1 Kôrintô 7

1Hôm bơh lơ̆gay jơno mà oh mi rôh lŏ sŏng cêh lah: “Niem ngăn ma cro-klo ơ̆ ăm băl tơmpơ̆p î cro-ua.” 2Mơya bơh jơno pơlum ơn-ñai jơno sơlăp-sơbêl, kơp să cro-klo păl jôi bo-ua ma să tơm mơ̆n, gừn kơp să cro-ua păl jôi bo-klo ma să tơm mơ̆n. 3Bo-klo păl lơh wêl-tăl gơnoăr bră gôtrê î bo-ua, hôm bo-ua jăt î bo-klo kŭng durư̆ng gư̆ptî gư̆n. 4Bo-ua ơ̆ dî gơnoăr nơ̆m să-jăn mơ̆n dê, mơya la bo-klo. Mơya gư̆ptî gư̆n, bo-klo kŭng ơ̆ dî gơnoăr nơ̆m să-jăn mơ̆n dê, mơya la bo-ua. 5Bư̆ng khan tơmlơi găp, rlo la bơh jơno du nùs băl nơ̆m tô̆ tơnge lơh nên ngăn lơi oh mi rôh lŏ digơlăn lơ̆ nùs hôi-dăn, sŏng ăm wăl băl î găp, bulah lơi Satan ơ̆-rgê digơlăn pơlum ơn-ñai oh mi rôh lŏ bơh mơ̆n dê prŏi jơno ăm jư să.

6Mơya, ăñ tơs jơno dô gư̆ptî du-lăm jơno ăt-ăl băl, ơ̆-iyŏ gư̆ptî gơnoăr pơđơ. 7Mơya ăñ kơp kơñ lơ̆gay cro tien gơs dî gư̆ptî ăñ. Bulah tîgư̆n, kơp cro dî jơno e gời dêh bơh Yang Tơm Trồ, bulah tom cro tîdô, mơya tom cro mƀà dî jơno nde. 8Hôm jăt î lơ̆gay cro rlung hôm dahrăư tơmhòp î lơ̆gay cro-ua mơ̆ndro, ăñ pơđơ lah dilah ƀòn gô kư̆ lơh miek te gư̆ptî ăñ la niem. 9Mơya dilah ƀòn gô ơ̆ kơhea-să mơ̆n dî, gừn ƀòn gô jôi bo cĕ. Bơh jôi bo gừn niem rlo jơno ham-kơñ bơtrôt. 10Hôm jăt î lơ̆gay cro găy sŏng tơmhòp gừn ăñ pơđơ — ơ̆-iyŏ ăñ, mơya la Yang — lah bo-ua bư̆ng tơmlơi căư î bo-klo 11(mơya tien gơs dilah cro-ua rơ̆ sŏng kŏng tơmlơi căư, gừn cro-ua rơ̆ păl kư̆ ăm iyờp tîrơ̆ ơ̆ jôi bo te, hala păl mơ̆ndơm î bo-klo), gư̆n bo-klo gừn ơ̆ dî tơmlơi căư bo-ua. 12Mơya jăt î lơ̆gay cro hôm wăl gừn ăñ tơs wăl — î ăñ bơh ơ̆-iyŏ Yang — dilah oh mi rôh lŏ găy dî bo-ua hôm dahrăư don, gừn cro-ua rơ̆ du nùs-kơñ jîng băl î mơ̆n, gừn oh mi ơ̆ dî tơmlơi căư cro-ua rơ̆. 13Dilah du hôi cro-ua găy dî bo-klo hôm dahrăư don Yang gừn cro rơ̆ dî nùs-kơñ jîng băl î mơ̆n, gừn bo-ua ơ̆ dî tơmlơi căư bo-klo. 14Bơh bo-klo hôm dahrăư don Yang kơnơm bo-ua mơ̆n dî sang-goh, î bo-ua hôm dahrăư don Yang kơnơm cro oh mi gư̆n dî sang goh. Bơh dilah ơ̆, gừn kon so oh mi rôh lŏ la ơ̆ dî sang goh, mơya jơ dô ƀòn gô dî sang-goh. 15Hôm dilah cro ơ̆ don Yang gư̆n tơmcơlah gung dêh, gừn lơi cĕ cro rơ̆ dî tơmcơlah gung dêh, Nơ̆m pơnah jơno gư̆n, cro oh mi hala rôh lŏ rơ̆ ơ̆ kŏng rôn-bơklơ̆n, mơya la Yang Tơm Trồ sŏng hôi-săc ƀòn mơ̆n ăm nơ̆m jơno lơngăp-lơnge. 