1 Kôrintô 9

1Ăñ ơ̆ dî khăt-gơboh ờ ơ̆h? Ăñ ơ̆-iyŏ la cro gơnoăr bơtău dơng ờ ơ̆h? Ăñ hôm dahrăư tơmtom măt Yang Jesu, la Yang ƀòn mơ̆n ờ ơ̆h? Oh mi rôh lŏ ơ̆-iyŏ la lơh bră lơh ăñ jê nơ̆m Yang ờ ơ̆h? 2Dilah ăñ ơ̆-iyŏ la cro gơnoăr bơtău dơng jăt î lơ̆gay cro nde, mơya êt ngăn ăñ la cro gơnoăr bơtău dơng jăt î oh mi rôh lŏ. Bơh oh mi rôh lŏ la cư̆ng-tang bơh sơnăn cro gơnoăr bơtău dơng nơ̆m Yang ăñ jê. 3Jơno tơmpẵu ăñ jê la tîdô, jăt î lơ̆gay cro swì lùp ăñ: 4Tom iyŏ lah ƀòn hî ơ̆ dî gơnoăr sa î ñô ơ̆h? 5Tom iyŏ la ƀòn hî ơ̆ dî gơnoăr tề lăm jăt du hôi cro bo-ua don Yang ya, kŭng gư̆ptî lơ̆gay cro gơnoăr bơtău dơng nde băl î lơ̆gay cro oh klo Yang dê gư̆n Sepha? 6Hala nư̆ng du hôi Ƀanaƀa î ăñ ơ̆ dî gơnoăr ơ̆ lơh bră? 7Tom cro găy swà lĭñ mà păl rong dêh priè ơ̆? Tom cro găy tăm buơn ño mà ơ̆ sa ple gư̆n? Hala tom cro găy rong jơno puôn ƀĕ jư̆ng mà ơ̆ ñô dà toh bơh jơno puôn jư̆ng? 8Ăñ ndăng tơs ơ̆-iyŏ lơ̆gay jơno dô jăt dubă cro nơ̆m rai-jîng ơ? Hala, kŭng ơ̆ tom jơno bơlăm tơs lơ̆gay jơno rơ̆? 9Bơh nơ̆m jơno bơlăm Môise dî cêh lah: “Bư̆ng tơngdẵu bai jrẵu nơ̆m kơ̆mbung lamău ndăng jă kơ̆mbung kôi.” Tom iyŏ Yang Tơm Trồ rcăng e ma lamău ơ̆h? 10Hala Kơnràñ tơs lah iyŏ niem ngăn bơh kwơ măng ƀòn mơ̆n dê? Ngăn, jơno dî cêh lah bơh dî kwơ măng ƀòn mơ̆n dê, bơh cro lơ-ua srăy păl lơ-ua nơ̆m jơno cang-kơnơm, gừn cro kơ̆mbung kôi nơ̆m jơno cang-kơnơm bơh pơnah tơmpà e ma mơ̆n pên. 11Dilah ƀòn hî sŏng sêh lơ̆gay jơno đah hwîng nhòng tơmpôl oh mi rôh lŏ, gừn tom lơh oăn tamăn hă ờ, dilah ƀòn hî rơp koh pòc lơ̆gay jini-jơno đah să-jăn bơh oh mi rôh lŏ? 12Dilah lơ̆gay cro nde dî pơnah bơh gơnoăr rơ̆ nơ̆m oh mi rôh lŏ, gừn ơ̆ iyŏ ƀòn hî sơlơ khăi rlo ơ̆h! Mơya, ƀòn hî ơ̆ lùp dăn gơnoăr dô. Ala nơ̆m gư̆n, ƀòn hî kŏng-ăt lơ̆gay jơno lơi ƀòn hî ơ̆ lơboh trôh bulah kơp jơno kơ̆p-cơkhă găy ma Jơno Niem Yang Dŏng-Klàs dê. 13Oh mi rôh lŏ ơ̆ gư̆t lah lơ̆gay cro dŏng bră nhòng hîh duh-khoai gừn sa lơ̆gay jơno ăn gôtrê hîh duh-khoai, lơ̆gay cro dŏng bră anẵu kaƀang duh-khoai gừn dî pơnah anẵu kaƀang duh-khoai, hala ơ̆h? 14Kŭng dubă tîgư̆n, Yang sŏng tơs bơtău lah lơ̆gay cro tơs tơnggư̆t Jơno Niem gừn jîng kơnơm Jơno Niem. 15Mơya ăñ hôm dahrăư ngui dăn bulah jơno găy nơ̆m lơ̆gay gơnoăr gư̆n. Pơnah nde, ăñ ơ̆ cêh lơ̆gay jơno dô lơi gơnoăr rơ̆ dî ngui lơh ma mơ̆n