1 Kôrintô 2

1Ơ oh mi rôh lŏ, dơ̆ trôh băl î oh mi rôh lŏ, ăñ kŭng sŏng ơ̆ trôh î jơno tơs niem jơno jrô ndăp hala jơno jăk-sai dê, tơm tô̆ tơs tơnggư̆t ma oh mi rôh lŏ jơno ndăp-ndơ Yang Tơm Trồ dê. 2Bơh ăm nhòng tơmpôl oh mi rôh lŏ, ăñ sŏng lơh nên ơ̆ gư̆t jơno găy rlo Yang Dŏng-Klàs Jesu î Kơnràñ sŏng kŏng pư̆ng điñ cŭng sî pư̆ng. 3Ăñ sŏng kŭng ăm î oh rôh lŏ nơ̆m jơno lơbăn-lơñô, nơ̆m jơno kơ̆mbrit-kơ̆mbròt î ntơ ngăn. 4Jơno tơs ăñ jê î jơno tơs bơtău ăñ jê ơ̆ durư̆ng lơ̆gay jơno tơs nơ̆m khu tơngoh jăk-sai bîng jơno bơtău mơ̆ndơm, mơya la bơh jơno cư̆ng-tang Yang Hwîng Goh dê gư̆m gơnăp-gơnoăr, 5lơi jơno don oh mi rôh lŏ ơ̆ ăm anẵu jơno jăk-sai kon-mơnùs dê, mà la anẵu gơnăp-gơnoăr Yang Tơm Trồ dê.

6Mơya ƀòn hî tom bơtău jơno jăk-sai nhòng lơ̆gay cro wêl-tăl, mà ơ̆-iyŏ jơno jăk-sai bơh rai dô dê, kŭng ơ̆-iyŏ lơ̆gay tơmpôl cro ăt-bồ rai dô dê, la lơ̆gay cro kŏng làt roh thơ̆t. 7Ala bơh gư̆n, ƀòn hî bơtău jơno jăk-sai Yang Tơm Trồ dê nơ̆m jơno ndăp-ndơ, la jơno ờs dî pôn-ndăp mà Yang Tơm Trồ sŏng rcăng lơs bơh lai lơ̆gay rai ăn lơi ma jơno gơklŏ ƀòn mơ̆n dê, 8la jơno mà ơ̆ tom du hôi cro găy nơ̆m lơ̆gay cro kwăng ăt-bồ rai dô wơng dî, bơh dilah ƀòn gô wơng, gừn nên-nôn ngăn ƀòn gô ơ̆ pư̆ng điñ Yang ang tơcrà nơ̆m cŭngsî sî pư̆ng. 9Tai bơh gư̆ptî tom jơno cêh lah:

“Jơno măt dahrăư tơmpơl,

tua dahrăư kơnău,

gừn dahrăư sơmơn kơlôi nơ̆m nùs gô,

la lơ̆gay jơno gừn Yang Tơm Trồ sŏng rcăng lơs e ma lơ̆gay cro kơñ-kơloh Kơnràñ.”

10Tai bơh Yang Tơm Trồ sŏng e tơnggư̆t lai Yang Hwîng Goh dê e ma ƀòn hî. Bơh Yang Hwîng Goh swì lăng kơp jơno, ƀăt gư̆m lơ̆gay jơno jrô ndăp Yang Tơm Trồ dê. 11Bơh cro găy nhòng mpôl jơi kon-mơnùs gư̆t dî lơ̆gay jơno nơ̆m du hôi cro. Dilah ơ̆-iyŏ la hwîng-nùs đah nhòng cro gư̆n dê. Kŭng să tơm gô gư̆ptî rơ̆, ơ̆ cro găy đăl gư̆t lơ̆gay jơno gôtrê î Yang Tơm Trồ, mơya nư̆ng Yang Hwîng Goh Yang Tơm Trồ dê gư̆t. 12Mơya ƀòn hî sŏng ơ̆ dưñ-lăñ hwîng dunya dô, mơya la Hwîng Goh trôh bơh Yang Tơm Trồ, lơi ƀòn hî digơlăn gư̆t lơ̆gay jơno bơh Yang Tơm Trồ dî dờp e gời ma ƀòn mơ̆n. 13Ƀòn hî bơtău la lơ̆gay jơno gừn, ơ̆-iyŏ du rư̆ng bơh lơ̆gay jơno niem kŭng jơno jăk-sai kon-mơnùs dê, jơno bơtău tơngkah mơya la bơh Yang Hwîng Goh dê jơno bơtău tơngkah, tơm tŭ rang sơđah lơ̆gay jơno đah hwîng bơh lơ̆gay jơno đah hwîng. 14Mơya cro jăt đah să-jăn khăt-gơboh gừn ơ̆ dưñ-lăñ lơ̆gay jơno gôtrê bơh Yang Hwîng Goh Yang Tơm Trồ dê, bơh ƀòn mơ̆n la jơno wì-lơngôh gôtrê î cro rơ̆, gừn cro rơ̆ ơ̆ dî rgê wă wơng dî bơh ƀòn gô păl gư̆t gung dà jăt dubă đah hwîng. 15E cro gôtrê đah hwîng kơlôi nê̆ kơp jơno, mơya să tơm gô ơ̆ kŏng cro găy kơlôi swì.

16“Bơh cro găy đăl gư̆t khu tơngoh Yang dê — cro găy rơp sơđah bơtău Kơnràñ teh?” Mơya ƀòn mơ̆n gừn dî khu tơngoh Bơtao Krist dê.