Lu-ca 12

1Wax zanyf, songx munh hongđ nzoomf wa săngh tinb lanh ayx tuz lanh zaiđ zuc lanh, Zâu Yê-su songđ coong ănz Nănh nyăngz stayb sây quaix đangc: “Nyâuh oix zuc năngx cayb bôngh Pha-li-si munh nyăngz piny, pâyc zac nyâuđ yootz nyăngz munh. 2Max naih laiv huungđ pinyx bix max zuc setb nzăngc, yâuc max naih laiv huungđ vâyv tuz munh max pâyz. 3Wâyc nây, nyâuh yămz nzămc coong laiv huungđ six tuz mungv yămz wa gwăngz, nyâuh yămz wa bôngh cah njaf coong wac sapb ănz bah noomh coonz six tuz yămz wa pyau tuungx coong setb taih. 4Wâyc nây, yaz coong bux nyâuh, yaz nyăngz lah pyeoz toic, năngx gâyf cumh nzav munh hayh tayx stinb a tayc, blătc yâuc max hayh ayx laix nzof. 5Six yaz coong bux phunz nyâuh hoopđ zuc cumh nzav mănv. Oix zuc cumh nzav hayh tayx stinb a blătc, yâuc hayh quanyf nzac tâuf coiđ ninyh wax Tauh. Yaz coong bux nyâuh, senz, six oix zuc cumh nzav wax Tauh gôh. 6Pyaz saz nooc câyc max zâyf maic tuz iz nomz tongh stinh haz? Yâuc max naih laiv saz zuc Zâu Tênb-Huungh nyâuđ cob. 7Wâyc nây, năngx gâyf cumh nzav, nyâuh nyăngz pyây đongz bâyf tuz stauđ nzuf nzof: nyâuh six năngx saix têx đuungx saz nooc câyc. 8Yaz coong bux ănz nyâuh tinyh phanv laiv lanh toongx songx nhlimc yaz, six Bamh Munh lauf nhlimc wax lanh yămz Zâu Tênb-Huungh nyăngz stinz munh cah đangc, 9six laiv lanh toongx songx pyenv yaz six lauf zuc pyenv yămz Zâu Tênb-Huungh nyăngz stinz munh cah đangc. 10Wâyc laiv lanh coong peo Bamh Munh six tuz quanyf phunz, six laiv lanh coong pamf tauv Zâu Singx-Lingh six max tuz quanyf phunz. 11Laiv zanyf munh ênz nyâuh nzac huyđ toongh ninyh, yămz ayx côx nzauf lanyf nyăngz munh cah đangc, năngx gâyf stauh nyâuh cayx coong ayx laix, max six oix zuc coong luungđ, 12Wâyc tauv wax zanyf, nyâuh sămv zuc coong laiv huungđ Zâu Singx-Lingh cănh nzaox.”

13Tăng wa, yămz songx munh naih ah lanh coong ănz Nănh: “Stênx steengb lex, joođ bux êu yaz nyăngz tah tanb jax toongx phunz yaz.” 14Six Zâu Yê-su tauz wax lanh munh: “Tah lex, mănv oonz yaz ayx côx ayx quanz nongc pob tungh zăngc phunz nyâuh heh?” 15Nănh songđ coong ănz stiz: “Oix zuc năngx cayb bôngh năngx gâyf phunz nyâuh naih nyâuđ mauh, wâyc ah lanh munh nyăngz săngh mengc six max zâyf păngc yămz nănh naih nyăngz jax toongx.” 16Tăng wa, Nănh lănv ah cuyb wac pây phunz stiz coong: “Naih ah lanh puv quâyx munh nănh nyăngz nib tâyc tuz jeengz zunb đuungx, 17yâuc cănh nyâyh coong: ‘Yaz cayx ayx laix loz, wâyc yaz max naih tinc nongc ănz yaz nyăngz jeengz zunb?’ 18Nănh songđ coong: ‘Yaz six cayx ayx nâyx: “Yaz cayx toou yaz nyăngz lôx njămf, zef ayx năngx lub têx, nongc ănz nâyx đomc zub cloon yaz nyăngz jax toongx.” 19Yâuc cănh coong ănz nănh nyăngz mengc hoonh coong: “Mengc hoonh lex, mâyh naih jax toongx đuungx nzongf caux nhlinc đuungx nyăngv. Oix zuc cungb yămz, nhlinc, hopb yâuc nyađ.”’ 20Six Zâu Tênb-Huungh coong ănz nănh: ‘Munh oongx lex, nâyx munf mâyh nyăngz mengc hoonh zuc naic phunb đangz gôh, năngđ nâyx nănh naih wax đomc jax toongx six săngh mănv nyăngz heh?’ 21Laiv lanh cungb mauh cănh nyăngz nyăngz jax toongx bix max naih puv quâyx yămz Zâu Tênb-Huungh lauf nâyx.”

