Skip to content
BibleKenya

Dao Ao Dai Literal Text

Lu-ca 11

Naih ah noib Zâu Yê-su yămz ah nomz tinc cloo Zâu, Nănh cloo Zâu tuz wax zanyf, naih ah lanh stayb sây taih naic Nănh coong: “Zâu lex, joođ nzaox buz cloo Zâu, cayx năngđ Yô-hanx nzaox nănh wax đomc stayb sây nâyx.” Tăng wa Nănh coong ănz stiz: “Nyâuh laiv zanyf cloo Zâu, oix zuc coong:

‘Pha lex, cloo phunz Pha nyăngz đăngb zeengh bux tuz munh zanyb.

Cloo phunz Pha nyăngz côkz taih tauv.

Joođ phunz buz naih caux ah noib nyăngz nhlinc hopb.

Joođ quanyf buz ayx longđ nyăngz stoif,

wâyc buz lauf quanyf phunz ayx longđ ănz buz wax đomc.

Cloo năngx gâyf phunz buz pongh stâyv nyâuđ nyăngz jau.’”

Nănh coong ănz stiz: “Yămz nyâuh mănv naih lah pyeoz toic, đamx munf đamx đâyx yâuc ninyh lov nănh, yâuc coong ănz nănh: ‘Lah pyeoz lex, joođ phunz yaz ca pôz nomz nzu, Wâyc yaz naih ah lanh toic tăng côz taih tauv yaz nyăngz pyau, yaz yâuc max naih luungđ nongc bênc phunz nănh nhlinc’? Wax tauh munh yâuc tauz setb wa pyau taih coong: ‘Năngx gâyf taih zenv yaz gôh. Jeengh bâyf banc nzof, yaz nyăngz sây yâuc jinh đangh cloon yaz phâyx nây zâuv, yaz max hayh nyoongz quef nongc zoz luungđ phunz mâyh.’ Yaz coong senz bux nyâuh, wax lanh munh hănđ max oix quef zoz phunz nănh wax lanh lah pyeoz toic, six wâyc wax lanh lah pyeoz toic njinh luh naic, nănh songđ zuc nyoongz quef, zoz phunz wax lanh munh caux nănh sămv nyăngz nzuf. Yaz lauf coong bux nyâuh, oix zuc joođ, nyâuh nzăngđ tuz sađ phunz; oix zuc lov, nyâuh nzăngđ tuz pongh; oix zuc nzoz jeengh, jeengh nzăngđ goib phunz nyâuh. Wâyc laiv lanh joođ, six tuz; laiv lanh lov, six pongh; laiv lanh nzoz jeengh, jeengh six goib. Yămz nyâuh naih laiv tauh pha, sây naic byauf bix ninyh phunz nangz heh? Max six sây naic jaux, nănh bix ninyh phunz stopb congz heh? Wâyc nây, nyâuh hănđ six huđ, lauf pâyz tuz phunz muif huungđ gongx nyâuh nyăngz sây, six Pha yămz wa cah zâyc guungh lauf sađ Zâu Singx-Lingh phunz joođ Nănh wax đomc munh năngx đuungx têx pâyz sax phănc?”