16Bơh, ơ cro la oh mi ua, amơh lơh oh mi ua gư̆t tom ngăn lah oh mi ua rơp dŏng-klàs dî bo-klo mơ̆n? Hala, ơ cro oh mi, amơh lơh oh mi gư̆t digơlăn lah oh mi rơp dŏng-klàs dî bo-ua mơ̆n? 17Dilah ơ̆ dî, gừn Yang sŏng e tơmpà ma kơp cro amơh te, Yang Tơm Trồ sŏng hôi-săc kơp cro tîrơ̆ teh, lơbà swà cĕ tîrơ̆, Gừn ăñ lơh nên tîgư̆n nơ̆m lơ̆gay Hîh Jư̆m Goh. 18Tom cro găy sŏng dî hôi-săc ma-ngkơi jơ sŏng koh kato ờ ơ? Cro rơ̆ bư̆ng jîng gư̆ptî hôm dahrăư koh kato. Tom cro găy sŏng dî hôi-săc nơ̆m nùs hôm tua dahrăư koh kato ờ ơ? Cro gư̆n bư̆ng păl koh kato. 19Jơno koh kato ơ̆-iyŏ la no-jơno găy, ơ̆ koh kato kŭng ơ̆-iyŏ la no-jơno găy, mơya la jơno păl prăp jư lơ̆gay jơno pơđơ bơlăm Yang Tơm Trồ dê. 20Kơp cro, nơ̆m jơno hôi-săc mà mơ̆n sŏng dî hôi-săc, gừn kư̆ pơnjăt te nơ̆m gơnoăr bră rơ̆. 21Tom iyŏ oh mi rôh lŏ sŏng dî hôi-săc nơ̆m pơnah să-jăn cro lơh dê̆ teh? Bư̆ng lơi jơno gư̆n lơh ma oh mi rôh lŏ kơlôi-sơnư̆ng. Mơya, dilah oh mi rôh lŏ ngăn digơlăn gôjîng dî khăt-gơboh, gừn păl dưñ kadăm bơkhê tô̆ lơwah la niem rlo. 22Bơh du hôi cro la ăm lơh dê̆-gơna, dî hôi-săc nơ̆m Yang gừn gôjîng cro khăt-gơboh Yang dê. Kŭng tîgư̆n, cro khăt-gơboh dî hôi-săc gừn gôjîng cro dê̆-gơna Bơtao Krist dê. 23Oh mi rôh lŏ sŏng dî tăc tơwai dubă dơng mang ngăn lờt; bư̆ng lơh gôjîng cro ăm lơh dê̆ ma kon-mơnùs. 24Ơ oh mi rôh lŏ, nơ̆m nùs tua găy kơp cro ăm tơm tô̆ dî hôi-săc, gừn kư̆ pơnjăt te nơ̆m nùs tua gư̆n î Yang Tơm Trồ.

25Mơya gôtrê trôh tơmpôl cro rlung, ăñ ơ̆ dî jơno gơnoăr pơđơ Yang dê. Mơya, ăñ sŏng e tơlôh jơno bơyê bơh sŏng lăñ dî jơno sơmah kơloh-kơlài bơh Yang, lơi la du hôi cro dî păl don kơnơm. 26Bơh gư̆n, ăñ kơlôi lah, nùs tua rơ̆ la tài bơh jơno kàs kĕ ơ̆ tăl sŏng trôh en, e ma du hôi cro kư̆ pơnjăt te ăm la niem, lah niem ngăn nơ̆m tô̆ dô la gư̆p tîgư̆n ya. 27Tom iyŏ oh mi dî rôn-bơklơ̆n î bo-ua ya? Bư̆ng jôi jơno tơlôh klàs. Tom iyŏ oh mi dî tơlôh klàs bơh bo-ua ờ ơ? Bư̆ng jôi bo-ua. 28Mơya dilah oh mi tơmhòp bo-ua, gừn oh mi ơ̆ tìs-glài; gừn dilah du hôi ua-drôh jôi bo-klo gừn cro-ua rơ̆ kŭng ơ̆ tìs-glài. Mơya, lơ̆gay cro tîrơ̆ rơp tom jơno gleh-glăr nơ̆m să-jăn, mà ăñ kơñ oh mi rôh lŏ păl pleh jơno