2 Kôrintô 5:7

1Bơh ƀòn mơ̆n gư̆t lah dilah hîh nơ̆m ple-ù ƀòn mơ̆n dê, rơ̆ la kơjang ăm bơdơh dô, kŏng rlăm lề, gừn ƀòn mơ̆n dî du hîh băt tơngñă bơh Yang Tơm Trồ, la hîh miek miek cŭngsî lơ̆gay dăp trồ, ơ̆-iyŏ bơh tê kon-mơnùs lơh tơlôh. 2Gừn ngăn, ƀòn mơ̆n nhèng ƀoah nơ̆m hîh bơdơh dô, tơm tô̆ ndăng cang-kơnơm dî dưñ-lăñ anẵu ăm mơ̆n dê bơh cŭngsî trồ — 3gừn êt ngăn dilah sŏng cù lờt, gừn ƀòn mơ̆n rơp ơ̆ kŏng ăm săkôh sơlơ̆ñ. 4Gừn ngăn, la tơmpôl cro hôm ăm nơ̆m kơjang dô, ƀòn mơ̆n nhèng ƀoah bơh kŏng jơno kơjơ̆-kơjùt, tài bơh jơno gư̆n mà ƀòn mơ̆n ơ̆ kơñ kŏng ăm săkôh sơlơ̆ñ, mơya dî tơngcù bơtăl te, lơi lơ̆gay jơno ăm nteàh gơnoăr sơ̆t digơlăn kŏng lon sa bơh jơno jîng. 5Pơnah nde, Bơtao sŏng rcăng jơno dô ma ƀòn mơ̆n la Yang Tơm Trồ, la Bơtao sŏng e ma ƀòn mơ̆n jơno cư̆ng-tang Yang Hwîng Goh dê. 6Gư̆n-jîng, bulah khơ̆n-sa gừn ờs gư̆t lah tơm tô̆ ăm nơ̆m hîh nơ̆m să-jăn dô, ƀòn mơ̆n ndăng ăm wĭc bơh sơ Yang — 7bơh ƀòn mơ̆n lơbà swà kơnơm bơh jơno don, ơ̆-iyŏ kơnơm bơh măt tơmpơl. 8Hôm ƀòn hî kư̆ khơ̆n-sa î nùs sơhờp-sờhơn niem rlo wĭc bơh sơ să-jăn dô î ăm nơ̆m hîh Yang gừn rlo te. 9Gư̆n-jîng, ƀòn hî jơh nùs grat pran lơi dî niem-nùs Yang, bulah ăm nơ̆m hîh hala ăm wĭc. 10Bơh lơ̆gay ƀòn mơ̆n păl sơđah să sơđàp sơban cahrña Yang Dŏng-Klàs dê, lơi kơp cro dưñ-lăñ lơ̆gay jơno găy jăt bơh lơ̆gay bră lơh niem hala bờk-mơsăk mơ̆n sŏng lơh, tơm tô̆ hôm ăm nơ̆m să-jăn.

11Gư̆n-jîng, bơh gư̆t duh kơ̆mbrit Yang dê, ƀòn hî mơ̆ndơm-mơ̆nieng lơ̆gay cro. Hôm ƀòn hî dî Yang Tơm Trồ gư̆t nê̆, mà ăñ kŭng kơp kơñ dî gư̆t nê̆ nơ̆m nùs-nhơ̆m oh mi rôh lŏ. 12Ơ̆-iyŏ ƀòn hî tơs niem dêh bơh să tơm mơ̆n î oh mi rôh lŏ, mơya la ndăng e ma oh mi rôh lŏ tô̆ lơwah niem-nùs tài bơh ƀòn hî, lơi oh mi rôh lŏ digơlăn kla wăl dẵư ăn lơi ma lơ̆gay cro ham tơngyeh să bơh đah să-jăn mà ơ̆-iyŏ nơ̆m nùs-nhơ̆m. 13Bơh dilah ƀòn hî tom mòs sơnrăng, rơ̆ la bơh Yang Tơm Trồ; dilah ƀòn hî jơmrăc-jơmrài, rơ̆ la bơh oh mi rôh lŏ. 14Bơh jơno kơñ-kơloh Yang Dŏng-Klàs dê rngoh-rngăc ƀòn hî, ma-ngkơi jơ swì lăng jơno dô: gư̆n la du hôi cro sŏng sơ̆t ala ma lơ̆gay cro; gư̆n-jîng, lơ̆gay cro sŏng sơ̆t. 15Kơnràñ sŏng sơ̆t ala ma lơ̆gay cro, lơi cro găy hôm jîng ơ̆ hôm jîng bơh să tơm mơ̆n te, mơya la bơh Bơtao sŏng sơ̆t ala ƀòn gô gừn sŏng dî lơh jîng wăl. 16Gư̆n-jîng, bơh jơ dô, ƀòn hî ơ̆ hôm gư̆t cro găy jăt poăc-să. Tien gơs bulah ƀòn hî sŏng đăl gư̆t Yang Dŏng-Klàs jăt poăc-să, mơya jơ dô, ƀòn hî ơ̆ hôm đăl gư̆t Kơnràñ jăt dubă tîrơ̆ te. 17Bơh tîgư̆n, dilah cro găy ăm nơ̆m Yang Dŏng-Klàs gừn la du jơno bơjîng mhăy. Lơ̆gay jơno yo sŏng roh lờt; lăng tò, lơ̆gay jơno mhăy sŏng sơlôh tơmpơl. 18Mơya, jơh lơ̆gay jơno dô tơlôh bơh Yang Tơm Trồ, la Bơtao sŏng lơh gô tơmrơm ƀòn mơ̆n î să tơm Kơnràñ kơnơm Yang Dŏng-Klàs gừn sŏng jao ma ƀòn hî gơnoăr lơh gô tơmrơm băl dô, 19gôlơh gư̆ptî la Yang Tơm Trồ ăm nơ̆m Yang Dŏng-Klàs, tơm tô̆ lơh gô tơmrơm dunya î Kơnràñ, ơ̆ katîng khà lơ̆gay glài ƀòn gô dê tơmdră î ƀòn gô, gừn sŏng ăn lơi nơ̆m ƀòn hî jơno bơtău lơh gô tơmrơm băl rơ̆.

20Bơh gư̆n, ƀòn hî la lơ̆gay cro gơnoăr ala măt Yang Dŏng-Klàs, gôlơh gư̆ptî Yang Tơm Trồ ndăng hôi-săc bơh ƀòn hî; ƀòn hî dăn ala măt Yang Dŏng-Klàs: “Lơh tơmrơm wăl cĕ î Yang Tơm Trồ!” 21Kơnràñ sŏng lơh Bơtao sŏng ơ̆ đăl gư̆t tồi-glài sơlôh jîng tồi-glài ala ma ƀòn mơ̆n, lơi ƀòn mơ̆n dî sơlôh jîng jơno tơpăt-durư̆ng Yang Tơm Trồ dê nơ̆m Bơtao rơ̆.