gư̆p tîrơ̆, bơh jăt î ăñ, gư̆n-jîng sơ̆t niem rlo la bulah cro găy rơp lơh e ma nùs tua tieng pơndrơ ăñ jê tơlôh jîng ơ̆-iyŏ. 16Bơh dilah ăñ tơs bơtău Jơno Niem, gừn ơ̆ tom jơno găy ma ăñ lơi tư̆ng yeh să, bơh đah pơnah rôn-bơklơ̆n dî jao ăn bră e ma ăñ. Bơh ngăn la sơòs-sơngeh ngăn ma ăñ dilah ăñ ơ̆ tơs bơtău Jơno Niem! 17Dilah ăñ sơmơn nùs-kơñ lơh bră rơ̆, gừn ăñ dî phăn-ƀan. Hôm dilah ơ̆ sơmơn nùs-kơñ lơh, gừn ăñ sŏng kŏng dî jao phi gơnoăr bră ăt-bồ hîh tơ̆m lờt. 18Gừn, phăn-ƀan ăñ jê la jơno găy teh? Gư̆n la tơm tô̆ tơs bơtău Jơno Niem ơ̆ tơng-jăt jên-priè, ăñ digơlăn tơs tơnggư̆t Jơno Niem, amơh lơh ơ̆ ngui sa bơh gơnoăr ăñ jê nơ̆m Jơno Niem. 19Bơh bulah dî khăt-gơboh klàs lơ̆gay jơno, ăñ sŏng lơh să tơm ăñ jîng dê̆-gơna ma lơ̆gay cro, lơi ăñ digơlăn tơmdŏng dî khăi cro rlo te. 20Jăt î cro Juđa, ăñ gôjîng gư̆ptî cro Juđa, lơi ăñ digơlăn tơmdŏng dî cro Juđa. Jăt î lơ̆gay cro ăm nteàh jơno-bơlăm, ăñ gôjîng gư̆ptî cro ăm nteàh jơno-bơlăm, bulah să tơm ăñ ơ̆ ăm nteàh jơno-bơlăm, lơi ăñ digơlăn tơmdŏng lơ̆gay cro ăm nteàh jơno-bơlăm. 21Jăt î lơ̆gay cro ơ̆ dî jơno-bơlăm, ăñ gôjîng gư̆ptî ơ̆ tom jơno-bơlăm (bulah ơ̆-iyŏ la ơ̆ tom jơno-bơlăm Yang Tơm Trồ dê, mơya la ăm nteàh jơno-bơlăm Yang Dŏng-Klàs dê), lơi ăñ digơlăn tơmdŏng dî lơ̆gay cro ơ̆ tom jơno-bơlăm. 22Jăt î lơ̆gay cro lơbăn-lơñô, ăñ gôjîng cro lơbăn-lơñô, lơi ăñ digơlăn tơmdŏng lơ̆gay cro lơbăn-lơñô. Ăñ sŏng gôjîng lơ̆gay bră jơno jăt î lơ̆gay cro, bulah lơi ăñ digơlăn jôi lơ̆gay kơp jơno tơmdŏng dî du pơnah cro. 23Pơnah nde, ăñ lơh lơ̆gay bră tài bơh Jơno Niem, lơi ăñ digơlăn gôjîng gư̆ptî cro dî pơnah nơ̆m gư̆n. 24Oh mi rôh lŏ ơ̆ gư̆t lah nơ̆m gung cơplŏk, lơ̆gay kŭng cơplŏk băl, mơya nư̆ng dî du hôi cro lăñ phăn-ƀan ya? Gư̆n-jîng oh mi rôh lŏ cơplŏk cĕ amơh lơi dî lăñ phăn-ƀan. 25Pơnah nde, kơp cro tơmpìt pơlum nơ̆m lơ̆gay wêh têl lòng gừn bơtê nùs tua gư̆t kơhea-să nơ̆m lơ̆gay bră. Bulah ƀòn gô lơh tîrơ̆ lơi ƀòn gô digơlăn dưñ dî sơgơn Bơtao khơñ ôm-lề, mơya ƀòn mơ̆n lơh tîrơ̆ la lơi dî sơgơn Bơtao ơ̆ ôm-lề. 26Gư̆n-jîng, ăñ cơplŏk gư̆ptî rơ̆, ơ̆-iyŏ la gư̆ptî ơ̆ dî dubă cơdoh maên; ăñ tơmlơh gư̆ptî rơ̆, ơ̆-iyŏ gư̆ptî tơmlơh î ayua cal. 27Tơblơ̆ wăl, ăñ kơ̆p bơklơ̆n să-jăn mơ̆n gừn lơh gô gôjîng cro dê̆, lơi ma-ngkơi jơ ăñ sŏng bơtău ma cro nde gừn să tơm mơ̆n ơ̆ kŏng lơi căư.