Rôma 16

1Makin gư̆n, ăñ săc pơyoa ma oh mi rôh lŏ amî-ua Pheƀe, la cro rôh lŏ ƀòn hî dê, kŭng la cro duh bră Hîh Jư̆m Goh nơ̆m anẵu Senkre, 2lơi oh mi rôh lŏ digơlăn wă-rẵu amî-ua nơ̆m Yang, jăt dubă dî păl î lơ̆gay cro sang-goh, gừn trôh anẵu tơmdŏng amî-ua nơ̆m jơno găy mà amî-ua kơp kơñ trôh oh mi rôh lŏ. Bơh amî-ua kŭng sŏng gôjîng cro tơmdŏng ma khăi cro, ƀăt băl gư̆m să tơm ăñ.

3Dăn còp-să Prissil gư̆m Akwila, lơ̆gay bơyô lơh bră băl ăñ jê nơ̆m Yang Dŏng-Klàs Jesu, 4rơ̆ la tơmpôl cro sŏng phi să rai-jîng mơ̆n tài bơh rai-jîng ăñ jê, ơ̆-iyŏ nư̆ng du hôi ăñ ưnngai ƀòn gô, mà lơ̆gay kơp Hîh Jư̆m Goh lơ̆gay lang bol bơdih dê te, 5gừn còp-să Hîh Jư̆m Goh anẵu hîh ƀòn gô. Dăn còp-să Eƀainet, oh mi kơñ-kơloh ăñ jê, mà amî gư̆n la ple găl năm e ma Yang Dŏng-Klàs lơgơ Asi dê. 6Dăn còp-să Mari, la cro sŏng lơh bră sơòs-sơngeh ngăn bơh oh mi rôh lŏ. 7Dăn còp-să Andrônikơ î Junia, cro găp să ăñ jê gư̆m cro bơyô kŏng jam băl î ăñ, bea hê ƀòn gư̆n la tơmpôl cro tieng pơndrơ nhòng tơmpôl lơ̆gay cro gơnoăr bơtău dơng, mà ƀòn gô kŭng sŏng ăm nơ̆m Yang Dŏng-Klàs lai ăñ. 8Dăn còp-să Amplias, cro bơyô kơñ-kơloh ăñ jê nơ̆m Yang. 9Dăn còp-să Urƀanus, cro bơyô lơh bră băl ƀòn hî dê nơ̆m Yang Dŏng-Klàs, gư̆m Etacis, cro bơyô kơñ-kơloh ăñ jê. 10Dăn còp-să Apel, cro dî dưñ-lăñ nơ̆m Yang Dŏng-Klàs. Dăn còp-să tơmpôl cro gôtrê mađah hîh nhă Aritôƀul. 11Dăn còp-să Herôdiôn, cro găp să ăñ jê. Dăn còp-să tơmpôl cro găy gôtrê mađah hîh nhă Narkissus dê, la tơmpôl cro ăm nơ̆m Yang. 12Dăn còp-să Triphenơ î Triphôsơ, tơmpôl cro kŏng gleh-glăr nơ̆m Yang. Dăn còp-să Persis kơñ-kơloh, la cro sŏng lơh bră sơòs-sơngeh khăi ngăn nơ̆m Yang. 13Dăn còp-să Ruphus, cro dî săc-rwơh nơ̆m Yang, băl î mơi amî gư̆n dê gư̆m ăñ jê. 14Dăn còp-să Asingkrit, Phlegôn, Hermes, Ƀatrôƀa, Hermas, gư̆m lơ̆gay oh mi rôh lŏ ăm băl î ƀòn gô. 15Dăn còp-să Philôlôgơ î Juli, Nereus î rôh amî gư̆n, băl î Ôlimpas gư̆m lơ̆gay cro sang-goh ăm î ƀòn gô. 16Păl lơh nùs kingam băl ma găp bơh î jơno cư̆m sang-goh. Lơ̆gay kơp Hîh Jư̆m Goh Yang Dŏng-Klàs dê còp-să oh mi rôh lŏ.

17Pơnah nde, ơ oh mi rôh lŏ, ăñ dăn tơngkah oh mi rôh lŏ kơhea cĕ î lơ̆gay cro lơh jîng jơno tơmcơlah gư̆m lơh sơmăm tìs, tơblơ̆ î jơno bơtău mà oh mi rôh lŏ sŏng bơtê, gừn pleh cĕ wĭc bơh ƀòn gô. 18Bơh lơ̆gay cro gư̆p tîgư̆n ơ̆ don-duh Yang ƀòn mơ̆n, la Yang Dŏng-Klàs, mơya la bơh klô̆ng să mơ̆n dê, gư̆m bơh jơno lơnguơ̆t bơkah î jơno rơmhòc, ƀòn gô pơlum lơi lơ̆gay cro ơ̆ kơđư̆ng nùs. 19Bơh nùs don dẵư oh mi rôh lŏ dê sŏng pơndrơ lam trôh kơp cro. Bơh gư̆n, ăñ sơhờp-sờhơn bơh oh mi rôh lŏ, mơya ăñ kơñ oh mi rôh lŏ dî jơno jăk-sai đah jơno niem, mà sang-goh gôtrê î jơno bờk-mơsăk. 20Yang Tơm Trồ jơno lơngăp-lơnge dê rơp jă trăm Satan nteàh jư̆ng oh mi rôh lŏ dubă khơñ ngăn.

Dăn jơno sơmah Yang ƀòn mơ̆n dê, la Yang Dŏng-Klàs Jesu, ăm î oh mi rôh lŏ.

21Timôthe, bơyô lơh bră băl ăñ jê, băl î Lusius, Jasôn, gư̆m Sôsipater, lơ̆gay cro găp să ăñ jê, pơyoa jơno còp-să oh mi rôh lŏ. 22Ăñ, la Tertius, cro cêh sră pơyoa dô, pơyoa jơno còp-să oh mi rôh lŏ nơ̆m Yang. 23Gaius, cro wă-rẵu ăñ gư̆m jơh Hîh Jư̆m Goh, pơyoa jơno còp-să oh mi rôh lŏ. Erastus, cro prăp đam priè ƀòn dơng dê, băl î cro oh mi Kwatus, pơyoa jơno còp-să oh mi rôh lŏ. 24[Dăn jơno sơmah-sơmai Yang ƀòn mơ̆n dê, la Yang Dŏng-Klàs Jesu, ăm băl î jơh lơ̆gay oh mi rôh lŏ. Amen.]

25Dăn jơno gơklŏ gôtrê ma Bơtao digơlăn lơh oh mi rôh lŏ pran kơđư̆ng jăt Jơno Niem ăñ jê gư̆m jơno bơtău tơs Yang Dŏng-Klàs Jesu, jăt jơno sơđah gư̆t lai bơh jơno ndăp-ndơ ờs dî pôn-ndăp nơ̆m tô̆ tơnge kơp jŏ rai sơlèt rlo khăi bơh kơp rai, 26mơya nge dô sŏng dî e sơđah tơnggư̆t mơya bơh lơ̆gay Sră-Goh cro gơnoăr-hwơr, jăt gơnoăr pơđơ Yang Tơm Trồ hôm miek miek dê, sŏng dî tơs ma kơp lang bol lơi kơlôi trôh jơno don dẵư nơ̆m jơno don dê, 27dăn jơno gơklŏ gôtrê ma Kơnràñ, la Yang Tơm Trồ jăk-sai dơng rlo, kơnơm Yang Dŏng-Klàs Jesu, trôh dî miek miek. Amen.