2 Kôrintô 1

1Pol, cro gơnoăr bơtău Yang Dŏng-Klàs Jesu dê bơh nùs-kơñ Yang Tơm Trồ dê, î cro oh mi Timôthe, pơyoa ma Hîh Jư̆m Goh Yang Tơm Trồ dê nơ̆m anẵu Kôrintô, băl î lơ̆gay cro sang-goh ndăng ăm nơ̆m lơ̆ du ƀòn lơgơ Acai: 2Dăn jơno sơmah î jơno lơngăp-lơnge bơh Yang Tơm Trồ, Bàp ƀòn mơ̆n, î Yang, la Yang Dŏng-Klàs Jesu, trôh cŭng oh mi rôh lŏ!

3Păl jong-rơ Yang Tơm Trồ, î Bàp Yang Dŏng-Klàs Jesu ƀòn mơ̆n dê, rơ̆ la Bàp jơno kơloh-kơlài, gừn Yang Tơm Trồ lơ̆gay jơno pơndơm-pơnieng dê, 4la Bơtao pơndơm-pơnieng ƀòn hî nơ̆m lơ̆gay jơno rŭng-rai ƀòn hî dê, iyà trôh bră lơh ma ƀòn hî digơlăn pơndơm-pơnieng lơ̆gay cro găy ăm nơ̆m lơ̆gay jơno rŭng-rai bơh î jơno pơndơm-pơnieng mà să tơm ƀòn hî dî pơndơm-pơnieng bơh Yang Tơm Trồ. 5Bơh gư̆ptî lơ̆gay jơno jê-sồt Yang Dŏng-Klàs dê bîng-jut cŭng ƀòn hî tîgay, gừn jơno pơndơm-pơnieng ƀòn hî kơnơm bơh Yang Dŏng-Klàs kŭng bîng-jut tîrơ̆. 6Mơya dilah ƀòn hî kŏng jơno rŭng-rai, gừn rơ̆ la bơh jơno pơndơm-pơnieng î jơno dŏng-klàs oh mi rôh lŏ dê; dilah ƀòn hî dî pơndơm-pơnieng, gừn rơ̆ la bơh jơno pơndơm-pơnieng oh mi rôh lŏ dê, la jơno dî ờs dơm nơ̆m bră ăt-ăl kŏng-ăt băl î jơno lơ̆gay jơno gleh-glăr mà să tơm ƀòn hî kŭng ndăng kŏng-ăt. 7Gừn jơno cang-kơnơm ƀòn hî dê bơh oh mi rôh lŏ la nên-nôn ngăn, tơm tô̆ gư̆t lah gư̆ptî oh mi rôh lŏ la tơmpôl cro dî pơnah nơ̆m jơno gleh-glăr mơmơh tîgay, gừn kŭng dî pơnah nơ̆m jơno pơndơm-pơnieng tîrơ̆. 8Ơ oh mi rôh lŏ, bơh ƀòn hî ơ̆ kơñ oh mi rôh lŏ ơ̆ gư̆t du êt jơno găy bơh jơno gleh-glăr tơmtom trôh ma ƀòn hî nơ̆m Asia, lah ƀòn hî kŏng rôn-bơklơ̆n khăi ngăn, rlo cŭng gơnoăr pran kŏng-ăt, tien gơs ƀòn hî ơ̆ hôm jơno cang-kơnơm lơi jîng te. 9Mơya, să tơm ƀòn hî sŏng ờs tom jơno lơh nên glài sơ̆t nơ̆m nhòng să mơ̆n, lơi ma ƀòn hî ơ̆ digơlăn kơnơm bơh anẵu sătan, mơya la anẵu Yang Tơm Trồ, Bơtao lơh cro sơ̆t jîng wăl, 10la Bơtao sŏng dŏng-tă ƀòn hî klàs bơh jơno sơ̆t dơng tîgư̆n, gừn Kơnràñ rơp dŏng-tă ƀòn hî — rơ̆ la anẵu Kơnràñ, ƀòn hî dî jơno cang-kơnơm lah Kơnràñ kŭng rơp dŏng-tă ƀòn hî te, 11tơm tô̆ oh mi rôh lŏ kŭng du nùs băl tơmdŏng nơ̆m jơno hôi-dăn ala ma ƀòn hî, lơi ma tơlôh bơh khăi cro, jơno niem trôh cŭng ƀòn hî, Yang Tơm Trồ dưñ-lăñ lơ̆gay jơno ưnngai bơh khăi cro tài bơh ƀòn hî. 12Bơh jơno ƀòn hî sơhờp don kơnơm la tîdô, jơno lơh cư̆ng bơh nùs-nhơ̆m ƀòn hî, lah ƀòn hî sŏng ăm sang-goh î nùs don-duh ngăn Yang Tơm Trồ nơ̆m dunya, ơ̆-iyŏ bơh jơno jăk-sai jăt bơh poăc-să, mơya kơnơm bơh jơno sơmah e gời Yang Tơm Trồ dê, mà lai ngăn la jăt î oh mi rôh lŏ. 13Bơh ƀòn hî ơ̆ cêh ma oh mi rôh lŏ kơp jơno găy phadêh, rlo lơ̆gay jơno mà oh mi rôh lŏ đŏk hala wơng dî, mơya ăñ kơp kơñ lah oh mi rôh lŏ rơp wơng loh-lang, 14kŭng gư̆ptî oh mi rôh lŏ sŏng gư̆t wơng ƀòn hî du pơnah găy gư̆n, lah ƀòn hî la jơno sơhờp-sờhơn oh mi rôh lŏ dê, gừn oh mi rôh lŏ kŭng tîgư̆n jăt î ƀòn hî, nơ̆m nge Yang ƀòn mơ̆n dê, la Yang Jesu.

