2 Cô-lin-tô 9

1Coong tauv stăngc phunz wax đomc đăngb zeengh munh nyăngz cumh pâuz jau, yaz max zâuđ năngx zuc ja phunz nyâuh nzof gôh. 2Wâyc yaz pâyz tuz nyâuh pong nyâuđ nyăngz jau, yaz songđ tanv nyâuh ănz wa Ma-si-đô-ni wax đomc zen nyăngz munh coong, yămz wa A-ca-ya nyăngz jiux pangx tăng pax nyăngv bênc săngh ayx nzof gôh, nyâuh joomz nyâuđ nyăngz jau yâuc tongf tauv đuungx lanh munh nyăngz nyâuđ. 3Six yaz paiđ wax đomc yâuf pez ninyh, phunz buz tanv nyâuh wax đomc six max zâyf cungb tanv cuungv yămz nâyx đomc jau, six nongc phunz nyâuh hayh bênc săngh cayx năngđ yaz coong nâyx. 4Wâyc, năngđ coong naih tix lanh yămz wa Ma-si-đô-ni zen nyăngz munh cloon yaz ninyh bix phătc nyâuh max bênc săngh têx, buz songđ zuc nyayz — nây six max zeengx coong tauv nyâuh — wâyc buz zen năngđ nâyx. 5Wâyc nây yaz songđ numđ sămv zuc êu wax đomc yâuf pez ninyh, phunz stiz ninyh pongh nyâuh quaix đangc nongc bênc săngh nyâuh nyunc phunz nyăngz tax huungđ, phunz naih bênc săngh cayx năngđ numđ nyađ ayx, bix max zâyf zuc yac ayx.

6Oix zuc pâyz coong: Laiv lanh songx stoc six sâub tuz stoc, nzof laiv lanh songx đuungx six sâub tuz đuungx. 7Muif lanh munh oix zuc âyz cănh nyăngz nyâuđ tingc taih bix pungx hoođ, năngx gâyf yônx yâuc năngx gâyf cungb zeengv ayx, wâyc Zâu Tênb-Huungh six stăngz numđ nyađ pungx hoođ nyăngz munh. 8Zâu Tênb-Huungh hayh sađ muif huungđ pôz phunz nyâuh naih pong lănf nzuf, phunz nyâuh yămz manf dlayc naih caux nzuf sămv nongc nyăngz tax huungđ, yâuc năngx naih yăngc nongc ayx muif huungđ gongx nyăngz cumh pâuz. 9Cayx năngđ naih ja coong:

“Laiv lanh tanb jax toongx, phunz munh zâuđ munh,

nănh peengh stimz nyăngz jau six stâyv quâyx yămz.”

10Nzof sađ nhlimb phunz songx nyăngz munh, yâuc sađ nzu phunz naih caux nhlinc max tongf wax Tauh, six cănh ayx phunz nyâuh nyăngz nhlimb tuz gâyc đuungx staox, phunz nyâuh hayh ayx tuz đuungx huungđ peengh stimz nyăngz cumh pâuz jau, 11nyâuh songđ tuz puv quâyx naih muif huungđ dloih nzuf nongc ayx nyâuđ quăng stăngc munh, phunz tăng pănh bix naih munh sâuf hâuđ Zâu Tênb-Huungh, 12wâyc nâyx huungđ cumh pâuz gongx six max zâyf cungb stăngc tuz phunz wax đomc đăngb zeengh munh sămv nongc nyăngz jau cuungv, yâuc năngx ayx phunz đuungx lanh munh sâuf hâuđ Zâu Tênb-Huungh, 13Tăng nâyx đomc stăngc munh nyăngz cumh pâuz stiz bix tanv Zâu Tênb-Huungh, wâyc phătc nyâuh buc yâuc nhlimc Zâu Jix-Tuz nyăngz Cuđ Jenx, yâuc wâyc nyâuh ayx nyâuđ quăng stăngc phunz stiz yâuc stăngc phunz tinyh đoih, 14stiz songđ cloo Zâu phunz nyâuh, yâuc numđ stăngz nyâuh wâyc tuz Zâu Tênb-Huungh sađ pôz phunz nyâuh đuungx nzongf. 15Sâuf hâuđ Zâu Tênb-Huungh wâyc Nănh sađ nyăngz pôz six max hayh coong tuz tongf!