2 Cô-lin-tô 8

1Yâuf pez lex, buz phunz nyâuh pâyz tuz tauv Zâu Tênb-Huungh nyăngz pôz tuz sađ phunz yămz wa Ma-si-đô-ni wax đomc jiux pangx, 2yămz stiz pongh zuc stâyv nyâuđ neetb nzongf nyăngz săngx huđ zuc munh ayx huđ ănz, stiz yâuc numđ nyađ nzongf, max cun stiz hănđ zâuđ stiz yâuc pong nyâuđ setb stimz stăngc munh. 3Wâyc yaz ayx zanyx coong stiz cănh pong nyâuđ, goopx âyz stiz nyăngz jab, lôx zef năngx blătc stiz nyăngz jab timb, 4yâuc năngx nzac jab joođ buz êu phunz stiz tuz songc cloon stăngc, yămz nâyx đomc stăngc phunz wax đomc đăngb zeengh munh nyăngz cumh pâuz. 5Nzof stiz yâuc ayx năngx blătc buz mungc nyăngz, six tah yetx stiz yâuc cănh stungx stiz phunz Zâu, nzăngđ zef phunz buz, âyz Zâu Tênb-Huungh nyăngz zux ix. 6Năngđ nây, buz songđ êu Ti-tatc ninyh, nongc phunz nănh ayx nâyx huungđ gongx nyăngz cumh pâuz phunz nyâuh, cayx năngđ nănh quef coonz ayx nâyx. 7Six, cayx năngđ yămz muif huungđ nyâuh yâuc năngx njoongh têx, nây six coong tauv, zen stimz, coong nyăngz wac, pâyz nyăngz jau, joomz nyâuđ, cloon buz nyăngz stăngz yămz nyâuh cah njaf, nyâuh lauf sămv zuc ayx cloon nâyx huungđ gongx nyăngz cumh pâuz năngx njoongh timb. 8Yaz max zâyf setb lanyf coong ănz nyâuh, nây six wâyc wax đomc munh naih joomz nyâuđ nyăngz gao, yâuc oix stâyv mangc jađ nyâuh nyăngz senz stăngz six năngđ laix. 9Wâyc nyâuh pâyz tauv pănh nyăngz Zâu Yê-su Jix-Tuz nyăngz pôz, Nănh six puv quâyx, yâuc wâyc nyâuh bix săngh munh zâuđ munh, phunz păngc Nănh zâuđ nyăngz jau, nyâuh bix tuz puv quâyx.

10Nzof yaz yâuc oix coong cay tauv nâyx đomc jau, wâyc phunz nyâuh tuz gongx, tăng pax nyăngv, nyâuh bix max zâyf cungb quef coonz ayx nâyx đomc cumh pâuz, yâuc năngx oix ayx staox ninyh timb. 11Wâyc nây nâyx zanyf, oix zuc ayx nyâuh nyăngz cumh pâuz năngx clăkx clunh nzuf, nyâuh pong nyâuđ oix ayx buc laiv, bix âyz nyâuh naih nyăngz ayx buc wa. 12Wâyc năngđ coong pong nyâuđ ayx têx, pungx nyăngz tax huungđ six tuz numđ nyađ stipx, tinyh phanv âyz pănh naih nyăngz, max zâyf âyz pănh max naih nyăngz.

13Yaz max zâyf coong êu nyâuh stăngc phunz munh tuz gongx, nongc ayx phunz nyâuh zâuđ max naih luungđ, yaz six oix nongc ayx năngx peengh. 14Nâyx zanyf, nyâuh naih max tongf six oix zuc stăngc phunz wax đomc sămv nyăngz munh, phunz tauv stiz naih max tongf stiz nzăngđ hayh stăngc phunz nyâuh sămv nyăngz jau, ayx năngđ nâyx six peengh, 15cayx năngđ naih ja coong:

“Naih đuungx nyăngz munh lauf max yăngc,

naih stoc nyăngz munh lauf max sămv.”

16Sâuf hâuđ Zâu Tênb-Huungh, senz ayx phunz Ti-tatc nyăngz nyâuđ cloon nyâuh songc ah huungđ joomz nyâuđ nyăngz jau wax Tauh. 17Manyf six nănh mungv buz êu nyăngz wac, six wâyc nănh naih joomz nyâuđ, nănh songđ cănh ninyh tayđ nyâuh. 18Nzof buz yâuc paiđ ah lanh yâuf pez cloon Ti-tatc ninyh, nâyx lanh munh tuz muif nomz jiux pangx tanv yămz Cuđ Jenx; 19yâuc max zâyf cungb nâyx, six lauf wâyc tuz tăng wax đomc jiux pangx sên taih nongc cloon buz songc ayx nâyx huungđ gongx nyăngz cumh pâuz, nzof buz ayx nâyx huungđ cumh pâuz six nongc phunz Zâu tuz gwăngz eeng, yâuc hinđ manyf coong buz six pong nyâuđ ayx; 20buz păngc nây, bix max zuc munh coong buz, yămz buz nzauf nâyx đomc goopx taih nyăngz nyanh. 21Wâyc buz lov jau ayx gongx nyăngz dlayc, max zâyf cungb yămz Zâu nyăngz cah đangc cuungv, yâuc năngx yămz cloon munh nyăngz cah đangc.

22Nzof, buz yâuc paiđ buz nyăngz ah lanh yâuf pez cloon stiz songc ninyh, nâyx tauh munh buz yâuc tuz stâyv quaix đuungx hâyđ, wâyc phătc nănh naih joomz nyâuđ, nzof nâyx zanyf zef năngx joomz nyâuđ têx timb, wâyc nănh naih nyâuđ zen mungc yămz nyâuh lub nzongf. 23Năngx naih Ti-tatc, nănh six yaz nyăngz lah pyeoz toic yâuc cloon yaz songc ayx cumh pâuz nyăngz munh yămz nyâuh cah njaf. Nzof wa iz lanh yâuf pez, stiz six wax đomc jiux pangx paiđ ninyh nyăngz munh, yâuc săngh Zâu Jix-Tuz nyăngz gwăngz eeng. 24Wâyc nây, oix zuc hinđ manyf nyâuh nyăngz stăngz phunz stiz, cloon buz yămz wax đomc jiux pangx nyăngz cah đangc bix tanv nyâuh nyăngz jau.