1 Kôrintô 5

1Bră dî kơnău tơs nơ̆m nhòng tơmpôl oh mi rôh lŏ la du bră sơlăp-sơbêl, î jơno sơlăp-sơbêl gư̆ptî rơ̆ la jơno tien gơs ơ̆ tom nhòng tơmpôl lơ̆gay lang bol bơdih — trôh dî mà du hôi cro năy dưñ bo-ua bàp mơ̆n dê. 2Hôm oh mi rôh lŏ gừn kŭng tơngyeh să, sơlơ ơ̆ tom ñim alô̆ng alang găy, bulah lơi cro sŏng lơh tìs bră rơ̆ digơlăn kŏng tơngroh bơh nhòng tơmpôl oh mi rôh lŏ. 3Bơh ăñ, bulah nơ̆m să-jăn ăm wĭc ngăn, mơya nơ̆m hwîng-nùs ăñ kŭng tom măt, sŏng lơh nên cahrña cro tìs-glài dư̆ng rơ̆ lờt, gư̆ptî ndăng tom măt nơ̆m anẵu gư̆n. 4Nơ̆m sơnăn Yang ƀòn mơ̆n, la Yang Dŏng-Klàs Jesu, tơm tô̆ oh mi rôh lŏ sŏng dî bơjư̆m wăl, băl î hwîng-nùs ăñ jê, gư̆m gơnăp-gơnoăr Yang ƀòn mơ̆n dê, la Yang Jesu, 5lơi jao phi cro gư̆n ma Satan bulah kŏng jơno tơngroh đah poăc-să, lơi e hwîng-nùs cro gư̆n digơlăn dî dŏng-klàs nơ̆m nge Yang dê. 6Jơno tơngyeh să oh mi rôh lŏ dê ơ̆ tom niem-lơhơn găy. Oh mi rôh lŏ ơ̆ gư̆t lah dư̆ng-iè dong lơh rô̆ lơ̆ du tơmpong ƀŏk ơ̆h? 7Păl rao lơhiê cĕ dong yo, lơi oh mi rôh lŏ digơlăn la tơmpong ƀŏk sơ-uy mhăy, gôlơh gư̆ptî oh mi rôh lŏ la ƀăñ ơ̆ tom dong. Bơh Yang Dŏng-Klàs, la belàt kon Bơjư̆m-Sa Swà-Găn ƀòn mơ̆n dê, kŭng sŏng kŏng tơngsơ̆t dî jơno ăn duh-khoai. 8Gư̆n-jîng, ƀòn mơ̆n păl kah sơdơ jơno bơjư̆m, ơ̆-iyŏ î dong yo, kŭng ơ̆-iyŏ î dong bờk-mơsăk gừn lơh ơ̆ niem, mơya la bơh ƀăñ ơ̆ tom dong î jơno iyŏ ngăn gư̆m jơno-tơpăt.

9Nơ̆m sră ăñ sŏng cêh ma oh mi rôh lŏ la bư̆ng swà maên î tơmpôl lơh sơlăp-sơbêl — 10Ăñ ơ̆ tom kơlôi tơs trôh lơ̆gay cro sơlăp-sơbêl nơ̆m dunya dô, hala la lơ̆gay cro ham-hà gư̆m cro blăc pơlum, hala lơ̆gay cro duh-khoai rồp-ràk, bơh gư̆ptî gư̆n, oh mi rôh lŏ păl swà tơlôh bơh dunya. 11Mơya gư̆ptî jơ dô, ăñ sŏng cêh ma oh mi rôh lŏ bư̆ng swà maên î kơp cro găy dî sơnăn la oh mi mơya la cro sơlăp-sơbêl, ham-hà, duh-khoai rồp-ràk, dơm wac-rma, mañơ̆l-lơmbẵy, hala blăc pơlum; tien gơs kŭng bư̆ng ñô sa băl î du hôi cro gư̆p tîrơ̆. 12Bơh jơno cahrña lơ̆gay cro ăm bơdih tom jơno găy gô tơmtom trôh ăñ ya? Ơ̆-iyŏ mi rôh lŏ cahrña lơ̆gay cro ăm nơ̆m Hîh Jư̆m Goh ơ̆h? 13Mơya Yang Tơm Trồ rơp cahrña lơ̆gay cro đah makin năy.

“Păl lơi căư cĕ jơno bờk-mơsăk bơh nhòng să tơm oh mi rôh lŏ dê.”