Ma-cô 3

1Zâu Yê-su zef nzac huyđ toongh ninyh, yămz wa naih ah lanh munh puf quac. 2Munh songđ seetx Nănh, mangc jađ yămz tingc congz noib, Nănh six zany wax tauh munh max zany, stiz nzăngđ hayh naih jau cooux Nănh. 3Nănh bux wax tauh puf quac munh: “Phanv taih stâuđ nây mungh tongx.” 4Nănh songđ naic stiz coong: “Tingc congz noib hoopđ zuc ayx gongx max six ayx huđ; njâuv munh max six tayx munh?” Six stiz max nhlaoc tiny. 5Zâu Yê-su mangc stiz numđ nhlenx yâuc numđ stauh, wâyc stiz nyăngz nyâuđ nhlengc nzongf, Zâu Yê-su coong ănz wax tauh munh: “Stuungb mâyh nyăngz puf staox taih. Nănh songđ stuungb nănh nyăngz puf staox taih bix tuz gongx.” 6Setb cungh ngwaic ninyh wax zanyf, wax đomc Pha-li-si munh cloon lêpc Hê-lôtx Huungh wax peof munh songđ lênh dlih sangv gwangh nzeengz Zâu Yê-su, ayx laix phunz stiz hayh tayx tuz Nănh.

7Zâu Yê-su cloon Nănh wax đomc stayb sây quaix wa coiđ sinh ninyh, yâuc naih ah peof songx munh hongđ nzongf taih lêpc Nănh tăng Ga-li-lê, tăng Yu-đê, 8tăng Yê-lu-sa-lem, yâuc tăng I-đu-mê-a cloon yămz Njoh-đen wăngx toix nganc wax phanx, yâuc njinh quib yămz nzêux Tai-lapx cloon Sai-đôn dlanyh. Naih ah peob munh hongđ nzongf taih lov Zâu Yê-su, wâyc numđ lănv Nănh ayx nyăngz jau. 9Wâyc munh hongđ nzongf, Zâu Yê-su songđ bux Nănh wax đomc stayb sây êu lov ah saz đangđ jenz taih phunz Nănh yămz, songx munh nzăngđ max hayh nzêmv Nănh. 10Wâyc Nănh zany munh đuungx nyăngz gumc gongx, ayx tuz laiv lanh săngh gumc six zuc beengx taih stătx Nănh, nzăngđ hayh lumz tauv Nănh. 11Wax đomc manđ yootz laiv zanyf phătc Zâu Yê-su, stiz songđ quâyc nzac Zâu Yê-su nyăngz cah đangc ninyh, stiz yâuc hamv coong: “Mâyh six Zâu Tênb-Huungh nyăngz Toonz.” 12Zâu Yê-su zăpx mađ manđ max phunz stiz coong Nănh six mănv.

13Zâu Yê-su staox zoongz ninyh êu Nănh oix nongc wax đomc munh, stiz songđ taih lêpc Nănh. 14Zâu Yê-su sên Săpc nyâyc lanh munh (wax đomc munh Nănh yâuc hipđ ayx cumh pâuz munh), phunz stiz cloon Nănh yămz, Nănh nzăngđ hayh paiđ nănh stiz ninyh nzônh gâyf. 15Yâuc sađ phunz naih lokc jangx hayh luiđ manđ 16Zâu Yê-su sên săpc nyâyc lanh munh: Si-môn, Nănh zef oonz bux pâu hipđ ayx Pi-tê; 17Ya-coopc six Sê-bê-đi nyăngz toonz, cloon Yô-hanx six Ya-coopc nyăngz yâuf, Nănh zef oonz bux pâu phunz stiz hipđ ayx Bô-a-nê-yê, âyz gâyf six bah congz nyăngz toonz; 18cloon An-đa-lu, Phi-lipx, Ba-tô-lô-miu, Ma-tai, Tô-matx, An-phê-atc nyăngz toonz, Ya-coopc, Tat-đê-atc, Si-môn Sê-lôt, 19cloon maic Zâu Yê-su wax tauh Yu-đa I-sa-ca-li-ôtx.

20Zâu Yê-su nzac ah sênz pyau ninyh, songx munh zef tinyh đoih taih, ayx tuz Zâu Yê-su cloon stayb sây buz lôx max hayh nhlinc nzu. 21Zâu Yê-su wax đomc pyau munh numđ nâyx đomc dlayc, stiz taih six oix zoz Nănh, wâyc stiz coong: “Nănh max sting nzof gôh.” 22Wax đomc nzaox gâyf stênx steengb, six tăng Yê-lu-sa-lem taih wax đomc munh, yâuc coong: “Nănh zuc Bê-ên-sê-bun manđ nzac yămz stinb,” zef coong: “Păngc manđ huungh nănh bix luiđ tuz manđ.” 23Six Zâu Yê-su êu stiz taih Nănh wa, yâuc nongc wac pây coong ănz stiz: “Ayx năngđ laix Sax-tanx bix hayh luiđ tuz Sax-tanx? 24Năngđ coong ah nomz côkz munh cănh phunz goib taih tinyh nzeengz, wax nomz côkz six max hayh yămz tuz wăn. 25Năngđ coong ah sênz pyau munh cănh phunz goib taih tinyh nzeengz, wax sênz pyau munh six max hayh yămz tuz wăn. 26Năngđ coong Sax-tanx bix cănh lunc taih nzeengz Sax-tanx six zuc lunc, nănh six max hayh yămz tuz wăn, six nănh songđ zuc paic gôh. 27Six max naih mănv hayh nzac munh njoongh nyăngz pyau ninyh zab nănh nyăngz jax toongx, six cungb oix zuc stayb wax tauh munh njoongh đangc, nzăngđ hayh zab tuz nănh nyăngz jax toongx. 28Yaz coong senz bux nyâuh, bamh munh ayx longđ nyăngz muif huungđ stoif cloon stiz coong pamf nyăngz muif zâux wac six tuz quanyf nzuf, 29six laiv lanh coong pamf nzeengz Zâu Singx-Lingh, six banc stâyv banc đaic max tuz quanyf stoif, nănh six zuc stâyv quâyx đamz stoif.” — 30Nănh coong nâyx six wâyc stiz coong: “Nănh zuc manđ nzac yămz stinb.”

31Zâu Yê-su nyăngz nzif cloon Nănh wax đomc yâuf taih tauv, stâuđ yămz wa cungh ngwaic, stiz êu munh stăngc bux Zâu Yê-su, êu Nănh setb taih. 32Naih ah peof munh hongđ stâyv quib Zâu Yê-su, munh songđ coong bux Nănh: “Phanv mangc, mâyh nyăngz nzif cloon mâyh nyăngz yâuf yămz wa cungh ngwaic, lov mâyh.” 33Zâu Yê-su tauz stiz coong: “Mănv six yaz nyăngz nzif, yaz nyăngz yâuf pez?” 34Nănh songđ winb mangc stâyv quib Nănh wa cah stinh wax đomc munh, yâuc coong: “Phanv mangc, nây six yaz nyăngz nzif cloon yaz nyăngz yâuf pez! 35Laiv lanh ayx âyz Zâu Tênb-Huungh nyăngz zux ix, wax tauh six yaz nyăngz yâuf pez, ô stayx, cloon yaz nyăngz nzif.”