Nănh ah yac luiđ ah tauh manđ oongx setb. Manđ setb taih wax zanyf, munh oongx songđ hayh coong wac, songx munh songđ numđ nyâyh ganc nzongf. Six yămz wa naih ah phanx munh coong: “Nănh luiđ manđ, six păngc Bê-ên-sê-bun, manđ huungh.” Six ah phanx yâuc, oix stâyv Nănh, songđ naic êu Nănh ayx ah cuyb njic hoouđ tăng guungh taih. Six wâyc pâyz tuz stiz nyăngz nyâuđ nyâyh, Nănh songđ coong ănz stiz: “Laiv nomz côkz cănh phunz goib taih tinyh nzeengz six cănh zuc paic nzuf, nzof pyau munh cănh nzeengz cloon pyau munh six zuc lunc. Năngđ coong Sax-tanx bix cănh phunz goib taih nzeengz Sax-tanx, six nănh nyăngz côkz laiv yămz tuz heh? Nyâuh coong yaz nongc Bê-ên-sê-bun luiđ manđ. Năngđ coong yaz păngc Bê-ên-sê-bun luiđ manđ, ha nyâuh nyăngz sây six păngc luungđ luiđ manđ heh? Wâyc nâyx đomc, stiz six cănh plănc lauf cooux nyâuh. Six năngđ coong yaz păngc Zâu Tênb-Huungh nyăngz bah đoz luiđ manđ, six Zâu Tênb-Huungh nyăngz côkz taih tauv nyâuh. Năngđ ah lanh munh njoongh nzauf bopc zax tungh zăngc jămđ leđ nănh nyăngz pyau, nănh nyăngz jax toongx six max zuc nimc, Six tauv naih ah lanh munh năngx njoongh têx nănh taih bopc nănh, yâuc hingh nănh, songđ zab nănh nzauf wax đomc tungh zăngc, six nănh păngc wax đomc tungh zăngc, tăng wa wax tauh munh zoz zab nănh wax đomc jax toongx taih tinyh phunz. Laiv lanh max cloon yaz yămz six tămx cloon yaz, laiv lanh max hoopđ cloon yaz six đanv ninyh. Manđ yootz tăng ah lanh munh setb ninyh wax zanyf, nănh yâuh quaix stâyz phangz gâu ninyh lov tinc sec, six tauv lov max tuz, nănh songđ coong: ‘Yaz six cănh muf yaz nyăngz pyau, six yaz tăng wa setb taih nyăngz tinc.’ Tauv nănh lauf, phătc wax sênz pyau nzâux dlăngc wăyh lif gongx gongx ănz wa. Tăng wa, nănh ninyh ênz nhlic tauh manđ timb năngx huđ têx nănh taih cloon nănh yămz wax sênz pyau. Wax lanh munh songđ zef năngx huđ têx cah đangc timb.”

Zâu Yê-su jinh đangh coong nâyx đomc wac, naih ah lanh munh nzif yămz wax peob songx munh staox taih, nănh coong ănz Zâu Yê-su: “Laiv lanh tăngc mâyh yâuc phunz nu mâyh hopb senz naih oonz looc gôh.” Six Nănh tauz coong: “Laiv lanh numđ Zâu Tênb-Huungh nyăngz wac bix âyz ayx, nzăngđ senz naih oonz looc.”

Tauv songx munh nzoomf wa hongđ, Nănh songđ coong: “Nâyx stâyv six ah stâyv nyâuđ tôc nyăngz munh. Oix lov nhlic hoouđ mangc, six max naih laiv cuyb nhlic hoouđ tuz sađ phunz stiz blătc nzuf Yô-na nyăngz nhlic hoouđ. Wâyc Yô-na săngh nhlic hoouđ phunz Ni-na-we dlanyh năngđ laix, Bamh Munh six lauf săngh nhlic hoouđ phunz nâyx yenh munh năngđ wa. Tauv tingc stoif nyăngz noib, namh pôngz wax Tauh Huungh nzif six stâuđ quef taih cloon nâyx yenh munh, yâuc cooux stiz, wâyc nănh tăng nib coonz taih mungv Sa-lô-môn huungh nyăngz tongb manyh wac, six phanv mangc geh, Yămz nây naih ah tauh năngx lub têx Sa-lô-môn. Tauv tingc stoif nyăngz noib, Ni-na-we dlanyh nyăngz munh six stâuđ quef taih cloon nâyx yenh munh, yâuc cooux stiz, Wâyc Yô-na ninyh nzônh wax zanyf stiz coi nyâuđ nhlimc stoif, six phanv mangc geh, yămz nây naih ah tauh năngx lub têx Yô-na.

Pu tuz toongz sac max naih mănv tăpx ănz tinc vâyv, yâuc max tăpx ănz wa tongđ njaf, six nongc tăpx ănz wa toongz zax phunz laiv lanh nzac ninyh yâuc tuz phătc gwăngz. Stinb nyăngz toongz six nyâuh nyăngz mâyc. Năngđ coong nyâuh nyăngz mâyc gongx six njinh nyâuh nyăngz stinb lauf tuz gwăngz nzuf. Six năngđ coong nyâuh nyăngz mâyc huđ, nyâuh nyăngz stinb sangc six lauf nzămc meengh nzuf. Wâyc nây, oix zuc năngx cayb bôngh, săngx đanyf nyâuh nyăngz gwăngz pênx nzămc ninyh. Năngđ coong lomc nyâuh nyăngz stinb sangc gwăngz, max naih laiv tix nzămc, nănh six cănh gwăngz nzuf, cayx năngđ naih toongz siux gwăngz yămz nyâuh.”

