1 Kôrintô 8

1Bơh lơ̆gay jơno ăn duh-khoai ma rồp-ràk: Ƀòn mơ̆n gư̆t lah lơ̆gay ƀòn mơ̆n dî jơno jăk-sai. Jơno jăk-sai gừn lơh tơlôh jơno pơnhừ-să, mơya nùs kơñ-kơloh gừn bơ̆t bơtao. 2Dilah cro găy kơlôi mơ̆n gư̆t jơno găy gư̆n, gừn cro rơ̆ kŭng hôm dahrăư gư̆t gư̆ptî mơ̆n păl gư̆t. 3Mơya dilah cro găy kơloh ngăn Yang Tơm Trồ, gừn Kơnràñ dî đăl gư̆t cro rơ̆ ya. 4Tîgư̆n, bơh bră sa lơ̆gay jơno ăn duh-khoai ma rồp-ràk: Ƀòn mơ̆n gư̆t lah rồp-ràk nơ̆m lơgơ dunya la ơ̆ kwơ, gừn lah ơ̆ tom Yang sang-goh găy, nư̆ng du hôi Yang Tơm Trồ dơng mang ngăn. 5Bơh bulah e tom lơ̆gay jơno dî sơnăn la hwîng, hala ăm cŭngsî trồ hala nteàh ù, gôlơh gư̆ptî tom khăi “hwîng” î khăi “yang,” 6mơya jăt î ƀòn mơ̆n tom nư̆ng du hôi Yang Tơm Trồ, la Yang Bàp, Bơtao mà lơ̆gay jini-jơno sơntơm tơlôh, gừn la Bơtao mà ƀòn mơ̆n kơlôi trôh, băl du hôi Yang la Yang Dŏng-Klàs Jesu, kơnơm Kơnràñ mà lơ̆gay jơno puôn jư̆ng dî mon bơjîng, î kơnơm Kơnràñ mà ƀòn mơ̆n dî jîng miek.

7Mơya, jơno wơng gư̆t dô ơ̆ ăm nơ̆m kơp cro. Mơya khăi cro năy jăt jơno ờs dờm bơh lai trôh dô î rồp-ràk, ƀòn gô sa lơ̆gay jơno gư̆n gôlơh gư̆ptî jơno sŏng ăn duh-khoai ma rồp-ràk. Sŏng gư̆n nùs tua ờs lơbăn-lơñô ƀòn gô dê kŏng sơmơ̆-sơmĭñ. 8Pơnah nde, jơno sa rơp ơ̆ iyà ƀòn mơ̆n trôh en Yang Tơm Trồ, dilah ơ̆ sa, ƀòn mơ̆n kŭng ơ̆ prŏi dî, dilah sa ƀòn mơ̆n kŭng ơ̆ dî bơtăl khăi te. 9Mơya kơhea cĕ, lơi gơnoăr khăt-gơboh dô oh mi rôh lŏ dê bulah lơh î dubă găy rơ̆ digơlăn gôjîng bơh pơnah sơmăm tìs ma cro lơbăn-lơñô dê. 10Bơh dilah cro găy lăng tơmpơl du hôi cro dî jơno jăk-sai nggui sa nơ̆m hîh duh-khoai rồp-ràk, gừn ơ̆-iyŏ nùs tua ờs lơbăn-lơñô ƀòn gô dê rơp kŏng rôn-bơklơ̆n lơi sa lơ̆gay jơno sŏng dî ăn duh-khoai ma rồp-ràk ơ̆h? 11Tîrơ̆ gừn, du hôi cro lơbăn-lơñô, du hôi cro oh mi mà Yang Dŏng-Klàs sŏng sơ̆t ala măư, kŏng tơngroh tài bơh jơno jăk-sai oh mi rôh lŏ dê. 12Pơnah nde, jăt dubă tîgư̆n, tơm tô̆ tìs-glài tơmdră î lơ̆gay oh mi rôh lŏ mơ̆n gư̆m lơh jîng sồt-rmañ nùs tua lơbăn-lơñô ƀòn gô dê, gừn oh mi rôh lŏ hă tìs-glài tơmdră î Yang Dŏng-Klàs. 13Gư̆n-jîng dilah jơno sa lơh ma du hôi cro oh mi ăñ jê tìs-glài, gừn ăñ nê̆-năn rơp ơ̆ tom jơ găy sa rlău te, bulah lơi ăñ ơ̆ lơh sơmăm tìs ma oh mi rôh lŏ mơ̆n dê.