1 Kôrintô 4

1Bơh gư̆n, kơp cro păl lăng ƀòn hî: gư̆ptî lơ̆gay dê̆-gơna Yang Dŏng-Klàs dê î lơ̆gay cro jư lăng lơ̆gay jơno ndăp-ndơ Yang Tơm Trồ dê. 2Hôm jơno bră ăm anẵu dô, rơ̆ la jơno dî jôi lùp anẵu lơ̆gay cro jư lăng la amơh ma kơp cro dî tơmpơl la don-tơpăt. 3Mơya jơno bră dô la jăt î ăñ, dilah kŏng oh mi rôh lŏ hala kwăng cahrña kon mơnùs dê cahrña, gừn kŭng ơ̆ dơng mang găy. Gừn ăñ tien gơs kŭng ơ̆ cahrña să tơm mơ̆n. 4Bơh ăñ đăl tơmpơl mơ̆n ơ̆ tom jơno bră găy tơmdră î să tơm mơ̆n, mơya ăñ ơ̆ dî sơnăn la tơpăt-durư̆ng kơnơm bră rơ̆; mơya Yang la Bơtao cahrña ăñ. 5Gư̆n-jîng, bư̆ng khơñ oăn cahrña jơno găy, la trôh jơ Yang trôh, la Bơtao ờs rơp lơboh lơ̆gay bră pôn-ndăp tơlôh jơno ang, jơno ñô̆ng kơnăm dê ờs rơp rang sơđah lơ̆gay nùs kơlôi-sơnư̆ng nhòng nùs. Sŏng tơm jơ gư̆n, jơno jong-rơ bơh Yang Tơm Trồ rơp trôh î kơp cro.

6Ơ oh mi rôh lŏ, ăñ sŏng ngui lơh lơ̆gay jơno dô jăt î să tơm mơ̆n î Apôlôs bơh jơno kwơ oh mi rôh lŏ, lơi bơh ƀòn hî, oh mi rôh lŏ digơlăn bơtê gư̆t sên dô:

“Bư̆ng swà găn rlo jơno dî cêh,”

bulah lơi ơ̆ du hôi cro găy dơng nùs pơnhừ-să e sơnăn cro dô tơmdră wăl cro năy. 7Bơh cro găy tơmcơlah oh mi rôh lŏ ăm phadêh băl teh? Pơnah nde, jơno găy oh mi rôh lŏ ndăng dî mà mơ̆n sŏng ơ̆ dưñ-lăñ dî teh? Mơya dilah oh mi rôh lŏ sŏng lăñ, gừn no-gwơh oh mi rôh lŏ tư̆ng yeh să gư̆ptî sŏng ơ̆ lăñ dî teh? 8Oh mi rôh lŏ gừn sŏng dî sơhờp hơm tăl lờt! Oh mi rôh lŏ sŏng gôjîng kơnhơ̆p-mơ̆nda lờt! Oh mi rôh lŏ sŏng sơntơm ăt-bồ mà ơ̆ kă trôh ƀòn hî, gừn ăñ kơp kơñ oh mi rôh lŏ ăt-bồ dubă iyŏ ngăn, lơi ƀòn hî kŭng digơlăn ăt-bồ băl î oh mi rôh lŏ! 9Bơh ăñ kơlôi lah Yang Tơm Trồ sŏng rang sơđah lơh lơ̆gay cro gơnoăr bơtău dơng ƀòn hî ăm ma-ngkơi lŭi-dơ̆t, gư̆ptî lơ̆gay cro păl kŏng lơh-glài tơngsơ̆t. Bơh ƀòn hî sŏng gôjîng du jơno tơngyŏ-tơnghiel e ma dunya — gư̆m cro gơndrơh gư̆m kon-mơnùs. 10Ƀòn hî gừn wì-lơngôh tài bơh Yang Dŏng-Klàs, hôm oh mi rôh lŏ gừn jăk-sai nơ̆m Yang Dŏng-Klàs. Ƀòn hî lơbăn-lơñô, hôm oh mi rôh lŏ pran-kơdăng. Oh mi rôh lŏ dî cro kingam, hôm ƀòn hî kŏng cro khi-mờc. 11Trôh dî jơ dô, ƀòn hî ờs kŏng jơgloh, kŏng tơhiê, ờs ăm kôh lơi să sơlơ̆ñ, gư̆m kŏng cro pơng lơh swì swan, ờs ơ̆ dî hîh ăm anẵu bĭc niem. 12Gư̆m sơòs-sơngeh, lơh bră î kơ̆mpang tê să tơm mơ̆n. Tơm tô̆ kŏng cro wac-rma, ƀòn hî e lơnge. Tơm tô̆ kŏng cro kơ̆p lơh bờk, ƀòn hî kŏng-ăt. 13Tơm tô̆ kŏng cro tơmyă, ƀòn hî răk-sa dubă niem-lơhơn. Ƀòn hî sŏng gôjîng gư̆ptî lơ̆gay jơno sơmơ̆-sơmĭñ nơ̆m dunya, lơ̆gay jini-jơno brêh-brăm dê, trôh dî jơ dô.

14Ăñ ơ̆ cêh lơ̆gay jơno dô lơi lơh ƀasmăt oh mi rôh lŏ, mơya ăñ tơngkah oh mi rôh lŏ gư̆ptî kon kơñ-kơloh ăñ jê. 15Bơh bulah oh mi rôh lŏ dî jư̆t-rbô cro tơs bơlăm nơ̆m Yang Dŏng-Klàs, gừn kŭng ơ̆ tom khăi bàp; kơnơm bơh Jơno Niem, ăñ sŏng bơjîng tơlôh oh mi rôh lŏ nơ̆m Yang Dŏng-Klàs Jesu. 16Gừn, ăñ kôh-kồt tơngkah oh mi rôh lŏ păl gôjîng lơ̆gay cro đom jăt ăñ. 17Tài bơh jơno dô ăñ pơđơ Timôthe swà, rơ̆ la cro kon kơñ-kơloh î don-tơpăt ăñ jê nơ̆m Yang, trôh î oh mi rôh lŏ. Cro pơnu rơ̆ rơp ƀăn tơngkah oh mi rôh lŏ bơh lơ̆gay gung dà ăñ jê nơ̆m Yang Dŏng-Klàs Jesu, jăt gư̆ptî ăñ bơtău tơs nơ̆m lơ̆gay Hîh Jư̆m Goh kơp anẵu. 18Mơya, du pơnah cro sŏng pơnhừ-să jîng tơngyeh să, gôlơh gư̆ptî bơh ăñ ơ̆ trôh î oh mi rôh lŏ. 19Mơya dilah Yang kơñ, ăñ rơp trôh khơñ î oh mi rôh lŏ, gừn ăñ rơp đăl gư̆t ơ̆-iyŏ, jơno tơs lơ̆gay cro pơnhừ-să năy dê, mơya la gơnoăr-pran ƀòn gô dê. 20Bơh lơgơ Yang Tơm Trồ ơ̆-iyŏ bơh jơno tơs, mơya la bơh gơnăp-gơnoăr. 21Oh mi rôh lŏ kơñ jơno găy? Ăñ păl trôh băl î oh mi rôh lŏ î mư̆ng we, hala î jơno kơñ-kơloh gư̆m nùs tua lơbăn-niem teh?