22Tăng wa Nănh coong ănz Nănh wax đomc stayb sây: “Wâyc nây yaz coong bux nyâuh, năngx gâyf wâyc stâyv sangc bix stauh coong nyâuh six cayx nhlinc luungđ — yâuc năngx gâyf wâyc stinb sangc bix stauh coong nyâuh six cayx zuz luungđ. 23Wâyc săngh mengc six năngx saix têx nhlinc hopb, stinb a yâuc năngx saix têx guyz quav. 24Phanv mangc nooc ưngx af, stiz max songx yâuc max sâub, yâuc max naih njămf, max naih đanz, six Zâu Tênb-Huungh yuungf stiz. Nyâuh yâuc năngx saix têx nooc pâyz sax phănc! 25Nyâuh naih tix lanh, nyâyh stauh bix poou tuz nănh nyăngz mengc năngx đao tix cay max? 26Năngđ coong cay nâyx nyâuh bix max hayh ayx tuz nzof, săngx laix nyâuh bix zef năngx stauh pitc huungđ heh? 27Phanv mangc tungh goonf phăngh — stiz săngh ayx năngđ laix. Stiz max ayx zâuđ, yâuc max peengz njăub. Six yaz coong bux nyâuh, njinh Sa-lô-môn huungh, hănđ tăng laiv puv quâyx, nănh zoongz zuz nyăngz jau yâuc max năngđ tuz wax đomc ah nyău phăngh. 28Nyâuh zen stimz sâub nyăngz munh lex, năngđ coong Zâu Tênb-Huungh zoongz lâyc jêmh sangc nyăngz mađ phăngh, mađ six nâyx noib săngh săngx đoomz caođ zuc tâuf pu, nyâuh six zef năngx blătc pâyz sax phănc. 29Nyâuh năngx gâyf lov coong cayx nhlinc luungđ, hopb luungđ, yâuc năngx gâyf stauh. 30Wâyc wax đomc max zen nyăngz munh six cungb lov nâyx đomc muif huungđ cuungv, six nyâuh nyăngz Tênb-toongh Pha pâyz coong nyâuh sămv wax đomc muif huungđ. 31Six, nyâuh oix zuc lov Zâu Tênb-Huungh nyăngz côkz đangc, nzof wax đomc muif huungđ cănh tuz sađ pâu phunz nyâuh. 32Stoc nyăngz munh lex, năngx gâyf cumh nzav, wâyc nyâuh nyăngz Tênb-toongh Pha numđ nyađ sađ Tênb-toongh côkz phunz nyâuh. 33Oix zuc maic nyâuh nyăngz jax toongx nongc stăngc munh zâuđ munh. Oix zuc lov phunz nyâuh naih max hayh byaif nyăngz nyanh tic — six nyâuh max hayh jac nyăngz jax dlaih yămz cah zâyc guungh, wa stac munh max hayh ninyh stătx, jeengz yâuc max hayh tăpc quaiz. 34Wâyc nyâuh nyăngz jax toongx yămz laiv nyâuh nyăngz nyâuđ lauf yămz wa.

35Nyâuh oix zuc stayb quav langb, yâuc oix zuc leđ toongz năngx gwăngz, 36Nyâuh oix zuc cayx năngđ pâuz zu nănh nyăngz zâu tăng coonx hinh phunb đangz lauf nâyx, tauv zâu lauf nzoz jeengh, songđ toongx sangf coib jeengh phunz zâu. 37Năngđ coong tauv zâu phunb đangz lauf phătc wax đomc pâuz, jinh đangh sting điub, wax đomc munh, senz naih oonz looc gôh. Yaz coong senz, bux nyâuh, zâu six stayb nănh nyăngz quav langb, yâuc êu stiz stâyv wa hinh, zâu six ninyh bokc dlic stiz săngh lanh săngh lanh têx. 38Zâu hănđ lauf toix iz săngx huđ, max six pôz săngx huđ, zâu bix lauf phătc ayx nâyx têx, wax đomc pâuz senz naih oonz looc gôh. 39Oix zuc pâyz coong, năngđ coong pyau zâu pâyz laiv săngx huđ stac munh nzac taih, nănh six leđ max phunz stac munh nzac nănh nyăngz pyau. 40Nyâuh six oix zuc bênc săngh zu, wâyc toix zuc nyâuh max bôngh max nyâyh, bix Bamh Munh taih tauv.”

