră tơmpà, la jơno iyà trôh jơno ưnngai Yang Tơm Trồ kơnơm bơh ƀòn mơ̆n 12bơh jơno bră tơmdŏng dô ơ̆ nư̆ng la e bîng-tăl lơ̆gay jơno kơñ ngui lơ̆gay cro sang-goh, mà hôm lơh khăi cro ăn jơno ưnngai Yang Tơm Trồ, 13tơm tô̆ jơno jong-rơ Yang Tơm Trồ kơnơm bơh î cư̆ng-tang bră lơh dô jăt bơh jơno don jăt anẵu jơno tơs tơlôh oh mi rôh lŏ dê gôtrê bơh Jơno Niem Yang Dŏng-Klàs î jăt bơh nùs dơng ơnàng nơ̆m jơno dubă băl ăn lơi ma ƀòn gô î ma lơ̆gay cro, 14băl î nơ̆m jơno hôi-dăn ƀòn gô dê gôtrê bơh oh mi rôh lŏ, cang-kơnơm dî tơmtom măt oh mi bơh jơno sơmah dơng Yang Tơm Trồ cŭngsî oh mi rôh lŏ. 15Dăn jơno ưnngai dî ăn ma Yang Tơm Trồ bơh jơno e gời ơ̆ gư̆t lơ̆ Kơnràñ dê!