1 Kôrintô 3

1Ơ oh mi rôh lŏ, ăñ ơ̆-rgê tơs î oh mi rôh lŏ gư̆ptî î tơmpôl cro gôtrê đah hwîng, mơya la gư̆ptî î lơ̆gay cro să-jăn, gư̆ptî î lơ̆gay kơmom ahên nơ̆m Yang Dŏng-Klàs. 2Ăñ sŏng e ma oh mi rôh lŏ ñô dà toh gừn ơ̆-iyŏ jơno sa sòt, bơh oh mi rôh lŏ hôm dahrăư dî pran ayoa sa. Tîrơ̆ gư̆n, jơ dô, oh mi rôh lŏ tien gơs kŭng hôm dahrăư dî pran ayua. 3Bơh oh mi rôh lŏ kŭng hôm ăm đah poăc-să. Tài bơh ăm nhòng oh mi rôh lŏ la anẵu tom jơno ƀoah tơmngañ î jơno tơmpìt, gừn ơ̆-iyŏ oh mi rôh lŏ la cro đah poăc-să, gừn ngui sa gư̆ptî cro rai dô ơ̆h? 4Bơh, tơm jơ cro dô tơs lah: “Ăñ gôtrê đah ma Pol,” hôm cro nde: “Ăñ gôtrê đah ma Apôlôs,” gừn ơ̆-iyŏ oh mi rôh lŏ la cro ăm đah poăc-să ơ̆h? 5Tîrơ̆ gừn, Apôlôs la mơ̆t cro? Hôm Pol la mơ̆t cro? La lơ̆gay dê̆-gơna, mà oh mi rôh lŏ dî jơno don bơh ƀòn gô, tien gơs jăt nơ̆m anẵu Yang sŏng ăn lơi e kơp cro. 6Ăñ sŏng tăm, Apôlôs sŏng tôh dà, mơya Yang Tơm Trồ lơh jîng hon dơng. 7Gư̆n-jîng, cro tăm gư̆m cro tôh dà gừn kŭng ơ̆ nino găy, mơya Bơtao lơh gô jîng hon dơng la Yang Tơm Trồ. 8Hôm cro tăm î cro tôh dà la durư̆ng băl, mơya kơp cro rơp lăñ dî priè tơnge mơ̆n jăt gư̆ptî jơno gleh-glăr să tơm dê. 9Bơh ƀòn hî la lơ̆gay cro bơyô băl gôtrê î Yang Tơm Trồ. Oh mi rôh lŏ la buơn srăy Yang Tơm Trồ dê, gư̆m hîh nhă Yang Tơm Trồ dê.

10Jăt sơnoa jơno sơmah-sơmai Yang Tơm Trồ dê sŏng dờp e ma ăñ, ăñ sŏng băt mơnang gư̆ptî cro jăk-sai rgê lơh bră, sŏng cro nde băt bơtao cŭngsî gư̆n, mơya kơp cro păl gư̆t kơhea bơh bră mơ̆n băt cŭngsî rơ̆. 11Bơh ơ̆ cro găy digơlăn bơ̆t du-lăm mơnang nde rlo mơnang dî băt, mà gư̆n la Yang Dŏng-Klàs Jesu. 12Tîrơ̆ gừn, dilah cro găy e î màh, priè, lô̆ mang, sî, khơ̆ rău hala rhăy kôi, băt cŭngsî mơnang rơ̆, 13gừn bră lơh kơp cro dê rơp gôjîng nê̆-năn, bơh nge rơ̆ rơp sơđah makin, bơh gô dî rang sơđah nơ̆m oềs; gừn să tơm oềs rơp lòng swì nùs tua găy bră lơh kơp cro dê. 14Dilah bră lơh cro găy dê kŭng kư̆ hôm wăl, rơ̆ la bră băt bơtao mà cro gư̆n băt sŏng, gừn cro rơ̆ rơp lăñ dî phăn-ƀan; 15dilah bră lơh cro găy dê kŏng oềs sa, gừn cro rơ̆ rơp păl kŏng roh lơ̆, hôm să tơm mơ̆n rơp dî dŏng-klàs, mơya jăt dubă gôlơh gư̆ptî găn bơh dî oềs.

16Oh mi rôh lŏ ơ̆ gư̆t lah oh mi rôh lŏ la hîh duh-khoai Yang Tơm Trồ dê î Hwîng Goh Yang Tơm Trồ jîng nơ̆m mơ̆n hala ơ̆h? 17Dilah cro găy lơh tơya rlăm hîh duh-khoai Yang Tơm Trồ dê, gừn Yang Tơm Trồ rơp lơh tơya rlăm cro rơ̆. Bơh hîh duh-khoai Yang Tơm Trồ dê la sang-goh, mà hîh duh-khoai rơ̆ la oh mi rôh lŏ.

18Bư̆ng cro găy pơlum dêh să mơ̆n. Dilah cro găy nơ̆m oh mi rôh lŏ tom gôlơh gư̆ptî la jăk-sai nơ̆m rai dô, gừn cro rơ̆ păl ăn lơi ma mơ̆n gôjîng “cro wì-lơngôh” bulah rơp digơlăn dî gôjîng cro jăk-sai. 19Bơh jơno jăk-sai nơ̆m dunya dô la jơno wì-lơngôh sơđàp măt Yang Tơm Trồ. Bơh tom jơno cêh, lah:

“Kơnràñ kơ̆p jư lơ̆gay cro jăk-sai nơ̆m jơno jăk tơmblăc ƀòn gô dê.”

20Gừn tom cêh wăl lah:

“Yang gư̆t lơ̆gay nùs-kơlôi lơ̆gay cro jăk-sai dê, lah ƀòn gô la ơ̆ kwơ ờ.”

21Gư̆n-jîng, bư̆ng cro găy tư̆ng yeh să anẵu kon-mơnùs! Bơh lơ̆gay jơno la oh mi rôh lŏ dê, 22bulah la Pol, hala Apôlôs, hala Sepha, bulah la lơgơ dunya, hala jơno jîng, hala jơno sơ̆t, hala bră tơm tô̆ dô, hala bră mơñ trôh. Lơ̆gay jơno kŭng gôtrê bơh oh mi rôh lŏ, 23hôm oh mi rôh lŏ gôtrê î Yang Dŏng-Klàs, gừn Yang Dŏng-Klàs gôtrê î Yang Tơm Trồ.