Rôma 15

1Mơya ƀòn mơ̆n, la cro pran-kơdăng, păl añ ơnong lơ̆gay jơno lơbăn-lơñô cro ơ̆ pran dê, gư̆m ơ̆ dî lơh tồ niem-nùs mơ̆n. 2Kơp cro nơ̆m ƀòn mơ̆n păl lơh niem-nùs cro tĕdơ mơ̆n bơh du jơno lơh nên niem-lơhơn, kơlôi trôh bră băt bơtao cro gư̆n. 3Bơh ƀăt să tơm Yang Dŏng-Klàs sŏng ơ̆ lơh niem-nùs să tơm mơ̆n. Tơblơ̆ wăl, gư̆ptî jơno sŏng dî cêh lah: “Lơ̆gay jơno bua wac-rma ơm lơ̆gay cro dê tơngyŏ-tơnghiel dî Kơnràñ sŏng gôtôh wăl cŭngsî kon.” 4Tài bơh gư̆t nhẵư jơno sŏng dî cêh nteàh bơh lai ƀua, gừn sŏng dî cêh wăl bơh jơno ƀăn mơntău ma să tơm ƀòn mơ̆n, lơi kơnơm bơh jơno ăt-ăl gư̆m kơnơm bơh jơno pơndơm-pơnieng Sră-Goh dê, ƀòn mơ̆n dî nùs cang-kơnơm. 5Dăn Yang Tơm Trồ jơno ăt-ăl dê î jơno pơndơm-pơnieng dờp e ma oh mi rôh lŏ lơi dî băl du nùs-nhơ̆m băl î găp jăt gư̆ptî Yang Dŏng-Klàs Jesu, 6lơi ma oh mi rôh lŏ digơlăn dî du nùs băl, bơh du-dẵư jong-rơ Yang Tơm Trồ, la Bàp Yang ƀòn mơ̆n dê, la Yang Dŏng-Klàs Jesu.

7Tîgư̆n, wă-rẵu cĕ găp, kŭng gư̆ptî Yang Dŏng-Klàs sŏng wă-rẵu oh mi rôh lŏ, lơi kơlôi trôh jơno ang gơklŏ Yang Tơm Trồ dê. 8Bơh ăñ dăn tơs lah Yang Dŏng-Klàs sŏng dî lơh gôjîng dê̆-gơna lang bol kŏng koh kato tài bơh jơno-tơpăt Yang Tơm Trồ dê, lơi lơh cư̆ng-tang jơno hăư lơ̆gay ông-pang ƀòn mơ̆n dê, 9mơya la lơi lơ̆gay lang bol bơdih jong-rơ Yang Tơm Trồ tài bơh nùs kơloh-kơlài Kơnràñ dê, gư̆ptî jơno sŏng dî cêh lah:

“Tài bơh gư̆n, kon rơp đăl gư̆t Kơnràñ nhòng lơ̆gay lang bol bơdih

gư̆m đas-sờ jong-rơ sơnăn Kơnràñ.”

10Tơs wăl te dî cêh lah:

“Lơ̆gay lang bol bơdih, păl sơhờp-sờhơn cĕ băl î lang bol Kơnràñ.”

11Gừn tơs te lah:

“Lơ̆gay lang bol bơdih, păl jong-rơ cĕ Yang;

lơ̆gay lang bol, păl đas-sờ jong-rơ Kơnràñ.”

12Gừn Esai tơs bơtăl te lah:

“Tơm-rieh Jese dê rơp sơđah tơlôh, la Bơtao dî rơndôh ñă lơi ăt-bồ lơ̆gay lang bol bơdih.

Lơ̆gay lang bol bơdih rơp dî nùs cang-kơnơm anẵu Kơnràñ.”

13Dăn Yang Tơm Trồ jơno cang-kơnơm dê lơh oh mi rôh lŏ bîng-tăl lơ̆gay jơno sơhờp-sờhơn gư̆m jơno lơngăp-lơnge nơ̆m jơno don, lơh ma oh mi tơngkah-tơngkăñ nơ̆m jơno cang-kơnơm kơnơm bơh jơno gơnăp-gơnoăr Yang Hwîng Goh.

