2 Kôrintô 6

1Pơnah nde, tơm tô̆ ndăng lơh bră băl î Kơnràñ, ƀòn hî kŭng răc-dăn oh mi rôh lŏ bư̆ng dưñ jơno sơmah Yang Tơm Trồ dubă ơ̆ kwơ — 2bơh Kơnràñ tơs lah:

“Nơ̆m jơ niem-lơhơn, ăñ sŏng iet kơnău lơi kla wăl dẵư kon,

gừn nơ̆m nge dŏng-klàs, ăñ sŏng tơmdŏng kon.”

Tò, jơ dô la jơ niem-lơhơn; Tò, jơ dô la nge dŏng-klàs. —

3Bơh î bră bư̆ng lơh sơmăm tìs nơ̆m lơ̆gay jơno găy, lơi gơnoăr bră ƀòn hî dê ơ̆ kŏng cro tơs bờk, 4ala sơgư̆n, nơ̆m lơ̆gay jơno, ƀòn hî e tơmpơl să tơm mơ̆n gư̆ptî lơ̆gay cro dê̆-gơna Yang Tơm Trồ: nơ̆m jơno ăt-ăl dơng rlo, nơ̆m khăi jơno rŭng-rai, nơ̆m khăi jơno gleh-glăr, nơ̆m jơno sơòs-sơngeh, 5nơ̆m lơ̆gay mư̆ng pơng, nơ̆m anẵu kŏng kơ̆p jam, nơ̆m jơno sơlô̆ng-sơlăng, nơ̆m jơno lơh sơòs-sơngeh, nơ̆m lơ̆gay brê tơmăng ơ̆ dî bĭc, nơ̆m lơ̆gay jơno ăm jơgloh, 6nơ̆m jơno sang lơhiê, nơ̆m jơno gư̆t wơng, nơ̆m jơno kŏng-ăt, nơ̆m jơno lơbăn-niem, nơ̆m Yang Hwîng Goh, nơ̆m jơno kơñ-kơloh ngăn; 7nơ̆m jơno tơpăt-ngăn, nơ̆m jơno gơnăp-gơnoăr Yang Tơm Trồ dê; kơnơm bơh lơ̆gay jơno tơmlơh tơpăt-durư̆ng anẵu tê ma î tê eo, 8bơh jơno gơklŏ băl î jơno kŏng lơh ƀasmăt, bơh jơno tơs bờk băl î jơno tơs niem; lăng gư̆ptî cro blăc-pơlum, mơya niem-nùs ngăn; 9gư̆ptî ơ̆ tom cro gư̆t, mơya dî khăi cro gư̆t; gư̆ptî mơñ sơ̆t, mơya kư̆ hôm jîng; gư̆ptî kŏng lơh-glài, mơya ơ̆ kŏng lơh tơngsơ̆t; 10gư̆ptî kŏng moat-jrum, mơya dî sơhờp-sờhơn miek; gư̆ptî kơsòt-rƀah, mơya lơh ma khăi cro gôjîng kơnhơ̆p; gư̆ptî ơ̆ dî jơno găy, mơya dî tăl lơ̆gay jơno.

11Ơ oh mi rôh lŏ cro Kôrintô, yôi ƀòn hî sŏng pẵư tơlôh î oh mi rôh lŏ; nùs ƀòn hî sŏng dî pẵư dơng ơnàng. 12Ơ̆-iyŏ oh mi rôh lŏ kŏng cơkhă wăl bơh ƀòn hî, mơya oh mi rôh lŏ kŏng cơkhă wăl nơ̆m nùs-kơñ mơ̆n; 13Gư̆n-jîng nơ̆m jơno tăm kla wăl gư̆ptî gư̆n — ăñ tơs gư̆ptî tơs î khwên-kơmom — oh mi rôh lŏ kŭng pẵư ơnàng nùs cĕ. 14Bư̆ng kŏng añ yô băl î cro ơ̆ don, bơh jơno tơpăt-durư̆ng î jơno bờk-mơsăk tom jơno găy lơi lơh bră băl hơbơ̆? Hala jơno ang î jơno ñô̆ng tom jơno găy lơi tơmklăc-băl? 15Yang Dŏng-Klàs î Ƀelial tom jơno tơmklăc-băl găy? Hala cro don tom pơnah găy băl î cro ơ̆ don? 16Hîh duh-khoai Yang Tơm Trồ dê băl î rồp-ràk tom jơno dubă băl găy? Bơh ƀòn mơ̆n la hîh duh-khoai Yang Tơm Trồ jîng miek, gư̆ptî Yang Tơm Trồ sŏng tơs lah:

“Ăñ rơp ăm nhòng ƀòn gô, î swà eo ma nhòng ƀòn gô;

Ăñ rơp la Yang Tơm Trồ ƀòn gô dê,

gừn să tơm ƀòn gô rơp la lang bol Ăñ.”

17Gư̆n-jîng,

“Swà tơlôh cĕ bơh nhòng ƀòn gô

gư̆m tơmcơlah î ƀòn gô,” Yang tơs lah,

“gừn bư̆ng tơmpơ̆p trôh jơno sơmơ̆-sơmĭñ,

sŏng gư̆n Ăñ rơp wă-rẵu ƀòn kon.”

18Gừn

“‘Ăñ rơp la Bàp ƀòn kon,

gừn ƀòn kon rơp la kon klo, kon ua Ăñ,’

Yang Gơnăp Gơnoăr Dơng tơs.”