Cô-lô-si 1

1Yaz, Phao-lô, âyz Zâu Tênb-Huungh nyăngz zux ix, ayx Zâu Yê-su Jix-Tuz nyăngz cumh pâuz munh, cloon pănh nyăngz yâuf pez, Ti-mô-tai, 2pungx phunz lêpc gongx Zâu Jix-Tuz wax đomc đăngb zeengh nyăngz yâuf pez, yămz wa Cô-lô-si dlanyh. Joođ Tênb-toongh Pha, six Zâu Tênb-Huungh cloon pănh nyăngz Zâu, six Zâu Yê-su Jix-Tuz, sađ pôz sađ peengh oonz phunz nyâuh.

3Buz muif dlih cloo Zâu phunz nyâuh nyăngz săngx huđ, buz sâuf hâuđ Zâu Tênb-Huungh, six pănh nyăngz Zâu Yê-su Jix-Tuz nyăngz Pha, 4wâyc buz tuz numđ coong tauv nyâuh nyăngz zen stimz yămz Zâu Yê-su Jix-Tuz, nzof yâuc numđ coong nyâuh naih nyâuđ stăngz cloon zen Zâu nyăngz muif lanh đăngb zeengh munh, 5wâyc tuz naih njih mungc yămz wa cah zâyc guungh njâuh phunz nyâuh, senz tăng cah đangc nyâuh tuz numđ yămz senz gâyf nyăngz Cuđ Jenx, wax huungđ njih mungc, 6nây Cuđ Jenx six jinh đangh hinđ yămz nyâuh mungh tongx, yâuc jinh đangh tuz phutx ninyh yămz pong nây guungh đi, lauf cayx năngđ yămz nyâuh nâyx, tăng ah yac nyâuh tuz numđ, yâuc senz tuz hoođ pâyz tauv Zâu Tênb-Huungh nyăngz pôz wax noib, 7cayx năngđ tăng Ê-ba-pha nzaox phunz nyâuh pâyz nâyx, nănh six buz stăngz nyăngz ah lanh cumh pâuz toic, nănh yâuc nzuf stimz nzuf nyâuđ ayx Zâu Jix-Tuz nyăngz cumh pâuz, tayv buz, 8nănh yâuc bux phunz buz pâyz coong nyâuh naih lanh stăngz lanh yămz Zâu Singx-Lingh cah njaf.