41Tăng wa Pi-tê naic coong: “Zâu lex, mâyh coong nâyx cuyb wac pây phunz buz, max six phunz cloon tinyh đoih heh?” 42Zâu songđ tauz: “Mănv ayx nyâuđ zanyx, tongb manyh nyăngz cun cumh pâuz munh, zâu six phunz nănh cun nzuf nănh nyăngz pyau munh, nongc âyz săngx huđ bênc nhlinc hopb phunz stiz? 43Năngđ coong nănh nyăngz zâu lauf, mangc, bix phătc wax tauh pâuz ayx năngđ nâyx, senz naih oonz looc gôh 44Yaz coong senz bux nyâuh, zâu six phunz wax tauh pâuz cun nzuf nănh naih nyăngz muif huungđ. 45Six năngđ coong wax tauh pâuz bix cănh yămz nyâuđ nyâyh coong: ‘Yaz nyăngz zâu bâyf max zeengx lauf căn,’ songđ bopc wax đomc toonz pâuz, sab pâuz, yâuc cun nhlinc cun hopb, yâuc binz taux taux, 46wax tauh pâuz nyăngz zâu six lauf toix nănh max bôngh nyăngz noib, yâuc toix nănh max bôngh nyăngz săngx huđ, zâu six bopc nănh, yâuc phunz nănh cloon munh huđ yămz. 47Wax tauh pâuz, six pâyz tuz nănh nyăngz zâu zux ix, bix max âyz zâu nyăngz zux ix ayx, six zuc bopc đuungx. 48Năngx naih wax đomc max pâyz bix ayx longđ six zuc bopc năngx stoc cay. Nzof, mănv, tuz sađ phunz đuungx, six lauf zuc êu ayx đuungx, wâyc laiv lanh tuz jaoz phunz đuungx, nănh six lauf zuc naic năngx đuungx têx.

49Yaz nzâyz tâuf taih quanyf nây bamh canz, năngđ coong nănh blupc sac yaz songđ max nyâyh luungđ gôh? 50Six yaz năngx zuc quaix-gâyf ah hâyđ timb, yaz senz numđ stauh tuz tauv quaix nănh soongb nzuf! 51Nyâuh nyâyh coong yaz taih phunz bamh canz naih peengh oonz mah? Max zâyf đêh, yaz coong bux nyâuh, yaz six taih phunz goib lêc. 52Wâyc tăng nây staox ninyh, pyaz lanh munh yămz ah sênz pyau six phunz goib taih — pôz lanh nzeengz iz lanh nzof iz lanh nzeengz pôz lanh. 53Stiz six zuc phunz goib, pha cănh nzeengz toonz nzof toonz cănh nzeengz pha, nzif cănh nzeengz sab nzof sab cănh nzeengz nzif, bôf cănh nzeengz bongf nzof bongf cănh nzeengz bôf.”

54Tăng wa Nănh coong ănz songx munh: “Tauv nyâuh phătc wa staiz pôngz naih vănx, nyâuh yâuc coong: ‘bungc cayx lub gôh,’ yâuc senz naih năngđ wa nâyx. 55Nzof nzaox tăng namh pôngz sâyb, nyâuh yâuc coong: ‘Naih njah toc joomz gôh,’ yâuc senz năngđ wa. 56Pâyc zac nyâuđ yootz nyăngz munh lex! Nyâuh hayh pâyz tuz guungh nib nyăngz stêtz, săngh laix nyâuh bix max pâyz tuz nâyx yenh nyăngz noib lav heh? 57Săngh laix nyâuh bix max cănh stămđ mangc laiv huungđ six gongx? 58Wâyc nây laiv zanyf nyâuh cloon munh oix ênz nyâuh nzac quanz pâu tinc ninyh cooux nyâuh, ninyh wa bah đamx jau oix zuc lov jau căn nănh ayx gongx, stiz nzăngđ max ênz nyâuh ninyh tauv stămđ stoif quanz, stămđ stoif quanz zef jaoz nyâuh phunz peengz pyây, nzof peengz pyây sukc nyâuh ănz nzauh. 59Yaz coong bux nyâuh, nyâuh six max tuz setb wa nzauh ayx tuz tauv nyâuh clao soongb nzuf byăng wax nomz tongh stinh.”