Cô-lô-si 2

1Yaz oix nongc nyâuh pâyz yaz wâyc nyâuh bix nzeengz jax lub ayx năngđ laix, yâuc wâyc yămz wa Lau-đi-sê wax đomc zen nyăngz munh, cloon max zeengx phătc quaix yaz nyăngz minb wax đomc munh, 2phunz stiz tuz numđ oonz nyâuđ, yâuc naih hoopđ stimz tongh âyx lanh stăngz lanh, yâuc hayh nyâyh tuz muif huungđ tongb nzuf, yâuc manyh pec tuz yox tauv Zâu Tênb-Huungh wax đomc vâyv nyăngz jau, six Zâu Jix-Tuz, 3yămz Nănh cah njaf six naih nzuf muif huungđ tongb manyh nyăngz jau cloon hayh manyh pec nyăngz jau. 4Yaz coong nâyx đomc jau wâyc max phunz mănv hayh ayx nzetx blangc taih jaf nyâuh. 5Max cun yaz nyăngz stinb a max cloon nyâuh yămz, six yaz nyăngz stimz nyâuđ lauf cloon nyâuh yămz, phătc nyâuh tuz yămz gongx, yâuc naih zen stimz tăngđ yămz Zâu Jix-Tuz, yaz songđ numđ nyađ.

6Wâyc nây, tăng nyâuh ah stipx Zâu Yê-su Jix-Tuz ayx Zâu, six oix zuc yăngh yămz Nănh cah njaf, 7oix zuc nzac đuungh yâuc zâyv yămz Nănh cah njaf, yâuc oix zuc nongc zen stimz năngx tăngđ, cayx năngđ nyâuh tuz numđ nzaox nâyx, yâuc oix zuc jab sâuf hâuđ năngx yongb.

8Oix zuc năngx cayb bôngh, sangx đanyf hayh naih tix lanh munh yac nyâuh ayx âyz bamh munh cănh njăpc taih max naih luungđ stuyh nyăngz gâyf, âyz nây bamh canz nyăngz jau, bix max âyz Zâu Jix-Tuz. 9Wâyc Zâu Tênb-Huungh nyăngz muif huungđ stimz stingx, naih dloih nzuf yămz Zâu Jix-Tuz nyăngz stinb, 10nzof nyâuh yămz Zâu Jix-Tuz cah njaf six tuz naih muif huungđ dloih, wâyc Nănh six ayx pyây yămz naih jab naih lanyf wax đomc tauv laiv, 11yămz Nănh cah njaf, nyâuh yâuc tuz ayx quaix catz nyăngz gâyf, six max zâyf tăng munh nyăngz puf ayx, six tăng Zâu Jix-Tuz ayx quaix catz phunz, nongc mêtc nzuf stinb a oix nyăngz jau, 12wâyc nyâuh ayx quaix-gâyf nyăngz jau, yâuc tuz cloon Zâu Jix-Tuz songc plopx, nzof yămz Nănh cah njaf nyâuh yâuc tuz săngh taih, wâyc nyâuh zen păngc Zâu Tênb-Huungh nyăngz jab, senz ayx phunz Zâu Jix-Tuz tăng tayc săngh taih wax Tauh. 13Nyâuh max zeengx ayx quaix catz nây stinb a nyăngz săngx huđ, yâuc wâyc ayx stoif bix zuc tayc, Zâu Tênb-Huungh yâuc ayx phunz nyâuh tuz cloon Zâu Jix-Tuz songc mengc săngh, wâyc quanyf nzuf pănh nyăngz yetx stong stoif, 14Nănh stotb nzuf staox pănh nyăngz stoif nongc cooux pănh wax zây stâub tanz, senz nzeengz cloon pănh wax đomc jau, Nănh yâuc stăngc pănh zoz quanyf tingz ănz wa săpc đăngc zax. 15Nănh tutb nzuf naih lanyh naih jab cun dlayc wax đomc, Nănh nongc săpc đăngc zax nyăngz jab bopc hingh stiz, yâuc ayx phunz stiz toongx songx zuc nyayz.

16Wâyc nây, năngx gâyf phunz mănv tingc nyâuh nhlinc max six hopb nyăngz jau, max six quaix stêtz nyăngz noib, săngb lav nyăngz noib, max six tingc congz noib, 17nâyx đomc six cungb cayx taih wax đomc nyăngz bah cloiz cuungv, nzof senz săngh hanyh nyăngz six yămz Zâu Jix-Tuz. 18Năngx gâyf phunz mănv ayx phunz nyâuh zuc stâyb sâuđ nyâyc, wâyc stiz jaf ayx cayx năngđ cay nhlimc ayx jenz, yâuc ninyh paix stinz munh, păngc stiz cănh mangc phătc nyăngz jau, yâuc cănh âyz stiz nyăngz stimz nyâuđ nyâyh ayx nzetx lub nyăngz jau, 19yâuc max cloon Pyây tinyh taux, senz tăng Pyây bix lomc stinb sangc ah jaz taux ah jaz păngc sanz tinyh taux staox taih; wax nomz stinb songđ hayh lub njoongh staox tăng Zâu Tênb-Huungh.

20Năngđ coong nyâuh cloon Zâu Jix-Tuz tayc, tuz gâyh đutb nây bamh canz stâyv sangc nyăngz jau, ha săngh laix bix zef năngx phunz nây bamh canz nyăngz jau taih stayb nyâuh, cayx năngđ cay lauf năngx jinh săngh yămz nây bamh canz nâyx: 21“Năngx gâyf lumz, năngx gâyf đopx, năngx gâyf clatc!” 22Six coong tauv wax đomc jau tinyh phanv ayx âyz bix hayh zuc mêtc wax đomc, wax đomc gâyf yâuc cănh bamh munh njăpc taih nyăngz gâyf? 23Max cun six laiv huungđ cumh pâuz jau, hănđ six mangc cayx năngđ naih tongb manyh six yâuc cungb cănh njăpc taih nongc canyx bongc, yâuc naih stâuv nzongf six cungb ayx hoiđ cănh nyăngz stinb, yâuc max naih laiv huungđ zux ix hayh nzeengz tuz hingh stinb a oix nyăngz jau.