15Bơh jơno don kơnơm tîrơ̆, bơh lai ƀua ăñ lơh nên swà còp oh mi rôh lŏ, lơi oh mi rôh lŏ digơlăn jơno sơmah du dơ̆ te, 16sŏng gư̆n bơh anẵu oh mi rôh lŏ lơi swà trôh nơ̆m Maseđoan, gừn bơh Maseđoan trôh wăl î oh mi rôh lŏ, sŏng gư̆n dî oh mi rôh lŏ lơboh swà gung trôh nơ̆m Juđe. 17Gư̆n-jîng, tơm tô̆ sơmơn lơh nên bră dô, gừn tom iyŏ la ăñ tơmbơgăl nùs miek? Hala ăñ lơh nên jơno jăt đah poăc-să, sŏng gư̆n băl du dơ̆ ăñ ƀà tơs “dî” ƀà tơs “ơ̆”? 18Mơya Yang Tơm Trồ la Bơtao lơh-jăt jơno hăư, gư̆n-jîng jơno tơs ƀòn hî ăn lơi ma oh mi rôh lŏ gừn ơ̆-iyŏ ƀà tơs “iyŏ” ƀà tơs “ơ̆”. 19Bơh Kon Yang Tơm Trồ, la Yang Dŏng-Klàs Jesu, Bơtao sŏng dî tơs bơtău nhòng oh mi rôh lŏ bơh ƀòn hî — rơ̆ la bơh ăñ î Silwan băl î Timôthe, ơ̆-iyŏ la ƀà “iyŏ” ƀà “ơ̆” mà nơ̆m Kơnràñ ờs miek la “iyŏ”. 20Bơh gư̆t nhẵư jơno hăư Yang Tơm Trồ la “iyŏ” nơ̆m Kơnràñ. Gư̆n-jîng, kŭng kơnơm bơh Kơnràñ, jơno tơs “Amen” bơh ƀòn mơ̆n ăn ma Yang Tơm Trồ bơh jơno ang gơklŏ Kơnràñ dê. 21Pơnah nde, Yang Tơm Trồ la Bơtao lơh cư̆ng ƀòn hî î oh mi rôh lŏ nơ̆m Yang Dŏng-Klàs gừn sŏng bŏng mơñà ma ƀòn hî, 22kŭng la Bơtao sŏng tăp ƀăng-kì cŭng ƀòn hî î e Yang Hwîng Goh mơ̆t nơ̆m nùs ƀòn hî lơh cư̆ng-tang.

23Hôm ăñ gừn hôi-dăn Yang Tơm Trồ lơh cư̆ng ma hwîng-soan ăñ lah bơh ăñ ơ̆ kơñ lơh nên glài oh mi rôh lŏ, ăñ hôm dahrăư swà trôh nơ̆m Kôrintô te. 24Ơ̆-iyŏ bơh ƀòn hî dî gơnoăr ăt-bồ cŭng jơno don oh mi rôh lŏ, mơya bơh ƀòn hî la cro lơh bră băl bơh jơno sơhờp-sờhơn oh mi rôh lŏ dê, bơh oh mi rôh lŏ sŏng ñă bơkhê nơ̆m jơno lờt.