2 Kôrintô 8

1Ơ oh mi rôh lŏ, ƀòn hî sơđah ma oh mi rôh lŏ gư̆t bơh jơno sơmah Yang Tơm Trồ dê sŏng dî dờp e ma nhòng tơmpôl Hîh Jư̆m Goh gôtrê mađah Maseđoan, 2rơ̆ la nơ̆m jơno têl lòng kơjơ̆-kơjùt jơno rŭng-rai dê, jơno sơhờp tơngkah-tơngkăñ ƀòn gô dê î jơno kơsòt-rƀah dơng ngăn ƀòn gô dê sŏng tôh bîng jîng jơno kơnhơ̆p-mơ̆nda nơ̆m nùs dơng ơnàng ƀòn gô dê. 3Bơh ăñ lơh cư̆ng lah ƀòn gô sŏng ăn jăt dơnău, tai bơh nùs tua ăn să jăt pran, tien gơs rlo lơ̆ pran bră gô dê, 4băl î khăi jơno răc-dăn, tơm tô̆ pơjô̆ ƀòn hî lơi dî jơno e gời î jơno pơnah băl nơ̆m bră lơh duh bră dô ăn lơi ma lơ̆gay cro sang-goh. 5Gừn ơ̆ jăt lơ̆gay jơno ƀòn hî sŏng cang-kơnơm, mơya lai ngăn, ƀòn gô sŏng ăn să tơm mơ̆n ma Yang, sŏng ma ƀòn hî, kơnơm bơh nùs-kơñ Yang Tơm Trồ. 6Jăt tîrơ̆ gư̆n, ƀòn hî bơtău tơngkah Tit, lơi gô sŏng sơntơm lơh mơmơh, gừn gư̆ptî rơ̆, gô kŭng digơlăn lơh sŏng bră niem rơ̆ ma oh mi rôh lŏ tîgư̆n. 7Mơya, gư̆ptî oh mi rôh lŏ jăk rlo bơh lơ̆gay jơno, bơh jơno don, jơno tơs, jơno gư̆t wơng, nùs ngăc-ngăr, î jơno kơñ-kơloh bơh anẵu ƀòn hî ăm nơ̆m oh mi rôh lŏ, — lơi e oh mi rôh lŏ kŭng păl jăk rlo nơ̆m bră lơh niem dô te. 8Ơ̆-iyŏ ăñ tơs jăt jơno gơnoăr pơđơ, mơya la bơh nùs ngăc-ngăr tơmpôl cro nde, lơh cư̆ng wăl jơno tơpăt-ngăn gôtrê bơh jơno kơñ-kơloh oh mi rôh lŏ. 9Bơh oh mi rôh lŏ đăl gư̆t jơno sơmah Yang ƀòn mơ̆n, la Yang Dŏng-Klàs Jesu, rơ̆ la tài bơh oh mi rôh lŏ, bulah kơnhơ̆p-mơ̆nda, Kơnràñ gôjîng kơsòt, lơi kơnơm bơh jơno kơsòt-rƀah Bơtao gư̆n, oh mi rôh lŏ dî gôjîng kơnhơ̆p-mơ̆nda.

10Gư̆n-jîng ăñ e jơno bơyê băl gôtrê bơh jơno dô, bơh jơno dô iyà wăl jơno kwơ ma oh mi rôh lŏ, la tơmpôl cro ơ̆ nư̆ng sî sơntơm lơh jơno dô bơh du năm lai, mà hôm kơp kơñ lơh te. 11Hôm jơ dô, oh mi rôh lŏ kŭng lơh tơngsŏng cĕ bră lơh sŏng sơntơm lơh, lơi jơno kơp kơñ oh mi rôh lŏ rcăng tîgay, gừn kŭng lơh wêl-tăl tîrơ̆, jăt bơh lơ̆gay jơno mơ̆n dî. 12Bơh dilah jơno rcăng nùs tom lai lờt, gừn dî niem-nùs jăt jơno mơ̆n dî, ơ̆-iyŏ jăt jơno mà mơ̆n ơ̆ dî.

13Ngăn, ơ̆-iyŏ lơi cro nde dî lơnge, hôm oh mi gừn kŏng añ-kơjơ̆, mơya dô la jơno tơpăt-durư̆ng. 14Mơ̆t tô̆ tơnge jơ dô, jơno tơngkah-tơngkăñ oh mi rôh lŏ rơp dŏng jơno kơnơm ƀòn gô, lơi jơno tơngkah-tơngkăñ ƀòn gô kŭng digơlăn dŏng jơno kơnơm oh mi rôh lŏ, lơi dî jơno tơpăt-durư̆ng, 15gư̆ptî sŏng cêh lah:

“Cro dî khăi ơ̆ tơngkah-tơngkăñ,

cro dî êt kŭng ơ̆ prŏi.”

16Mơya ưnngai Yang Tơm Trồ, Bơtao ăn băl du jơno ngăc-ngăr gôtrê bơh oh mi rôh lŏ nơ̆m nùs Tit. 17Bơh gô bulah la sŏng dưñ-lăñ jơno ăñ răc-dăn ƀòn hî dê, mơya bơh dî nùs ngăc-ngăr ngăn, gô sŏng lơh nên trôh còp oh mi rôh lŏ. 18Pơnah nde, ƀòn hî sŏng pơđơ du hôi cro oh mi swà băl î gô, mà dẵư mơnê cro dô nơ̆m Jơno Niem lam jơh lơ̆gay kơp Hîh Jư̆m Goh; 19mà ơ̆ dî nư̆ng tîgư̆n, mơya gô kŭng dî lơ̆gay Hîh Jư̆m Goh săc-rwơh lơi swà băl î ƀòn hî lơh bră niem î ƀòn hî ndăng duh bră bơh jơno gơklŏ Yang dê, î lơi e tơmpơl jơno rcăng ƀòn hî dê. 20Ƀòn hî kơhea tîgư̆n, lơi ơ̆ cro găy kơ̆p glài dî ƀòn hî bơh jơno ƀòn hî ăm lăng khà phăn-ƀan khăi dô. 21Bơh ƀòn hî lăng swì lai gôtrê bơh jơno niem, ơ̆ nư̆ng sî sơđàp măt Yang, mà gư̆m sơđàp măt cro nde.

22Ơ̆ nư̆ng dî tîgư̆n, Ƀòn hî sŏng pơđơ du hôi cro oh mi ƀòn hî swà băl î gô, rơ̆ la cro mà ƀòn hî sŏng lòng nơ̆m khăi bră î ờs tơmpơl nùs ngăc-ngăr ngăn, mà jơ dô gô kŭng ngăc-ngăr rlo te kơnơm bơh nùs don kơnơm ngăn bơh oh mi rôh lŏ. 23Dilah la bơh Tit, gô la cro swà băl ăñ jê, kŭng la cro lơh bră băl gôtrê î oh mi rôh lŏ. Dilah la đah oh mi năy ƀòn hî dê, ƀòn gô la tơmpôl cro kŏng pơđơ swà bơh lơ̆gay Hîh Jư̆m Goh, la jơno gơklŏ Yang Dŏng-Klàs. 24Bơh gư̆n, sơđàp lơ̆gay Hîh Jư̆m Goh, e cĕ ƀòn gô tơmpơl cư̆ng-tang jơno kơñ-kơloh oh mi rôh lŏ, î jơno tơngyeh ƀòn hî dê bơh oh mi rôh lŏ la iyŏ ngăn.