2 Kôrintô 4

1Tài bơh jơno rơ̆, tơm tô̆ prăp jư gơnoăr bră dô jăt dubă gư̆ptî ƀòn hî sŏng dî jơno sơmah-kơloh, ƀòn hî ơ̆ sơòs-sơngeh tơblơ̆ nùs. 2Ala sơgư̆n, ƀòn hî sŏng khan lơi căư jơno ndăp-ndơ păl ƀasmôh ƀasmăt, tơm tô̆ ơ̆ ăm nơ̆m jơno lăc-leo, kŭng ơ̆ tơs tơblơ̆ jơno Yang Tơm Trồ, mơya bơh jơno tơs tơlôh jơno tơpăt-ngăn, lơh nùs-nhơ̆m lơ̆gay cro đăl gư̆t ƀòn hî sơđàp măt Yang Tơm Trồ. 3Mơya tien gơs dilah Jơno Niem ƀòn hî dê tom kŏng tơmbàk, gừn rơ̆ la kŏng tơmbàk nhòng lơ̆gay tơmpôl cro roh-rùi, 4mà nhòng tơmpôl ƀòn gô, yang rai dô sŏng lơh ñô̆ng nùs-nhơ̆m tơmpôl cro ơ̆ don gư̆n, tien gơs jơno ang Jơno Niem gơklŏ Yang Dŏng-Klàs dê, Kơnràñ la rồp-să Yang Tơm Trồ dê, ơ̆ bi ang cŭngsî ƀòn gô. 5Bơh ƀòn hî ơ̆ tơs bơtău bơh sătan mơ̆n, mơya la Yang Dŏng-Klàs Jesu, rơ̆ la Yang, hôm sătan ƀòn hî gư̆ptî lơ̆gay cro dê̆-gơna oh mi rôh lŏ tài bơh Yang Jesu. 6Bơh Yang Tơm Trồ, la Bơtao sŏng tơs lah: “Jơno ang rơp jroh bơh nơ̆m jơno ñô̆ng,” la Bơtao sŏng jroh nơ̆m nùs ƀòn hî, lơi e jơno ang bơh jơno gư̆t wơng jơno gơklŏ Yang Tơm Trồ sơđàp măt Yang Dŏng-Klàs Jesu Krist.

7Mơya ƀòn hî ăn jơno phăn-màng dô nơ̆m lơ̆gay pŏk ù kơnañ, lơi jơno gơnăp-gơnoăr dơng rlo rơ̆ la bơh Yang Tơm Trồ, ơ̆-iyŏ bơh ƀòn hî; 8la tơmpôl cro kŏng gleh-glăr nơ̆m wêl-tăl kơp jơno, mơya ơ̆ kŏng kơtơ̆ lề; kŏng kơlôi-kơ̆mbrit, mơya ơ̆ roh jơno cang-kơnơm; 9kŏng kơ̆p rôn-bơklơ̆n, mơya ơ̆ kŏng mbư̆ng lơi căư; kŏng tơngblă, mơya ơ̆ kŏng tơngroh; 10Ƀòn hî iyà miek nơ̆m să-jăn mơ̆n jơno sơ̆t Yang Jesu dê swà kơ̆p anẵu, lơi jơno jîng Yang Jesu dê kŭng digơlăn e tơnggư̆t nơ̆m să-jăn ƀòn hî; 11bơh bulah hôm jîng, ƀòn hî kŏng nap miek ma jơno sơ̆t tài bơh Yang Jesu, lơi jơno jîng Yang Jesu dê kŭng dî e tơnggư̆t nơ̆m să-jăn jơno sơ̆t ƀòn hî. 12Tîgư̆n, jơno sơ̆t lơh bră nơ̆m ƀòn hî, hôm jơno jîng gừn ăm nơ̆m oh mi rôh lŏ. 13Mơya tơm tô̆ dî du nùs băl nơ̆m jơno don jăt jơno sŏng cêh lah: “Ăñ don, gư̆n-jîng ăñ tơs,” ƀòn hî kŭng don, gư̆n-jîng ƀòn hî kŭng tơs, 14bơh gư̆t lah Bơtao sŏng lơh Yang Jesu jîng wăl kŭng rơp lơh ƀòn hî jîng wăl î Yang Jesu, gừn rơp rang sơđah ƀòn hî băl î oh mi rôh lŏ. 15Ngăn, lơ̆gay bră gư̆n la tài bơh oh mi rôh lŏ, lơi jơno sơmah, ma-ngkơi jơ sơlơ bơtăl ma khăi cro rlo te, digơlăn lơh bơtăl rlo jơno ưnngai bơh gơklŏ Yang Tơm Trồ.

16Tîgư̆n, ƀòn hî ơ̆ tơblơ̆ nùs. Mơya, tien gơs dilah đah să-jăn ƀòn hî ndăng kŏng ôm-lề, mơya đah hwîng ƀòn hî dî lơh mhăy wăl kơp nge. 17Bơh jơno gleh-glăr ngkhờc dư̆ng-iè ƀòn hî dê ndăng iyà wăl ma ƀòn hî jơno gơklŏ miek miek, ơ̆ gư̆t lơ̆, ơ̆ jơno găy sơntu dî. 18Tơm tô̆ ƀòn hî ơ̆ lăng lơ̆gay jơno tơmpơl dî, mơya la lăng lơ̆gay jơno ơ̆ tơmpơl dî. Bơh lơ̆gay jơno tơmpơl dî la dư̆ng-iè gời, hôm lơ̆gay jơno ơ̆ tơmpơl dî la miek miek.