1 Kôrintô 6

1Tơm tŭ cro găy nơ̆m oh mi rôh lŏ tom jơno bră khơ̆n-sa ngăn tơmdră î cro nde, lơi kŏng kwăng ƀang cahrña sơđàp măt lơ̆gay cro ơ̆ tơpăt-durư̆ng, mà ơ̆-iyŏ sơđàp măt lơ̆gay cro sang-goh. 2Hala oh mi rôh lŏ ơ̆ gư̆t lah lơ̆gay cro sang-goh rơp cahrña dunya? Gừn dilah dunya rơp kŏng cahrña bơh oh mi rôh lŏ, gừn oh mi rôh lŏ ơ̆ tăl gơnoăr-pran bơh lơ̆gay jơno bră tơmyă êt ăt ngăn dô ơ̆h? 3Oh mi rôh lŏ ơ̆ gư̆t lah ƀòn mơ̆n rơp cahrña lơ̆gay cro gơndrơh ơ̆h? Dơ-ai lah trôh lơ̆gay jơno nơ̆m rai dô dê teh? 4Tîrơ̆ gừn, bulah oh mi rôh lŏ dî lơ̆gay jơno tơmyă tơmbă gôtrê î rai dô, ngglơh oh mi rôh lŏ ăn lơ̆gay cro gư̆n nggui cahrña, rơ̆ la lơ̆gay cro kŏng lăng ơ̆-iyŏ ơ̆-iyơ̆n nơ̆m Hîh Jư̆m Goh? 5Ăñ ndăng tơs bơh jơno păl ƀasmăt oh mi rôh lŏ dê. Gư̆ptî gư̆n, ơ̆-iyŏ ơ̆ tom cro jăk-sai găy nơ̆m oh mi rôh lŏ, la cro rơp digơlăn rơndăp wăl jơno ơ̆ du nùs băl nơ̆m nhòng oh mi rôh lŏ mơ̆n ơ̆h? 6Tơblơ̆ wăl, oh mi dô tơmdră wăl oh mi năy kŏng lơboh lêh ma cro cahrña, gừn jơno bră rơ̆ ăm sơđàp măt lơ̆gay cro ơ̆ don! 7Gư̆n-jîng, nơ̆m jơno dô ờs tom la lơ̆gay du jơno ơ̆ lơh dî jăt î oh mi rôh lŏ lờt, bơh oh mi rôh lŏ tom lơ̆gay jơno tơmyă tơmbă nhòng tơmpôl să tơm mơ̆n. Bơh no-gwơh kŏng alah tien gơs ơ̆ niem. Bơh no-gwơh oh mi rôh lŏ niem rlo kŏng pơlum mơ̆ndơm la niem rlo teh? 8Mơya, oh mi rôh lŏ lơh cahrña bơklơ̆n î blăc-pơlum, sŏng lơh tîgư̆n î oh mi rôh lŏ mơ̆n! 9Hala oh mi rôh lŏ ơ̆ gư̆t lah cro ơ̆ tơpăt-durư̆ng rơp ơ̆ dî sơndơn lơgơ Yang Tơm Trồ? Bư̆ng lơi kŏng blăc-pơlum; ơ̆ tom cro duh-khoai rồp-ràk cro sơlăp-sơbêl, cro rês-àr bơnan, cro-klo adoă cro-klo, cro-ua adoă cro-ua bĭc ăm î găp, 10cro kơntô̆ng-kơño, cro ham-hà, cro mañơ̆l-lơmbẵy, cro tơmbơcĕ hala cro blăc-pơlum, rơp ơ̆ dî dưñ-lăñ lơgơ Yang Tơm Trồ. 11Gừn du pơnah cro nơ̆m oh mi rôh lŏ sŏng lơh gư̆ptî gư̆n. Mơya, nơ̆m sơnăn Yang, la Yang Dŏng-Klàs Jesu, gừn tài bơh Hwîng Yang Tơm Trồ ƀòn mơ̆n dê, oh mi rôh lŏ sŏng dî rao lơhiê, sŏng dî sang-ngơt, î dî sơnăn la tơpăt-durư̆ng.

12“Lơ̆gay jơno jăt î ăñ la dî gơnoăr lơh,” mơya ơ̆-iyŏ bơh lơ̆gay jơno kŭng iyà trôh kwơ. “Lơ̆gay jơno jăt î ăñ la dî gơnoăr lơh,” mơya ơ̆ tom bulah jơno găy rơp kŏng lơh dê̆ ma ăñ. 13“Jơno sa ăn lơi ma klô̆ng, î klô̆ng ăn lơi ma jơno sa,” mơya Yang Tơm Trồ rơp tơngroh lơ̆ jơno dô gư̆m jơno năy. Mơya să-jăn ơ̆-iyŏ ăn lơi ma jơno lơh sơlăp-sơbêl, mơya ăn lơi ma Yang, gừn Yang ăn lơi ma să-jăn. 14Ngăn, Yang Tơm Trồ sŏng lơh Yang Kon jîng wăl, bơh gơnăp-gơnoăr Kơnràñ dê kŭng rơp lơh ƀòn mơ̆n jîng wăl. 15Oh mi rôh lŏ ơ̆ gư̆t lah să-jăn mơ̆n la pơnah să-jăn Yang Dŏng-Klàs dê ơ̆h? Tîrơ̆ gừn, ma-ngkơi jơ lăñ dî pơnah să-jăn Yang Dŏng-Klàs dê, ăñ sơlơ̆ ƀòn gôjîng pơnah să-jăn cro kliê dê hala ơ̆h? Ơ̆ jơ găy tom bră rơ̆ ờ! 16Hala oh mi rôh lŏ ơ̆ gư̆t lah cro găy tơm bơrkòt să tơm mơ̆n î cro kliê la du-lăm prồt rlău î gô teh? Bơh tom jơno cêh lah: “Bea hê cro rơp gôjîng du-lăm prồt rlău băl.” 17Mơya cro găy tơm bơrkòt să tơm mơ̆n î Yang gừn la du pơnah hwîng-nùs băl î Kơnràñ. 18Pleh wĭc cĕ jơno sơlăp-sơbêl! Lơ̆gay glài nde mà kon-mơnùs lơh tìs tom iyŏ la ăm đah makin să-jăn, mơya cro lơh jơno sơlăp-sơbêl gừn tìs-glài î să-jăn mơ̆n. 19Hala oh mi rôh lŏ ơ̆ gư̆t lah să-jăn mơ̆n la hîh duh-khoai Yang Hwîng Goh dê, ăm nơ̆m oh mi rôh lŏ, la Bơtao mà oh mi rôh lŏ lăñ bơh Yang Tơm Trồ? Gừn oh mi rôh lŏ ơ̆ gôtrê ma să tơm mơ̆n, 20bơh oh mi rôh lŏ sŏng dî tăc tơwai dubă dơng mang ngăn lờt. Bơh tîgư̆n, lơh gơklŏ cĕ sơnăn Yang Tơm Trồ î să-jăn mơ̆n.