2 Kôrintô 10

1Să tơm ăñ, Pol — la cro bulah lơbăn-lơñô tơm tô̆ tơmtom măt nơ̆m nhòng oh mi rôh lŏ, mơya khơ̆n-sa wăl tơm tô̆ oh mi rôh lŏ ơ̆ tom măt, răc-dăn oh mi rôh lŏ bơh î jơno lơbăn-niem î niem-lơhơn Yang Dŏng-Klàs dê. 2Ăñ răc-dăn lah tơm tô̆ tơmtom măt, gừn ăñ rơp ơ̆ kă khơ̆n-sa bơh jơno lơh nên mà ăñ ndăng kơlôi la păl lơh pran-kơdăng tơmdră î nhẵư hê cro kơlôi lah ƀòn hî gôlơh gư̆ptî ndăng lơbà swà jăt đah poăc-să. 3Bơh bulah jîng nơ̆m poăc-să, mơya ƀòn hî ơ̆ tơmlơh jăt đah poăc-să. 4Bơh lơ̆gay jơno ngui tơmlơh ƀòn hî dê ơ̆-iyŏ la poăc-să, mà la gơnăp-gơnoăr nơ̆m Yang Tơm Trồ ăn lơi ma bră tơngroh lơ̆gay đôn-lĭñ, lơh tơlah lơ̆gay jơno kơlôi bơyê, 5băl î lơ̆gay jơno tơngyơng să rơndôh ñă tơmdră wăl jơno gư̆t wơng Yang Tơm Trồ, î kơ̆p jư lơ̆gay jơno kơlôi-sơnư̆ng păl don jăt Yang Dŏng-Klàs; 6tơm tô̆ jơno don jăt oh mi rôh lŏ sŏng wêl-tăl lờt, gừn ƀòn hî dî nùs rcăng lơh-glài tơmal lơ̆gay jơno lơh ơ̆ don jăt.

7Oh mi rôh lŏ ndăng lăng jơno bră đah makin. Dilah cro găy don ngăn anẵu sătan lah mơ̆n gôtrê mađah Yang Dŏng-Klàs, gừn cro rơ̆ păl lăng swì wăl jơno dô bơh să tơm mơ̆n, lah: cro gư̆n gôtrê ma Yang Dŏng-Klàs mơmơh tîgay, gừn ƀòn hî kŭng tîrơ̆. 8Bơh tien gơs dilah ăñ tom tơngyeh jơno găy rlo khăi bơh gơnoăr bră mơ̆n, la gơnoăr bră Yang sŏng e ăn lơi ma bră băt-tơngñă mà ơ̆-iyŏ ma bră lơh rlăm oh mi rôh lŏ, gừn ăñ rơp ơ̆ ƀasmăt, 9lơi ăñ ơ̆ gôlơh gư̆ptî lơh oh mi rôh lŏ kơ̆mbrit-kơ̆mbròt bơh î sră pơyoa mơ̆n dê. 10Tài bơh tom cro tơs lah: “Bulah nhẵư sră pơyoa ông dê kơjơ̆-kơjùt î pran-kơdăng, mơya tơm tô̆ tom măt î să-jăn nơ̆m dô gừn lơbăn-lơñô, gư̆m jơno tơs ơ̆ tơlôh jơno găy” 11Cro tîgư̆n păl wơng lah jơno ƀòn hî cêh nhòng sră pơyoa tơm tô̆ ơ̆ tom măt tîgay, gừn ƀòn hî kŭng rơp gư̆p tîgư̆n tơm tô̆ tom măt.

12Bơh ƀòn hî ơ̆ khơ̆n lơh dubă băl hala sơntu dêh sătan ƀòn hî î du pơnah cro yeh dêh să mơ̆n. Mơya lơ̆gay cro gư̆n, tơm tô̆ tău dơnău ƀòn gô nơ̆m anẵu ƀòn gô, î sơntu dêh mơ̆n î sătan mơ̆n gừn ơ̆ gư̆t wơng jơno găy ờ. 13Tơblơ̆ wăl, ƀòn hî rơp ơ̆ tơngyeh bơh lơ̆gay jơno găy rlo ma pran mơya la jăt jơno sơnoa-rnoas nơ̆m jơno mà Yang Tơm Trồ sŏng tơmpà ma ƀòn hî, du jơno sơnoa-rnoas prai sŏng ơnàng trôh nơ̆m anẵu oh mi rôh lŏ. 14Bơh ƀòn hî ơ̆-iyŏ ndăng sơlèt rlo gơnoăr, gư̆ptî ƀòn hî hôm dahrăư dơ̆ găy trôh î oh mi rôh lŏ, bơh tien gơs, ƀòn hî sŏng swà lai trôh anẵu oh mi rôh lŏ î Jơno Niem Yang Dŏng-Klàs dê, 15bư̆ng tơngyeh bơh lơ̆gay jơno găy rlo ma pran nơ̆m anẵu kơp bră lơh gleh-glăr tơmpôl cro nde, mơya bơh dî jơno cang kơnơm anẵu oh mi rôh lŏ, tơm tô̆ jơno don oh mi rôh lŏ dî bơtăl te, lơi lơ̆gay bră lơh gleh-glăr jăt jơno ƀòn hî dê dî pẵư ơnàng trôh dî tơngkah-tơngkăñ, 16lơi tơs bơtău Jơno Niem nơ̆m lơ̆gay anẵu wĭc ngăn oh mi rôh lŏ — ơ̆ kă tơngyeh bơh lơ̆gay jơno găy sŏng lơh nơ̆m anẵu cro nde.

17“Mơya cro găy tơngyeh sătan, tơngyeh cĕ sătan nơ̆m Yang.”

18Bơh ơ̆-iyŏ cro mơnê dêh să tơm mơ̆n dî dưñ, mơya la cro mà Yang mơnê.