gư̆n. 29Mơya, ơ oh mi rôh lŏ, ăñ dăn tơs jơno dô lah: Tô̆ tơnge gừn sŏng kŏng êt ngăn, bulah e bơh dô trôh ma-ngkơi, kơp gư̆m lơ̆gay cro dî bo-ua, gừn păl lơh gư̆ptî ơ̆ dî; 30lơ̆gay cro ñim, gừn gư̆ptî ơ̆ ñim; cro găy sơhờp-sờhơn, gừn gư̆ptî ơ̆ sơhờp; lơ̆gay cro tăc crăm, gừn gư̆ptî ơ̆ tom dî jơno găy prăp ăn lơi; 31î lơ̆gay cro ngui sa jini-jơno dunya, gừn gư̆ptî ơ̆-iyŏ ngui sa, bơh rồp-să tô̆ dô nơ̆m dunya dô ndăng roh ha-ău. 32Pơnah nde, ăñ kơp kơñ oh mi rôh lŏ dî klàs kơlôi-sơnư̆ng. Cro ăm rlung kơlôi-sơnư̆ng trôh lơ̆gay jơno gôtrê bơh Yang, dubă găy mà mơ̆n digơlăn lơh niem-nùs Yang. 33Mơya cro-klo sŏng dî bo gừn mơwăl ngăn lơ̆gay bră rai dô dê, dubă tîgay cro bo-klo digơlăn lơh sơhờp nùs bo-ua mơ̆n, î cro gư̆n kŏng kơlôi-sơnư̆ng. Cro-ua ăm rlung hala cro ua-drôh; 34kơlôi-sơnư̆ng lơ̆gay jơno gôtrê bơh Yang, amơh lơh lơi mơ̆n digơlăn dî sang-goh lơ̆ nơ̆m să-jăn gư̆m nơ̆m hwîng-nùs. Mơya cro-ua sŏng dî bo gừn mơwăl ngăn lơ̆gay bră rai dô dê, dubă găy cro bo-ua digơlăn lơh sơhờp nùs bo-klo mơ̆n. 35Mơya, ăñ ndăng tơs jơno dô bơh jơno kwơ să tơm oh mi rôh lŏ dê, ơ̆-iyŏ lơi ăñ digơlăn ăn kơ̆ndăp rôn-bơklơ̆n oh mi rôh lŏ dê, mơya lơi kơñ kơlôi trôh jơno duh bră dubă dî păl gừn ờs lơh ma Yang dubă ơ̆ swai tơngoh. 36Mơya dilah cro găy kơlôi lah mơ̆n ndăng tơs răk-sa ơ̆-iyŏ î kon ua hôm drôh mơ̆n dê — tom iyŏ cro-ua rơ̆ digơlăn kŏng rlo tom gừn bơh rơ̆ bră tơmhòp dî tơlôh ngăn — cro rơ̆ lơh cĕ jơno mơ̆n kơp kơñ. Cro rơ̆ ơ̆ tìs-glài; lơi cĕ ƀòn gô tơmhòp bo. 37Hôm cro găy kơlôi bơkhê nhòng nùs mơ̆n, ơ̆ tom jơno rôn-bơklơ̆n, mà dî gơnoăr lơ̆ jăt nùs-kơñ să tơm mơ̆n dê, î cro rơ̆ sŏng lơh nên — gư̆p tîgư̆n nhòng nùs mơ̆n lơi prăp jư kon ua-drôh rlung môl mơ̆n dê — gừn cro rơ̆ rơp tơs răk-sa dubă dî păl ngăn. 38Gư̆p tîgư̆n, cro jôi bo kon ua-drôh rlung mơ̆n lơh dî păl, gừn cro ơ̆ tơmhòp bo kon ua tien gơs rơp lơh niem-nùs rlo te. 39Bo-klo hôm jîng dư̆ng găy, gừn bo-ua kŏng tơm koàt jŏ miek mơ̆n. Mơya dilah bo-klo sơ̆t, gừn cro-ua rơ̆ dî khăt-gơboh tơmhòp bo î cro-klo găy mơ̆n kơñ, nư̆ng la păl ăm nơ̆m Yang. 40Mơya, jăt nùs-kơlôi ăñ jê gừn cro-ua rơ̆ dî lơnge lơngẵu rlo dilah digơlăn kư̆ pơnjăt te ăm jîng gư̆p tîgư̆n. Mơya ăñ kơlôi lah mơ̆n kŭng dî Hwîng Yang Tơm Trồ dê.