1 Kôrintô 1

1Pol, dî hôi-săc lơh cro gơnoăr bơtău dơng Yang Dŏng-Klàs Jesu dê tài bơh nùs-kơñ Yang Tơm Trồ dê, î cro oh mi Sôthen, 2pơyoa ma Hîh Jư̆m Goh Yang Tơm Trồ dê ăm anẵu Kôrintô, la lơ̆gay cro sŏng dî sang-goh nơ̆m Yang Dŏng-Klàs Jesu, rơ̆ la lơ̆gay cro sang-goh dî hôi-săc, băl î lơ̆gay cro ăm kơp anẵu hôi-dăn sơnăn Yang ƀòn mơ̆n, la Yang Dŏng-Klàs Jesu, la Yang ƀòn gô dê gư̆m ƀòn mơ̆n dê. 3Dăn jơno sơmah-sơmai î jơno lơngăp-lơnge bơh Yang Tơm Trồ, la Bàp ƀòn mơ̆n, gừn bơh Yang, la Yang Dŏng-Klàs Jesu, ăm băl î oh mi rôh lŏ.

4Ăñ ưnngai miek Yang Tơm Trồ ăñ jê bơh oh mi rôh lŏ tài bơh jơno sơmah-sơmai Kơnràñ dê, la jơno sŏng dî dờp e ma oh mi rôh lŏ nơ̆m Yang Dŏng-Klàs Jesu. 5Bơh nơ̆m lơ̆gay jơno oh mi rôh lŏ sŏng dî lơh jîng kơnhơ̆p-mơ̆nda nơ̆m Kơnràñ, nơ̆m lơ̆gay jơno tơs gư̆m lơ̆gay jơno gư̆t wơng, 6jăt gư̆ptî jơno cư̆ng-tang bơh Yang Dŏng-Klàs sŏng dî lơh nên iyŏ ngăn nhòng tơmpôl oh mi rôh lŏ, 7tien gơs oh mi rôh lŏ ơ̆ prŏi thơ̆t anẵu jơno sơmah e gời đah hwîng găy, tơm tô̆ jơmrăc-jơmrài ăm cang jơno rang sơđah Yang ƀòn mơ̆n dê, la Yang Dŏng-Klàs Jesu. 8La Bơtao kŭng rơp lơh oh mi rôh lŏ dî pran-kơdăng trôh dî lŭi-dơ̆t, lơi oh mi rôh lŏ rơp ơ̆ anẵu găy ƀoah-đas dî nơ̆m nge Yang ƀòn mơ̆n dê, la Yang Dŏng-Klàs Jesu. 9Yang Tơm Trồ la Bơtao tơpăt-ngăn; tài bơh Kơnràñ mà oh mi rôh lŏ sŏng dî hôi-săc mơ̆t nơ̆m jơno dubă băl î Kon Kơnràñ dê, la Yang Dŏng-Klàs Jesu, Yang ƀòn mơ̆n dê.

10Mơya ơ oh mi rôh lŏ, bơh sơnăn Yang Dŏng-Klàs Jesu ƀòn mơ̆n dê, ăñ kôh-kồt tơngkah lơ̆gay oh mi rôh lŏ lah oh mi rôh lŏ păl dî băl du jơno tơs î bư̆ng lơi wăl lơ̆gay jơno tơmcơlah nhòng oh mi rôh lŏ; mà oh mi rôh lŏ păl du nùs băl î găp nơ̆m băl tơngoh-kơlôi gư̆m nơ̆m du pơnah băl. 11Bơh, ơ oh mi rôh lŏ ăñ jê, kơnơm cro hîh nhă Klôe dê, mà ăñ gư̆t loh-lang bơh oh mi rôh lŏ, lah nhòng tơmpôl oh mi rôh lŏ tom lơ̆gay tơmpôl tơmcơlah găp. 12Jăt ăñ kơlôi la gư̆ptî dô, gư̆n la kơp cro nơ̆m oh mi rôh lŏ tơs lah: “Ăñ gôtrê băl î Pol,” hala “Ăñ gôtrê băl î Apôlôs,” hala “Ăñ gôtrê băl î Sepha,” hala “Ăñ gôtrê băl î Yang Dŏng-Klàs.” 13Yang Dŏng-Klàs sŏng kŏng tơmcơlah ơ̆h? Ơ̆-iyŏ pol sŏng kŏng pư̆ng điñ cŭng sî pư̆ng ala ma oh mi rôh lŏ, iyŏ ngăn? Hala iyŏ ngăn oh mi rôh lŏ sŏng kŏng lăñ ƀaptem e sơnăn Pol? 14Ăñ ưnngai Yang Tơm Trồ bơh ăñ sŏng ơ̆ lơh ƀaptem ma cro găy nơ̆m oh mi rôh lŏ, rlo nư̆ng Krispus î Gaius, 15lơi ơ̆ cro găy digơlăn tơs lah oh mi rôh lŏ sŏng e sơnăn ăñ kŏng lơh ƀaptem. 16(Ăñ kŭng sŏng lơh ƀaptem e ma hîh nhă Stephanas. Makin rơ̆, ăñ ơ̆ gư̆t mơ̆n tom lơh ƀaptem ma cro găy nde te.) 17Bơh Yang Dŏng-Klàs ơ̆ pơđơ ăñ swà lơh ƀaptem, mà la tơs bơtău Jơno Niem, ơ̆-iyŏ bơh jơno tơs jăk-sai, lơi ma sî pư̆ng Yang Dŏng-Klàs dê ơ̆ kŏng lăng la ơ̆ kwơ.