9Wâyc nây, tăng buz tuz numđ nâyx đomc wac wax noib, buz cloo Zâu phunz nyâuh max setc tiny, yâuc joođ phunz nyâuh hayh pâyz tuz nzuf Zâu Tênb-Huungh nyăngz zux ix, yâuc naih muif huungđ tongb manyh hayh pâyz tuz Singx-Lingh nyăngz jau, 10phunz nyâuh hayh yămz tuz payh cloon Zâu, yămz manf dlayc yâuc hoopđ nzuf nănh nyăngz nyâuđ, ayx tuz muif huungđ cumh pâuz gongx, yâuc cun ayx cun pâyz Zâu Tênb-Huungh. 11Yâuc tuz naih jab njoongh staox âyz Nănh gwăngz eeng nyăngz jab, phunz nyâuh hayh naih nyâuđ numđ nyađ tanyđ tuz muif huungđ dlayc, 12oix zuc sâuf hâuđ Tênb-toongh Pha, senz phunz nyâuh tuz cloon wax đomc đăngb zeengh munh songc stipx gwăngz eeng nyăngz phănc wax Tauh. 13Nănh njâuv pănh tuz gâyh đutb nzămc nyăngz jab, yâuc ênz pănh nzac Nănh stăngz nyăngz Toonz nyăngz côkz, 14yămz nâyx tauh Toonz, pănh tuz suc lauf, yâuc tuz quanyf stoif. 15Nănh six mangc max phătc nyăngz Zâu Tênb-Huungh nyăngz hanyh jangx, yâuc steengb năngx đangc quaix zuyx taih nyăngz muif huungđ wax Tauh. 16Wâyc yămz Nănh, bix muif huungđ yămz cah zâyc guungh cloon cah đi nib, mangc phătc cloon mangc max phătc nyăngz, yâuc tuz zuyx taih nzuf. Max cun ayx huungh, max six ayx zâu, naih lanyf, max six naih jab, muif huungđ six wâyc Nănh, yâuc păngc Nănh bix tuz zuyx taih. 17Nănh naih năngx đangc quaix muif huungđ, nzof muif huungđ yâuc păngc Nănh bix naih yetx nyâyc. 18Nănh six ayx stinb nyăngz pyây, six jiux pangx nyăngz pyây. Nănh six ayx tah yetx, steengb năngx đangc quaix wax đomc tayc nyăngz munh tauv laiv, wâyc zuc Nănh six yămz manf dlayc ayx tah yetx wax Tauh. 19Wâyc Zâu Tênb-Huungh numđ nyađ phunz muif huungđ tuz clăkx clunh yămz Nănh cah njaf, 20yâuc păngc Nănh bix muif huungđ tuz cloon Zâu Tênb-Huungh hoopđ taih, max cun yămz nib nyăngz tax huungđ, max six yămz guungh nyăngz tax huungđ, yâuc păngc Nănh yămz wa săpc đăngc zax nyăngz samđ, bix tuz cloon Nănh hoopđ taih nzuf. 21Cah đangc nyâuh six gâyh Zâu Tênb-Huungh côz, yămz nyâuh nyâyh cloon ayx huđ nyăngz jau, six căn Nănh săngh yônz zaz, 22six nâyx zanyf, nyâuh tuz păngc Nănh nyăngz stinb a zuc tayc bix tuz cloon Zâu Tênb-Huungh hoopđ taih, yâuc phunz nyâuh tuz yămz Nănh nyăngz cah đangc, săngh đăngb zeengh nyăngz munh, max naih wâyx, yâuc max naih tinc nzêmh, 23phanv nyâuh njinh luh nongc zen stimz, yâuc nzac đuungh năngx đôz, jab stâuđ năngx tăngđ, yâuc năngx gâyf ninyh gâyh nyâuh tuz numđ nây Cuđ Jenx nyăngz njih mungc, senz tuz nzônh ninyh pong nây guungh đi nyăngz Cuđ Jenx, yâuc wâyc nây Cuđ Jenx, bix yaz Phao-lô tuz ayx cumh pâuz nyăngz munh.

24Nâyx zanyf yaz numđ nyađ, wâyc nyâuh yaz bix zuc tanyđ zâuđ nyăngz jau, yâuc nongc yaz nyăngz stinb a tanyđ năngx nzuf, Zâu Jix-Tuz wâyc Nănh nyăngz stinb, six senz jiux pangx, bix tanyđ max zeengx tauv wax đomc zâuđ nanc nyăngz jau, 25wâyc nây, yaz săngh jiux pangx nyăngz cumh pâuz munh, âyz năngđ Zâu Tênb-Huungh paiđ phunz yaz ayx nyăngz, wâyc nongc nzônh Nănh nyăngz gâyf phunz nyâuh năngx clăkx clunh nzuf. 26Senz tăng cah đangc pinyx nyăngz quaix taih stâyv stipx stâyv wax đomc, nâyx zanyf wax đomc pinyx nyăngz jau yâuc tuz hinđ setb taih, phunz Nănh nyăngz đăngb zeengh munh, 27wâyc Zâu Tênb-Huungh oix hinđ manyf phunz wax đomc pitc stingx munh pâyz tuz tauv, nây puv quâyx gwăngz eeng nyăngz jau six năngđ laix, wax huungđ six Zâu Jix-Tuz yămz nyâuh cah njaf, senz naih njih mungc nyăngz gwăngz eeng. 28Nănh six buz nzônh wax Tauh, buz nongc nzuf tongb manyh nzaox nyâuh muif lanh yâuc quinb nyâuh muif lanh, ayx phunz nyâuh muif lanh hayh tuz clăkx clunh yămz Zâu Jix-Tuz. 29Six wâyc năngđ nâyx yaz nzăngđ zuc ayx zâuđ, păngc Nănh phunz nyăngz jab bix nzeengz jax, six yămz yaz cah njaf hinđ manyf setb taih wax huungđ tômx jab.