2 Kôrintô 11

1Ăñ kơp kơñ oh mi rôh lŏ kŏng-ăt du êt jơno wì-lơngôh ăñ jê, mơya oh mi rôh lŏ jơ dô ndăng kŏng-ăt ăñ! 2Bơh ăñ ngañ tơcao bơh oh mi rôh lŏ, î nùs ngañ Yang Tơm Trồ dê, tài bơh ăñ sŏng tơmhòp oh mi rôh lŏ ma du hôi bo-klo, sơđah oh mi rôh lŏ gư̆ptî du hôi cro ua-drôh sang-goh ma Yang Dŏng-Klàs. 3Mơya ăñ kơ̆mbrit lah jăt jơno dô-dă, gư̆ptî beh sŏng pơlum Eba bơh î jơno lăc-leo gô dê, gừn nùs-nhơ̆m oh mi rôh lŏ digơlăn kŏng pơlum ăm wĭc jơno tơpăt-ngăn î jơno sang-goh nơ̆m Yang Dŏng-Klàs. 4Bơh dilah tom cro găy trôh tơs tơnggư̆t du hôi Jesu pha mà ƀòn hî sŏng ơ̆ tơs bơtău, hala oh mi rôh lŏ dưñ dî du-lăm hwîng pha, ơ̆-iyŏ Bơtao oh mi rôh lŏ sŏng dưñ-lăñ, hala du-lăm Jơno Niem pha mà oh mi rôh lŏ sŏng ơ̆ dưñ-lăñ, gừn oh mi rôh lŏ kŭng păl kŏng-ăt!

5Hôm ăñ kơlôi mơ̆n ơ̆ gơhuc î lơ̆gay “cro gơnoăr bơtău dơng” năy. 6Mơya, tien gơs, bulah ăñ ơ̆ dî bơtê bơh jơno bơtău tơs, mơya ơ̆-iyŏ ăñ ơ̆ dî bơtê bơh jơno gư̆t jăk. Bơh kơp jơno î nơ̆m lơ̆gay bră lơh, ƀòn hî kŭng e oh mi rôh lŏ tơmpơl loh-lang tîgư̆n. 7Hala iyŏ ngăn la ăñ tìs-glài tơm tô̆ tơng-êt să mơ̆n nteàh lơi oh mi rôh lŏ digơlăn dî tơngyơng, tài bơh ăñ sŏng bơtău tơs Jơno Niem Yang Tơm Trồ gời ma oh mi rôh lŏ? 8Ăñ sŏng dưñ jên tơnge lơ̆gay Hîh Jư̆m Goh nde, tơm tô̆ sŏng dưñ jơno tơmdŏng ƀòn gô, lơi ăn lơi ma jơno duh bră oh mi rôh lŏ. 9Tơm tô̆ ăm î oh mi rôh lŏ, bulah kŏng prŏi, ăñ sŏng ơ̆ lơh tơng-añ kơjơ̆ ma kơp cro găy. Bơh tơm tô̆ trôh nơ̆m dô, oh mi bơh Maseđoan sŏng rcăng e lơ̆ jơno kơñ ngui ăñ dê, gừn nơ̆m kơp bră, ăñ sŏng prăp jư lơi să tơm mơ̆n ơ̆ tơng-añ kơjơ̆ ma oh mi rôh lŏ. 10Jơno tơpăt-ngăn Yang Dŏng-Klàs dê ăm nơ̆m ăñ, gư̆n-jîng ơ̆ cro găy cơkhă dî jơno ăñ tơngyeh dô nơ̆m lơ̆gay ƀòn êt nơ̆m Acai. 11Bơh jơno găy? Bơh ăñ ơ̆ kơñ-kơloh oh mi rôh lŏ ya? Yang Tơm Trồ gư̆t ăñ dî.

12Hôm jơno ăñ ndăng lơh, gư̆n ăñ kŭng rơp lơh te, lơi ăñ digơlăn tă mơ̆nde tô̆ lơwah lơ̆gay cro kơñ dî tô̆ lơwah dî lăng la durư̆ng băl î ƀòn hî nơ̆m lơ̆gay bră ƀòn gô hôm tơngyeh. 13Bơh lơ̆gay cro tîgư̆n la cro gơnoăr bơtău ma blăc, tơm tô̆ lơh bră blăc pơlum lơh bleh gôjîng cro gơnoăr bơtău Yang Dŏng-Klàs. 14Jơno gư̆n ơ̆ phadêh-phadai du êt găy, bơh să tơm cà Satan kŭng pơlum lơh bleh gôjîng cro gơndrơh jơno ang. 15Gư̆n-jîng ơ̆ tom jơno găy hal-apàl dilah cro dê̆-gơna gô kŭng pơlum să lơh gư̆ptî cro dŏng bră jơno tơpăt-durư̆ng. Lŭi-dơ̆t ƀòn gô rơp tơlôh jăt bơh bră ƀòn gô lơh.

