2 Kôrintô 2

1Bơh ăñ lơh nên tîgư̆n, la niem ma să tơm mơ̆n lơi ơ̆ trôh î oh mi rôh lŏ ơ̆ du dơ̆ te nơ̆m jơno moat-jrum. 2Bơh dilah sătan ăñ lơh oh mi rôh lŏ moat-jrum, rơ̆ mơ̆t cro rgê lơh ăñ sơhờp, dilah ơ̆-iyŏ cro kŏng ăñ lơh moat-jrum? 3Gừn ăñ sŏng cêh du-lăm jơno tîdô, lơi ma-ngkơi jơ trôh, ăñ ơ̆ moat-jrum bơh lơ̆gay cro mà bơgăy ăñ păl sơhờp-sờhơn, bơh sŏng ăñ jơno don kơnơm anẵu lơ̆gay oh mi rôh lŏ, lah jơno sơhờp-sờhơn ăñ dê la jơno sơhờp-sờhơn lơ̆gay oh mi rôh lŏ dê. 4Tài bơh nhòng jơno rŭng-rai dơng î nùs-nhim jê-gleh, mà ăñ cêh ma oh mi rôh lŏ î khăi dà măt, ơ̆-iyŏ lơi oh mi rôh lŏ moat-jrum, mơya lơi oh mi wơng dî jơno kơñ-kơloh khăi ngăn ăñ jê ăn lơi ma oh mi.

5Mơya dilah cro găy sŏng lơh moat-jrum, gừn cro rơ̆ ơ̆-iyŏ la nư̆ng lơh moat-jrum ma ăñ, mơya sŏng lơh ma oh mi rôh lŏ lơ̆gay kŭng moat-jrum dư̆ng-iè — ơ̆ kă tơs oăn ờ. 6Jơno lơh-glài rơ̆ mà khăi pơnah oh mi rôh lŏ ăn lơi ma cro tîgư̆n la tăl lờt, 7gư̆n-jîng, tơblơ̆ wăl la oh mi kơñ toh glài î pơndơm-pơnieng cro gư̆n gừn rlo, kơ̆mbrit lah cro gư̆n digơlăn blơ̆ nùs bơh jơno moat-jrum dơng. 8Gư̆n-jîng, ăñ bơtău tơngkah oh mi rôh lŏ tơs e tơnggư̆t cĕ jơno kơñ-kơloh jăt î cro gư̆n. 9Ngăn, ăñ kŭng cêh sŏng bơh jơno tîgư̆n, lơi lòng oh mi rôh lŏ gư̆t tom don dẵư nơ̆m lơ̆gay bră hala ơ̆. 10Mơya, bơh cro mà oh mi rôh lŏ toh glài du-lăm jơno găy, gừn ăñ kŭng tîgư̆n — tài bơh să tơm ăñ, jăt bơh cro mà ăñ toh glài (dilah ăñ toh du-lăm glài dô-dă), rơ̆ la bơh jơno kwơ ăn ma oh mi rôh lŏ ăm sơđàp măt Yang Dŏng-Klàs, 11bulah lơi ƀòn mơ̆n ơ̆ kŏng cà Satan blăc-pơlum, bơh ơ̆-iyŏ ƀòn mơ̆n ơ̆ gư̆t jơno găy bơh lơ̆gay kai lăc leo gô dê.

12Mơya, ma-ngkơi jơ trôh nơ̆m Trôas, gừn bulah du đah mpông ma Jơno Niem Yang Dŏng-Klàs dê sŏng dî pẵư ma ăñ nơ̆m Yang, 13mơya ăñ sŏng ơ̆ sô̆k ăm nơ̆m hwîng nùs mơ̆n, bơh ăñ sŏng ơ̆ tơmtom dî Tit, cro oh mi ăñ jê. Mơya, ma-ngkơi jơ ăñ sŏng tơngăc ƀòn gô, ăñ swà gung trôh nơ̆m Maseđoan.

14Tîrơ̆ gừn, ưnngai Yang Tơm Trồ, la Bơtao bơlăm-găl miek miek ƀòn hî dubă pha-lĭn nơ̆m Yang Dŏng-Klàs, gừn kơnơm bơh ƀòn hî, e tơlôh jơno ƀôhơ̆ bơh jơno gư̆t đăl Kơnràñ nơ̆m kơp anẵu. 15Bơh jăt î Yang Tơm Trồ, ƀòn hî la jơno ƀôhơ̆ Yang Dŏng-Klàs dê nhòng lơ̆gay cro dî dŏng-klàs î nhòng lơ̆gay cro roh-rùi — 16bulah jăt î lơ̆gay cro dô, la jơno ƀô ôm bơh jơno sơ̆t lơi kơlôi trôh jơno sơ̆t, mơya jăt î lơ̆gay cro nde, la jơno ƀôhơ̆ tơlôh bơh jơno jîng lơi kơlôi trôh jơno jîng. Mơ̆t cro tăl pran ma lơ̆gay jơno dô? 17Bơh ƀòn hî ơ̆ gư̆ptî khăi cro brău sa jơno Yang Tơm Trồ bơh công nha dêh, mơya gư̆ptî bơh nùs ngăn sang-goh, gư̆ptî bơh Yang Tơm Trồ, ƀòn hî bơtău tơs sơđàp măt Yang Tơm Trồ nơ̆m Yang Dŏng-Klàs.