Skip to content
BibleKenya

Dao Ao Dai Literal Text

Ma-tai 2

Zâu Yê-su steengb stâyv yămz Bêtx-le-hem môngf Yu-đê stâyz phangz wax nzêuh toix Hê-lôtx ayx huungh blătc quaix đangz, phanv mangc, naih wax đomc tongb manyh stênx stengb tăng tongz phanx taih tauv Yê-lu-sa-lem, naic coong: “Steengb stâyv taih ayx Yu-tai munh nyăngz Huungh wax Tauh yămz laiv? Wâyc buz phătc Nănh nyăngz stingz tau yămz tongz pôngz setb songđ taih nongc canyx bongc Nănh.” Six numđ nâyx đomc wac blătc, Hê-lôtx huungh songđ numđ nyâuđ max gwanb tiny, njinh Yê-lu-sa-lem dlanyh nyăngz munh lauf năngđ nănh. Hê-lôtx huungh songđ êu Yu-tai munh wax đomc muif lanh stayb munh pyây cloon nzaox gâyf stênx steengb, taih zah naic stiz coong: “Njâuv Zâu six yămz laiv steengb heh?” Stiz tauz Hê-lôtx coong: “Yămz Bêtx-le-hem Yu-đê stâyz phangz, wâyc tâuc wac munh ja năngđ nây nâyx,

‘Bêtx-le-hem môngf, Yu-đa stâyz phangz lex!

Mâyh max cănh năngx jenz têx yămz Yu-đa stâyz phangz nyăngz ayx côx lub cah đi wax đomc,

wâyc tăng mâyh oix naih ah Tauh huungh setb taih cun jămđ ênz,

yaz nyăngz pec stingx, I-sa-la-ên munh wax Tauh.’”

Tăng wa, Hê-lôtx pinyx êu wax đomc tongb manyh stênx steengb taih naic nănh stiz, wax nomz stingz tau six tăng laiv zanyf setb. Naic tuz, Hê-lôtx songđ êu stiz ninyh Bêtx-le-hem, zăpx stiz coong: “Tauv nyâuh ninyh, nyâuh bix năngx cayb zah lov wax tauh munh sây, tauv nyâuh lov phătc, bix lauf bux yaz, phunz yaz lauf hayh ninyh canyx bongc Nănh.” Mungv huungh stix coong tuz, stiz songđ setb jau ninyh, phanv mangc, cah đangc phătc yămz tongz pôngz setb wax nomz stingz tau ninyh đangc stiz, ninyh tauv munh sây yămz wax nomz tinc cah zâyc songđ yămf wa. Phătc wax nomz stingz tau, stiz songđ senz numđ nyađ nzongf. Tauv stiz nzac pyau cah njaf ninyh, phătc wax tauh sây jenz cloon Ma-li-ya, Nănh nyăngz nzif. Stiz songđ quâyc nzac paix canyx bongc Nănh, stiz zoz stiz nzâyz taih nyăngz jax dlaih pungx hođ phunz Nănh: wax đomc jax dlaih six, sămz, cloon, nyux hâng, cloon ah huungđ stungz đangz. Six wâyc stiz tuz Zâu bux yămz ah tauh bâyx êu năngx gâyf phunb đangz muf Hê-lôtx wa, Nănh stiz songđ quaix pitc stinz jau muf stiz nyăngz stâyz phangz.

Tauv stiz muf blătc, phanv mangc, naih ah lanh Zâu nyăngz stinz munh hinđ setb taih pongh Yô-sepx quaix ah tauh bâyx, coong: “Tauv điub taih, bix ênz sây cloon sây nyăngz nzif pyăux ninyh I-yipx stâyz phangz, phanv yămz wa zu tauv laiv zanyf yaz bux mâyh, wâyc Hê-lôtx cayx lov nâyx tauh sây nongc tayx.” Tauv điub taih, Yô-sepx songđ ênz wax tauh sây cloon sây nyăngz nzif njinh nzămc pyăux ninyh wa I-yipx, nănh stiz yămz wa zu tauv Hê-lôtx tayc, năngđ nây setb taih wâyc phunz toix nzuf Zâu nongc tâuc wac munh coong nyăngz wac, nănh coong: “Yaz êu Yaz nyăngz sây tăng I-yipx setb taih.”

Wax zanyf, Hê-lôtx phătc nănh zuc wax đomc tongb manyh stênx steengb jaf, nănh songđ numđ nhlenx nzongf, nănh setb lanyf ninyh, tayx nzuf wax đomc munh sây toonz jenz tăng iz nyăngv nzac loic yămz Bêtx-le-hem cah njaf cloon yămz nzêux nzuf wax tungđ stâyz phangz wax đomc, âyz tăng nănh naic wax đomc tongb manyh stênx steengb nyăngz noib lav stunx taih. Năngđ nây six toix nzuf wax tauh tâuc wac munh Yê-lê-mi coong nyăngz wac, nănh coong:

“Numđ naih stingb yămz wa La-ma dlanyh,

cun yônx meengc cun haoh stingb nămx njauh,

La-sên haoh phunz nănh nyăngz sây,

nănh yâuc max nongc mănv stăngc nănh zay stauh, wâyc nănh nyăngz sây max naih nzof.”

Six, tauv Hê-lôtx tayc blătc, phanv mangc, naih ah lanh Zâu nyăngz stinz munh hinđ taih pongh Yô-sepx quaix ah tauh bâyx yămz I-yipx, bux coong: “Tauv điub taih, bix ênz sây cloon sây nyăngz nzif muf I-sa-la-ên stâyz phangz, wâyc oix tayx nâyx tauh sây nyăngz meengc wax đomc munh tayc nzof.” Điub taih wax zanyf, Yô-sepx ênz sây cloon sây nyăngz nzif, muf nzac wa I-sa-la-ên stâyz phangz. Six, numđ coong An-cê-la-atx ayx huungh cun Yu-đê stâyz phangz tayv nănh nyăngz pha, Hê-lôtx, Yô-sepx cumh nzav max nzađ ninyh tauv wa. Six wâyc tuz wax tauh bâyx bux quaix phunz nănh, nănh songđ muf nzac Ga-li-lê stâyz phangz, six ninyh tauv wa, nănh yămz ah nomz dlanyh hipđ ayx Na-sa-leetx, phunz tuz toix nzuf tâuc wac munh coong nyăngz wac, coong Mâyh six tuz munh hipđ ayx Na-sa-leetx munh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.