16Ăñ dăn tơs du dơ̆ te: Bư̆ng cro găy kơlôi la ăñ wì-lơngôh. Hôm dilah ơ̆, gừn kŭng dưñ cĕ ăñ gư̆ptî cro wì-lơngôh, lơi ăñ kŭng digơlăn tơngyeh du êt. 17Jơno ăñ mơñ tơs î jơno khơ̆n-sa tơngyeh dô, gừn ơ̆-iyŏ ăñ tơs jăt nùs-kơñ Yang, mơya gư̆ptî du hôi cro wì-lơngôh. 18Tài bơh khăi cro tơngyeh să jăt đah poăc-să, gư̆n-jîng ăñ kŭng rơp tơngyeh să. 19Bulah la lơ̆gay cro jăk-sai, mơya oh mi rôh lŏ ndăng sơhờp-sờhơn kŏng-ăt lơ̆gay cro wì-lơngôh toh tò! 20Bơh dilah cro găy kơ̆p oh mi rôh lŏ lơh cro dê̆, cro lon sa oh mi, cro kơ̆p pơlum oh mi, cro bơcrì să, cro pah nơ̆m môh măt oh mi, gừn oh mi rôh lŏ kŭng kŏng-ăt. 21Ăñ tơs jăt jơno ƀasmăt, gôlơh gư̆ptî la să tơm ƀòn hî sŏng lơbăn-lơñô. Mơya, dilah tom cro găy digơlăn khơ̆n tơngyeh bơh du-lăm jơno găy gư̆n — ăñ ndăng tơs nơ̆m jơno wì-lơngôh — ăñ kŭng khơ̆n tơngyeh tîgư̆n. 22Ƀòn gô la cro Heƀrơ? Ăñ kŭng tîgư̆n. Ƀòn gô la cro Israel? Ăñ kŭng tîgư̆n. Ƀòn gô la kon so Abraham? Ăñ kŭng tîrơ̆. 23Ƀòn gô la cro dê̆-gơna Yang Dŏng-Klàs? (Ăñ tơs gôlơh gư̆ptî ăñ roh jơno kơlôi) Ăñ hôm rlo tîgư̆n te — bơh ăñ tien gơs kŏng sơòs-sơngeh rlo, kŏng kơ̆p jam khăi rlo, kŏng pư̆ng lơh khăi ngăn, khăi dơ̆ mơñ thô sơ̆t. 24Prăm dơ̆ ăñ kŏng bơh cro Juđa pơng lơh prŏi du phàk tăl puôn-jư̆t. 25Păy dơ̆ ăñ kŏng cro pơng î mư̆ng. Du dơ̆ ăñ kŏng cro kơdang lô̆. Păy dơ̆ ăñ kŏng krăm ahẵu. Ăñ sŏng ăm du-nge du măng anẵu dàlîng jrô; 26khăi dơ̆ ăñ swà nơ̆m gung, tơmtom jơno sơ̆t-roh nơ̆m dà măy, sơ̆t-roh î mpôl cro kơntô̆ng, sơ̆t-roh î lang bol mơ̆n, sơ̆t-roh î lang bol bơdih, sơ̆t-roh nơ̆m lơ̆gay ƀòn dơng, sơ̆t-roh anẵu ƀlang-càs, sơ̆t-roh nơ̆m dàlîng, sơ̆t-roh î oh mi ma blăc. 27Ăñ sŏng lơh bră sơòs-sơngeh î kŏng gleh-glăr, khăi măng ơ̆ bĭc dî, kŏng jơgloh î tơhiê, kŏng-ăt sa kơp dơ̆, kŏng lơngềt î ơ̆ dî jơno cù; 28Rlo bơh lơ̆gay jơno nde, kơp nge ăñ kŭng kŏng rôn-bơklơ̆n bơh kơlôi-sơnư̆ng bơh lơ̆gay Hîh Jư̆m Goh. 29Tom cro găy lơbăn-lơñô mà ăñ ơ̆ lơbăn-lơñô? Tom cro găy kŏng sơmăm tìs mà ăñ ơ̆ gư̆ptî su oềs sa?

30Dilah păl tơngyeh să, gừn ăñ rơp tơngyeh bơh jơno e tơmpơl jơno lơbăn-lơñô ăñ dê. 31Yang Tơm Trồ, Bàp Yang Jesu dê, Bơtao păl jong-rơ trôh dî miek miek, gư̆t lah ăñ ơ̆ tơs blăc! 32Nơ̆m Damas, cro kwăng ăt-bồ dơng nteàh gơnoăr bơtao Aretas ăm kăl ƀòn dơng Damas lơi kơ̆p-cơkhă ăñ. 33Mơya tom cro sŏng tơngduh ăñ nơ̆m bai bơh tî mpông pơ̆t cŭngsî piê ƀòn dơng, î ăñ dî klàs bơh tê gô.