2 Kôrintô 3

1Tom iyŏ ƀòn hî sơntơm mơnê wăl dêh sătan mơ̆n? Hala gư̆ptî du khà cro, jơno ƀòn hî kă pơyoa sră tơs lai pơyoa trôh ma oh mi rôh lŏ hala bơh oh mi rôh lŏ? 2Să tơm oh mi rôh lŏ la sră pơyoa ƀòn hî dê, sŏng dî cêh nơ̆m nùs ƀòn hî, dî lơ̆gay cro gư̆t î đŏk, 3bơh dî e tơnggư̆t nê̆-năn lah oh mi rôh lŏ la sră pơyoa Yang Dŏng-Klàs dê, sŏng dî ƀòn hî rong-siem, ơ̆-iyŏ dî cêh bơh î dà cêh, mơya bơh î Hwîng Yang Tơm Trồ jîng miek, ơ̆-iyŏ cêh cŭngsî lô̆ plờk, mà la nơ̆m nùs cro dê. 4Mơya, kơnơm bơh Yang Dŏng-Klàs, ƀòn hî dî jơno don kơnơm tîgư̆n gôtrê ma Yang Tơm Trồ. 5Ơ̆-iyŏ bơh ƀòn hî dî tăl gơnoăr-pran bơh anẵu să-jăn lơi kơlôi gư̆ptî du bră găy gư̆n la công nha bơh să tơm mơ̆n. Ala sơgư̆n, jơno pran ƀòn hî dê tơlôh bơh Yang Tơm Trồ, 6la Bơtao kŭng lơh ƀòn hî rgê lơh cro duh bră jơno hăư-băl mhăy, ơ̆-iyŏ bơh î sră cêh, mơya la bơh î Yang Hwîng Goh; bơh sră cêh lơh tơngsơ̆t, hôm Yang Hwîng Goh gừn lơh jîng. 7Pơnah nde, dilah gơnoăr bră iyà wăl jơno sơ̆t — dî cêh klă bơh î dà cêh cŭngsî lô̆ — sŏng dî rang sơđah nơ̆m jơno ang gơklŏ, tien gơs kon so Israel ơ̆ khơ̆n lăng măt tơmtom măt Môise, tài bơh jơno ang gơklŏ kŏng ôm-lề nơ̆m môh măt ông, 8rơ̆ ơ̆-iyŏ gơnoăr bră Yang Hwîng Goh dê rơp e tơmpơl nơ̆m jơno ang gơklŏ khăi rlo te, gư̆t nhẵư? 9Bơh dilah jơno gơklŏ hôm ăn lơi ma gơnoăr bră lơh nên glài, gừn gơnoăr bră jơno tơpăt-durư̆ng sơlơ bîng-jut jơno gơklŏ khăi rlo te! 10Ngăn, bơh jơno bơh lai dî ang gơklŏ gừn ơ̆ dî jơno ang gơklŏ nơ̆m jơno bră dô, tài bơh jơno ang gơklŏ dơng rlo te. 11Bơh dilah jơno kŏng ôm-lề sŏng trôh î jơno ang gơklŏ, gừn jơno hôm miek rơp trôh nơ̆m jơno ang gơklŏ sơlơ khăi rlo te!

12Gư̆n-jîng, tơm tô̆ dî jơno cang-kơnơm tîrơ̆, ƀòn hî kơ̆p dưñ lăñ bơh î nùs khơ̆n-sa ngăn, 13gừn ơ̆ gư̆ptî Môise, ông sŏng dưñ du kơmang tơmbàk wăl môh măt, lơi lang bol Israel ơ̆ lăng măt tơpăt măt nơ̆m jơno lŭi-dơ̆t jơno ang gơklŏ dê ndăng roh-rùi. 14Mơya, nùs-nhơ̆m ƀòn gô sŏng kŏng kră-kơdăng, bơh trôh dî nge dô, băl du kơmang rơ̆ kŭng hôm ăm nơ̆m bră đŏk jơno hăư-băl yo; bơh ơ̆ dî tă mbăt, rơ̆ la bơh nơ̆m Yang Dŏng-Klàs, gư̆n gô kŏng tă mbư̆ng. 15Mơya, trôh dî nge dô, dilah jơ găy jơno-bơlăm Môise dî đŏk, gừn du-lăm kơmang tơmbàk nơ̆m nùs ƀòn gô, 16hôm dilah jơ găy cro nde trê wăl î Yang, gừn kơmang tơmbàk gư̆n rơp dî ănpôn lơi. 17Pơnah nde, Yang la Yang Hwîng Goh, gừn anẵu găy tom Hwîng Goh Yang dê, gừn dî jơno khăt-gơboh nơ̆m gư̆n. 18Hôm lơ̆gay ƀòn mơ̆n, î môh măt ơ̆ tơmbàk, jơno jroh ang gơklŏ Yang dê, gừn ndăng dî bơgăl mhăy gôjîng băl du-lăm rồp-să bơh ang gơklŏ trôh ang gơklŏ, gư̆ptî bơh Yang, la Yang Hwîng Goh.