2 Kôrintô 7

1Gư̆n-jîng, ơ oh mi rôh lŏ kơñ-kơloh, bơh dưñ-lăñ lơ̆gay jơno hăư rơ̆, ƀòn mơ̆n lơh lơhiê cĕ să tơm mơ̆n bơh sơ lơ̆gay jơno sơmơ̆-sơmĭñ să-jăn băl î hwîng-nùs, tơm tô̆ jơno sang-goh lơh wêl-tăl nơ̆m jơno duh kơ̆mbrit Yang Tơm Trồ.

2Ăn lơi cĕ anẵu ăm ma ƀòn hî! Ƀòn hî hôm dahrăư kơ̆p rôn-bơklơ̆n du hôi cro găy; ƀòn hî hôm dahrăư lơh bờk-mơsăk du hôi cro găy; ƀòn hî hôm dahrăư pơlum du hôi cro găy. 3Ăñ ơ̆ tơs lơi blăc trôh bră kơ̆p glài oh mi rôh lŏ; bơh ăñ sŏng tơs lai lah oh mi rôh lŏ ăm nơ̆m nùs ƀòn hî, lơi sơ̆t băl î găp î jîng băl î găp. 4Jơno don kơnơm ăñ anẵu oh mi gừn khăi, jơno yeh să niem ăñ bơh oh mi rôh lŏ gừn dơng. Ăñ sŏng dî bîng-jut jơno mơ̆ndơm-mơ̆nieng. Ăñ kŭng bîng jơno sơhờp-sờhơn dô nơ̆m lơ̆gay jơno rŭng-rai ƀòn hî dê.

5Bơh ƀăt ma-ngkơi jơ să tơm ăñ swà trôh nơ̆m Maseđoan, să-jăn ƀòn hî sŏng ơ̆ dî ăm bơdê dư̆ng-iè găy, mơya kŏng gleh-glăr nơ̆m wêl-tăl kơp jơno — khăi jơno tơmlơh-tơmpìt đah makin, bîng jơno kơlôi-kơ̆mbrit đah nhòng. 6Mơya Yang Tơm Trồ, Bơtao mơ̆ndơm-mơ̆nieng tơmpôl cro găy tơblơ̆ nùs, sŏng mơ̆ndơm-mơ̆nieng ƀòn hî bơh î bră Tit trôh nơ̆m dô, 7mà ơ̆ dî nư̆ng bơh bră gô trôh nơ̆m dô, mơya kŭng bơh jơno mơ̆ndơm-mơ̆nieng mà gô sŏng dî jơno mơ̆ndơm bơh anẵu oh mi rôh lŏ, tơm tô̆ tơs wăl ma ƀòn hî bơh nùs kơp kơñ oh mi rôh lŏ dê, jơno moat-jrum oh mi rôh lŏ, jơno ngăc-ngăr oh mi rôh lŏ dê tài bơh ăñ, tien gơs lơh ăñ sơhờp-sờhơn rlo te. 8Bơh tien gơs dilah ăñ lơh ma oh mi rôh lŏ moat-jrum nơ̆m sră cêh pơyoa, gừn ăñ ơ̆ pơle ờ. Tien gơs dilah ăñ ờs tom pơle (ăñ tơmpơl lah sră cêh pơyoa gư̆n sŏng lơh oh mi rôh lŏ moat-jrum, bulah nư̆ng nơ̆m du êt jơ), 9gừn jơ dô, ăñ sơhờp-sờhơn, ơ̆-iyŏ bơh oh mi rôh lŏ sŏng moat-jrum, mơya bơh jơno moat-jrum sŏng lơh oh mi rôh lŏ trôh jơno tơcao mbư̆ng glài cĕ. Bơh oh mi rôh lŏ sŏng moat-jrum jăt nùs-kơñ Yang Tơm Trồ, lơi ma oh mi rôh lŏ digơlăn ơ̆ kŏng roh nơ̆m jơno găy bơh anẵu ƀòn hî. 10Bơh jơno moat-jrum jăt nùs-kơñ Yang Tơm Trồ lơh jîng jơno tơcao mbư̆ng glài gừn lơi trôh jơno dŏng-klàs mơ ơ̆ gư̆t pơle. Mơya nùs moat-jrum dunya dê gừn iyà wăl jơno sơ̆t. 11Bơh lăng năy, băl î jơno bră gư̆n, tơm tô̆ dî lơh jîng moat-jrum jăt nùs-kơñ Yang Tơm Trồ, gừn sŏng iyà wăl nơ̆m oh mi rôh lŏ nùs ngăc-ngăr khăi gư̆t nhẵư; hôm dî jơno tơmpẵu tơlôh amơh, jơno tơcao nùs tơlôh amơh, jơno kơ̆mbrit tơlôh amơh, nùs cang kơnơm tơlôh amơh, nùs lơbăn-lơñô tơlôh amơh, bră lơh glài tơlôh amơh! Nơ̆m kơp jơno oh mi rôh lŏ sŏng cư̆ng tang sătan mơ̆n la ơ̆ tom glài nơ̆m jơno bră dô. 12Gư̆n-jîng, tien gơs bulah ăñ sŏng cêh sră ma oh mi rôh lŏ, gừn ơ̆-iyŏ tài bơh gô sŏng jơno tìs sơloah, hala tài bơh gô sŏng kŏng lơh bờk, mơya la tài bơh nùs ngăc-ngăr oh mi rôh lŏ dê, rơ̆ la jơno ala măt ƀòn hî, sŏng dî e tơmpơl ma oh mi rôh lŏ sơđàp măt Yang Tơm Trồ. 13Kơnơm bơh jơno dô, ƀòn hî sŏng dî mơ̆ndơm-mơ̆nieng. Pơnah nde, gôtrê î jơno mơ̆ndơm-mơ̆nieng sătan mơ̆n dê, ƀòn hî sŏng sơlơ dî sơhờp-sờhơn rlo te anẵu nùs sơhờp Tit dê, bơh hwîng-nùs gô dê sŏng dî lơh jîng mhăy kơnơm bơh lơ̆gay oh mi rôh lŏ. 14Bơh dilah ăñ tom tơngyeh jơno găy î gô gôtrê bơh oh mi rôh lŏ, gừn ăñ sŏng ơ̆ ƀasmăt, mơya gư̆ptî kơp jơno ƀòn hî sŏng tơs î oh mi rôh lŏ nơ̆m jơno tơpăt-ngăn, gừn jơno tơngyeh ƀòn hî dê kŭng sŏng dî sơđah dubă iyŏ ngăn tîgư̆n gôtrê î Tit. 15Î nùs kơñ-kơloh gô dê ăn lơi ma oh mi rôh lŏ gừn tơngkah-tơngkăñ rlo te, tơm tô̆ sơdơ wăl jơno don dẵư lơ̆gay oh mi rôh lŏ, mơmơh tîgay mà oh mi rôh lŏ sŏng wă-rẵu gô î jơno kơ̆mbrit-kơ̆mbròt gư̆m ntơ-să. 16Ăñ sơhờp-sờhơn tài bơh ăñ don kơnơm anẵu oh mi rôh lŏ nơ̆m lơ̆gay bră.