14Pơnah nde, ơ oh mi rôh lŏ ăñ jê, să tơm ăñ kŭng dî mơ̆ndơm gôtrê bơh oh mi rôh lŏ lah să tơm oh mi rôh lŏ kŭng dî prăp bîng jơno lơbăn-niem, bơh sŏng dî bơbua bîng lơ̆gay tơngoh jăk, gư̆m dî pran ayua lơi ƀăn tơngkah băl î găp. 15Mơya ăñ sŏng cêh dubă pran-kơdăng ma oh mi rôh lŏ khăi rlo nơ̆m anẵu dô anẵu tò gư̆ptî lơi tơngkah oh mi rôh lŏ, tài bơh jơno sơmah Yang Tơm Trồ sŏng dî dờp e ma ăñ, 16lơi lơh ăñ jîng du hôi cro dê̆-gơna Yang Dŏng-Klàs Jesu dê ma lơ̆gay lang bol bơdih, tơm tô̆ lơh cro gơnoăr ăn jơno duh-khoai ma Jơno Niem Yang Tơm Trồ, lơi ma jơno ăn duh-khoai lơ̆gay lang bol bơdih digơlăn dî sơhờp nùs dưñ-lăñ, bơh dơ̆ dî rao lơhiê bơh Yang Hwîng Goh. 17Gư̆n-jîng, nơ̆m Yang Dŏng-Klàs Jesu, ăñ dî jơno yeh să mơ̆n gôtrê bơh lơ̆gay bră lơh gôtrê ma Yang Tơm Trồ. 18Bơh ăñ rơp ơ̆ khơ̆n-sa tơs kơp jơno găy mà bră gư̆n ơ̆-iyŏ Yang Dŏng-Klàs sŏng lơh bơh ăñ, lơi iyà trôh jơno don-duh lơ̆gay lang bol bơdih — bơh jơno tơs gư̆m bră lơh, 19bơh î jơno pran-kơdăng lơ̆gay têl phadêh, gư̆m gơnoăr phadêh, bơh î gơnăp-gơnoăr Hwîng Yang Tơm Trồ dê tien gơs ăñ sŏng tơs bơtău Jơno Niem Yang Dŏng-Klàs dubă wêl-tăl bơh Jerusalem gư̆m tĕdơ trôh dî anẵu Iliri; 20mà jăt dubă tîgư̆n, kư̆ sơh nùs î jơno ham-hà tơs bơtău Jơno Niem ơ̆-iyŏ nơ̆m anẵu Yang Dŏng-Klàs sŏng dî răc-dăn, lơi ăñ ơ̆ băt bơtao kơnơm nơ̆m cŭngsî mơnang cro nde dê. 21Mơya, gư̆ptî jơno sŏng dî cêh lah:

“Tơmpôl cro hôm dahrăư dî tơs tơnggư̆t bơh Kơnràñ gừn rơp tơmpơl,

gư̆m tơmpôl cro hôm dahrăư dî kơnău gừn rơp gư̆t wơng.”

22Tîgư̆n, khăi dơ̆ ăñ sŏng kŏng kơ̆p-cơkhă lơi trôh ma oh mi rôh lŏ. 23Mơya jơ dô, bơh ơ̆ hôm tom anẵu nơ̆m lơ̆gay bơlao ƀòn dô te, mơya khăi jŏ năm lờt bơh rong-siem nùs kơp kơñ trôh còp-să bơh oh mi rôh lŏ, 24gư̆n-jîng dilah jơ găy ăñ swà gung trôh Tăy Ƀan Ña, ăñ cang-kơnơm ngăn, tơm tô̆ swà găn, tơmtom oh mi rôh lŏ, gừn dî oh mi rôh lŏ tơmdŏng trôh nơ̆m gư̆n, dilah lai ngăn ăñ dî rngai nùs î oh mi rôh lŏ nhòng dư̆ng-iè jŏ. 25Hôm jơ dô ăñ ndăng nơ̆m gung swà trôh Jerusalem lơi tơmdŏng lơ̆gay cro sang-goh. 26Bơh cro Maseđoan gư̆m Acai sŏng sơhờp nùs lơh du jơno rê̆ jên-priè tơmdŏng bră năy e ma lơ̆gay cro kơsòt-rƀah nhòng tơmpôl cro sang-goh anẵu ƀòn dơng Jerusalem. 27Bơh ƀòn gô sŏng sơhờp nùs gư̆m ƀòn gô la lơ̆gay cro kađòng dồs lơ̆gay cro rơ̆. Bơh dilah lơ̆gay lang bol bơdih dî sơndơn băl lơ̆gay jơno lơnge đah hwîng nơ̆m lơ̆gay cro rơ̆, gừn ƀòn gô kŭng dî pơnah duh bră lơ̆gay cro rơ̆ bơh pơnah jini-jơno. 28Tîgư̆n, tơm tô̆ sŏng lơh bră dô gư̆m gư̆t ngăn jơno e gời jơno rê̆ jên-priè dô trôh î ƀòn gô, gừn ăñ rơp sơntơm swà găn oh mi rôh lŏ lơi trôh anẵu Tăy Ƀan Ña. 29Mà ăñ gư̆t lah tơm tô̆ trôh î oh mi rôh lŏ, ăñ rơp trôh băl î jơno lơnge lơngẵu jơno bîng-tăl Yang Dŏng-Klàs dê.

30Pơnah nde, ơ oh mi rôh lŏ, bơh Yang ƀòn mơ̆n, la Yang Dŏng-Klàs Jesu, gư̆m bơh jơno kơñ-kơloh Yang Hwîng Goh dê, ăñ răc-dăn oh mi rôh lŏ du nùs băl lơi tơmlơh î ăñ bơh lơ̆gay jơno hôi-dăn ala ma ăñ kơlôi trôh Yang Tơm Trồ, 31lơi ăñ digơlăn dî dŏng-tă klàs bơh sơ tơmpôl cro ơ̆ don-duh anẵu lơgơ Juđe, î lơi bră tơmdŏng ăñ jê ăn lơi ma Jerusalem digơlăn dî sơhờp nùs dưñ-lăñ bơh lơ̆gay cro sang-goh; 32lơi ma bơh nùs-kơñ Yang Tơm Trồ dê, ăñ digơlăn trôh î oh mi rôh lŏ nơ̆m jơno sơhờp-sờhơn, bơh dî ngăc-ngăr î oh mi rôh lŏ. 33Dăn Yang Tơm Trồ lơngăp-lơnge ăm băl î lơ̆gay oh mi rôh lŏ. Amen.