Tăng wa, Nănh coong wax đomc wac tuz, naih ah lanh Pha-li-si munh êu Zâu Yê-su cloon nănh nhlinc ah tonx năngv. Ninyh tauv, Zâu Yê-su songđ stâyv wa hinh. Six phătc nâyx, Pha-li-si munh songđ numđ njingc wâyc Nănh max âyz gâyf đaox puf đangc mănc nhlinc. Tăng wa Zâu Yê-su songđ coong ănz nănh: “Nâyx yenh, nyâuh Pha-li-si munh cungb đaox cungh ngwaic zan căn wăn, six nyâuh cah njaf yâuc naih mauh tax huungđ cloon huđ nyăngz jau pong nzuf. Munh oongx lex! Zâyx cungh ngwaic taih wax tauh max zâyf lauf zâyx căn cah njaf haz? Wănh, nzâyz nyâuh naih nyăngz tax huungđ ninyh stăngc phunz munh zâuđ munh, nzof muif huungđ nzăngđ đăngb zeengh phunz nyâuh.

Six, nyâuh Pha-li-si munh zuc zâuđ gôh, wâyc nyâuh pungx săpc phănc ah phănc, mađ đunz, yênz stiz, cloon muif huungđ lauđ winb nyăngz njayz, nyâuh bix quanyf peengh stimz nyăngz jau cloon stăngz Zâu Tênb-Huungh nyăngz jau. Six oix zuc ayx nâyx đomc cumh pâuz, yâuc max quanyf cloon wax đomc. Nyâuh Pha-li-si munh zuc zâuđ gôh, wâyc nyâuh cungb oix stâyv yămz huyđ toongh saix quaix nyăngz tinc yâuc oix nongc munh đeh yămz wa caiz sangc njaf. Nyâuh zuc zâuđ gôh, wâyc nyâuh cayx năngđ max naih njic hoouđ nyăngz munh tayx stâu, munh ninyh zaiđ zuc yâuc max pâyz.”

Tăng wa, naih ah lanh wax đomc nzaox gâyf munh coong tauz ănz Zâu Yê-su: “Stênx steengb lex, mâyh coong nâyx six peo zuc buz nef.” Six Zâu Yê-su coong: “Nyâuh nzaox gâyf munh zuc zâuđ gôh! Wâyc nyâuh nzapc phunz munh nzâyz wax đomc đamx niđ nzâyz zâuđ, six nyâuh yâuc max nongc ah saz bah đoz stăngc pâuh tauv. Nyâuh zuc zâuđ gôh, wâyc nyâuh zâyv stâu phunz wax đomc tâuc wac munh, six cănh nyâuh nyăngz claof jex tayx stiz tayc. Năngđ nây nyâuh yâuc cănh nyenc nyâuh nyăngz claof jex ayx nyăngz jau, wâyc stiz tayx wax đomc tâuc wac munh tayc, nyâuh yâuc zâyv stâu phunz. Wâyc nây, Zâu Tênb-Huungh nyăngz tongb manyh coong: ‘Yaz six paiđ wax đomc tâuc wac munh cloon wax đomc cumh pâuz munh ninyh pongh stiz, six stiz tayx tayc yâuc ayx huđ ănz wax đomc munh’ Phunz tăng zuyx guungh zuyx nib staox taih wax đomc tâuc wac munh nyăngz samđ zuc setb tauv laiv, quaix tauv nâyx nzêuh munh nzuf, Tăng A-bên nyăngz samđ ninyh tauv Sê-ca-li-ya, six yămz wa congx tinc cloon đăngb zeengh tinc mungh tongx zuc tayx tayc wax tauh nyăngz samđ. Senz, yaz coong bux nyâuh, wax đomc samđ six zuc naic tăng nâyx nzêuh munh. Nyâuh nzaox gâyf stênx steengb munh zuc zâuđ gôh, wâyc nyâuh zoz pănh sangz nyăngz ja zâyh; nyâuh cănh max nzac ninyh, nzof nyâuh yâuc cangđ max phunz mănv nzac.”

Tauv Nănh setb wax cuyb tinc ninyh, Wax đomc nzaox gâyf stênx steengb cloon Pha-li-si munh, songđ tămx cloon Nănh neetb nzongf yâuc nzeengz Nănh đuungx huungđ, lov jau stiv Nănh phunz ayx laix hayh lov tuz tăng Nănh nyăngz nzetx coong nyăngz wac.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.