Skip to content
BibleKenya

Dao Ao Dai Literal Text

Phi-lipx-poi 4

Năngđ nây, yaz stăngz nzongf săngx nzongf nyăngz yâuf pez lex, senz yaz nyăngz numđ nyađ cloon yaz nyăngz tany, stăngz nzongf nyăngz yâuf pez lex, oix zuc njinh luh stâuđ năngx tăngđ năngđ nâyx yămz Zâu.

Yaz joođ quinb Yu-ô-đi cloon Sin-ti-cê oix zuc hoopđ stimz toongh âyx yămz Zâu. Yaz yâuc joođ mâyh, neetb stimz nyăngz cumh pâuz toic lex, mâyh oix zuc stăngc wax đomc munh nzif, stiz six cloon yaz wâyc Cuđ Jenx bix nzeengz zax, cloon Cên-mên cloon wax đomc cloon yaz songc ayx cumh pâuz nyăngz toic tauv laiv, nzof stiz nyăngz bux yâuc tuz ja yămz wa săngh mengc tanz.

Oix zuc muif dlih numđ nyađ yămz Zâu. Yaz zef coong timb, oix zuc nzac jab numđ nyađ! Oix zuc phunz munh tinyh đoih phătc nyâuh nyăngz stimz nyâuđ dlênc, Zâu yămz stătx nzof. Năngx gâyf numđ stauh luungđ tiny, yămz manf dlayc, six oix zuc cloo Zâu joođ yâuc sâuf hâuđ, oix zuc stungx nyâuh cloo Zâu nyăngz wac phunz Zâu Tênb-Huungh, Zâu Tênb-Huungh nyăngz peengh oonz, six blătc nzuf muif huungđ pâyz manyh pec nyăngz jau, yâuc cănh leđ nyâuh nyăngz stimz nyâuđ cloon nyâuh nyâyh nyăngz jau yămz Zâu Yê-su Jix-Tuz.

Six yâuf pez lex, blătc quaix đangz, tinyh phanv laiv huungđ senz nyăngz, laiv huungđ săngh zanyb saix, laiv huungđ peengh stimz, laiv huungđ đăngb zeengh, laiv huungđ săngh stăngz, laiv huungđ naih manyh gongx, laiv huungđ six gongx laiv huungđ săngh zanyb, nyâuh six oix zuc nyâyh tauv. Laiv huungđ nyâuh tuz hoođ pâyz, tuz săngx, tuz numđ yâuc tuz phătc yămz yaz, six oix zuc ayx âyz wax đomc jau, nzof peengh oonz nyăngz zâu Tênb-Huungh six cănh cloon nyâuh yămz.

Yaz yâuc senz numđ nyađ nzongf yămz Zâu, wâyc yămz nây quaix đangz nyâuh zef nyâyh numđ stauh phunz yaz, six yaz pâyz coong, nyâuh numđ stauh phunz yaz lauh nzof gôh, six wâyc max naih săngx huđ congv nongc phunz yaz tuz pâyz lêc. Nây yaz six max zâyf coong tauv yaz sămv nongc nyăngz jau, wâyc yaz tuz hoođ pâyz max cun yaz hănđ pongh năngđ laix, yâuc oix zuc pong nyâuđ yămz. Yaz tuz pongh zâuđ zomc yâuc tuz pongh naih nongc max tongf. Max cun pongh laiv huungđ max six yămz laiv tix, yaz yâuc tuz naih săngx huđ six tuz nhlinc pêu, naih săngx huđ six zuc tanyđ nyâuđ sab, naih săngx huđ six tuz naih muif huungđ dloih yâuc naih săngx huđ six yêmv max naih luungđ. Yaz hayh ayx tuz muif huungđ six păngc sađ jab phunz yaz wax Tauh. Six yămz yaz pongh zâuđ nanc nyăngz huđ nyâuh yâuc stăngc yaz, nây six ayx gongx. Phi-lipx-poi dlanyh nyăngz yâuf pez lex, nyâuh lauf pâyz coong tăng ah yac yaz quef coonz nzônh Cuđ Jenx, yămz yaz setb wa Ma-si-đô-ni stâyz phangz wax zanyf, max naih laiv nomz jiux pangx stăngc phunz yaz nongc nzac nongc setb nyăngz nyanh, cungb tuz nyâuh cuungv, wâyc tăng yămz wa Tê-sa-lô-ni-ca, nyâuh bâyf pungx ah hâyđ iz hâyđ sămv nongc nyăngz tax huungđ phunz yaz nzof. Nây six max zâyf coong yaz oix nongc jax dlaih, six yaz oix nongc nyâuh tuz gâyc pâu đuungx staox yămz nyâuh nyăngz phănc. Yaz jinh đangh naih muif huungđ dloih nongc max tongf. Yaz tuz naih caux nzuf, wâyc yaz tuz stipx tăng Ê-ba-phô-đi-tat nyâuh pungx taih nyăngz jax dlaih, six săngh đangz nyăngz siv, yâuc săngh stanyb lanyh tuz numđ nyađ stipx, yâuc hoopđ Zâu Tênb-Huungh nyăngz nyâuđ. Yaz nyăngz Zâu Tênb-Huungh six cănh sađ phunz nyâuh naih dloih nzuf sămv nongc nyăngz tax huungđ, âyz năngđ Nănh naih nyăngz puv quâyx nâyx, yămz gwăngz eeng yâuc yămz Zâu Yê-su Jix-Tuz. Cloo Zâu Tênb-Huungh, six pănh nyăngz Pha, tuz naih gwăngz eeng tauv banc stâyv banc đaic. A-meen.

Joođ pungx wac đeh tauv nyâuh muif lanh đăngb zeengh munh yămz Zâu Yê-su Jix-Tuz. Cloon yaz yămz nây nyăngz yâuf pez lauf pungx wac đeh tauv nyâuh. Muif lanh đăngb zeengh munh pungx wac đeh tauv nyâuh, tah yetx six yămz Sê-sa nyăngz pyau wax đomc munh.

Cloo Zâu, six Zâu Yê-su Jix-Tuz nyăngz pôz cloon nyâuh nyăngz stimz nyâuđ yămz. A-meen.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.