18Bơh jơno Yang î sî pư̆ng dê bulah la jơno wì-lơngôh jăt î lơ̆gay cro sơ̆t-roh, mơya jăt î ƀòn mơ̆n, lơ̆gay cro dî dŏng-klàs, gư̆n la gơnăp-gơnoăr Yang Tơm Trồ dê. 19Bơh tom jơno cêh lah:

“Ăñ rơp tơngroh jơno jăk-sai nơ̆m lơ̆gay cro jăk-sai dê;

gừn Ăñ rơp tă rơm bư̆ng lơ̆ jơno gư̆t wă nơ̆m cro gư̆t ang tơngoh dê.”

20Cro jăk-sai ăm anẵu găy? Cro gơnoăr cêh ăm anẵu găy? Cro jăk jơno tơmbơkai nơ̆m rai-jîng dô ăm anẵu găy? Ơ̆-iyŏ Yang Tơm Trồ sŏng sơlơ̆ jơno jăk-sai nơ̆m dunya gôjîng jơno wì-lơngôh hala ơ̆h? 21Bơh lăng tơmpơl nê̆ lah, nơ̆m jơno jăk-sai Yang Tơm Trồ dê, dunya sŏng ơ̆ đăl gư̆t Yang Tơm Trồ î jơno jăk-sai rơ̆, gư̆n-jîng Yang Tơm Trồ sŏng ơ̆ lơh sơhờp nùs, kơnơm bơh jơno bơtău tơs wì-lơngôh, lơi dŏng-klàs lơ̆gay cro don. 22Tài bơh cro Juđa gừn jôi jăt lơ̆gay têl phadêh, hôm cro Grek gừn jôi lăng jơno jăk-sai. 23Hôm ƀòn hî gừn bơtău tơs bơh Yang Dŏng-Klàs kŏng pư̆ng điñ cŭng sî pư̆ng, bulah la ne-lô̆ sơ̆mpĭñ jư̆ng jăt î cro Juđa, mơya la jơno wì-lơngôh jăt î lơ̆gay cro lang bol bơdih. 24Pơnah nde, jăt î ƀòn gô, la lơ̆gay cro dî hôi-săc, lơ̆gay cro Juđa gư̆m î cro Grek, Yang Dŏng-Klàs la gơnăp-gơnoăr Yang Tơm Trồ dê, î jơno jăk-sai Yang Tơm Trồ dê. 25Bơh jơno mòs sơnrăng Yang Tơm Trồ dê la jơno jăk-sai rlo kon-mơnùs, î jơno lơbăn-lơñô Yang Tơm Trồ dê gừn pran-kơdăng rlo kon-mơnùs.

26Ơ oh mi rôh lŏ, jơno ngăn la oh mi rôh lŏ swì lăng nê̆ jơno hôi-săc mơ̆n, tơmpơl lah ơ̆ khăi cro jăk-sai jăt pơnah poăc-să, ơ̆ khăi cro gơnoăr-pran, kŭng ơ̆ khăi cro tơlôh bơh nŏk-noi dơng mang. 27Mơya, Yang Tơm Trồ sŏng săc-rwơh lơ̆gay jơno wì sơnrăng dunya dê lơi Kơnràñ digơlăn lơh ma lơ̆gay cro jăk-sai ƀasmăt; Yang Tơm Trồ sŏng săc-rwơh lơ̆gay jơno lơbăn-lơñô dunya dê lơi Kơnràñ digơlăn lơh ma lơ̆gay cro pran-kơdăng jîng ƀasmăt, 28gừn Yang Tơm Trồ sŏng săc-rwơh lơ̆gay jơno êt ahên, băl î lơ̆gay jơno kŏng mờc-bơsah nơ̆m dunya, lơ̆gay jơno ơ̆ dî, lơi Kơnràñ digơlăn lơh lơ̆gay jơno tom jîng roh gời, 29bulah e lơ̆gay poăc-să ơ̆ dî tư̆ng yeh jơno găy sơđàp măt Yang Tơm Trồ. 30Mơya kơnơm Kơnràñ, oh mi rôh lŏ ăm nơ̆m Yang Dŏng-Klàs Jesu, la Bơtao dî gôjîng jơno jăk-sai trôh bơh Yang Tơm Trồ dê, tơng-jăt î rơ̆ la jơno tơpăt-durư̆ng, gư̆m jơno jîng sang-goh băl î jơno dŏng tơwai ăn lơi ma ƀòn mơ̆n, 31gư̆n-jîng, gư̆ptî tom jơno cêh lah: “Cro găy tư̆ng yeh să mơ̆n, tư̆ng yeh cĕ mơ̆n nơ̆m Yang.”