2 Cô-lin-tô 7

1Wâyc nây, stăngz nyăngz yâuf pez lex, wâyc tuz stipx nâyx đomc nyunc nyăngz wac, pănh oix zuc cănh pyenv goib naih wâyx yămz nây stinb a cloon mengc hoonh nyăngz jau tauv laiv, oix zuc cumh nzav Zâu Tênb-Huungh bix ayx phunz pănh tuz đăngb zeengh năngx clăkx clunh nzuf.

2Oix zuc coib nyâuđ phunz buz! Buz max hoiđ mănv; buz yâuc max jaf mănv; yâuc max cayx mănv nyăngz luungđ. 3Yaz max zâyf coong nâyx nongc tingc nyâuh; wâyc yaz tuz naih coong quaix coong nyâuh yămz buz nyăngz nyâuđ cah njaf, nongc tinyh cloon săngh yâuc tinyh cloon tayc. 4Yaz senz zen mungc yămz nyâuh đuungx nzongf; senz numđ nyađ nyâuh nzongf. Yâuc numđ tuz oonz yaz nyăngz nyâuđ đuungx nzongf. Yămz buz pongh nyăngz muif huungđ zâuđ nanc yaz yâuc tuz numđ nyađ.

5Wâyc njinh buz ninyh wa Ma-si-đô-ni nyăngz săngx huđ, buz nyăngz stinb a lauf max tuz yămz gwanb ax tiny, zuc pongh muif huungđ huđ nyăngz jau — cungh ngwaic six zuc nzeengz zax, nyâuđ njaf yâuc numđ cumh nzav. 6Six, Zâu Tênb-Huungh, senz oonz tuih nyâuđ munh nyăngz nyâuđ wax Tauh, yâuc paiđ Ti-tatc taih nây oonz buz nyăngz nyâuđ, 7max zâyf cungb wâyc nănh taih nây cuungv, yâuc năngx wâyc nănh tuz nyâuh oonz nănh nyăngz nyâuđ, bix lănv phunz buz coong tauv nyâuh oix pongh yaz, nyâuh yâuc haoh, yâuc joomz nyâuđ yaz, songđ ayx phunz yaz zef năngx numđ nyađ têx.

8Năngđ coong wâyc yaz nyăngz jenx bix ayx phunz nyâuh numđ stauh, yaz lauf max numđ stâyb đêh. Max cun cah đangc yaz numđ stâyb (six yaz nyâyh taih wax zây jenx hănđ ayx phunz nyâuh numđ stauh, lauf cungb ah dlapc cuungv lêc), 9nâyx zanyf, yaz yâuc numđ nyađ, max zâyf wâyc nyâuh stauh bix numđ nyađ, six numđ nyađ wâyc yămz nây stauh nyăngz jau bix ayx phunz nyâuh tuz coi nyâuđ. Wâyc nyâuh six âyz Zâu Tênb-Huungh nyăngz zux ix bix stauh, phunz nyâuh max zâuđ stâyb laiv huungđ wâyc buz ax tiny. 10Wâyc âyz Zâu Tênb-Huungh nyăngz zux ix bix stauh six ayx phunz tuz coi nyâuđ yâuc tuz njâuv yâuc max numđ stâyb laiv huungđ. Nzof âyz bamh canz nyăngz zux ix bix stauh six zuc tayc. 11Năngđ nây, yămz nâyx đomc jau, tuz stauh âyz Zâu Tênb-Huungh nyăngz zux ix, six ayx phunz nyâuh hayh tuz joomz nyâuđ năngx nzongf têx: năngx naih wax đomc coong pyenv ayx laix, numđ nhlenx ayx laix, numđ cumh nzav ayx laix, numđ oix nongc ayx laix, nyâuđ njaf suc ayx laix, zuc mađ ayx laix! Yămz manf dlayc, nyâuh yâuc ayx phunz stunx coong nyâuh six đăngb zeengh yămz nâyx đomc jau. 12Wâyc nây, yaz ja phunz nyâuh six max zâyf wâyc ayx max săngh wax tauh bix ja, yâuc max zâyf wâyc zuc ayx hoiđ wax tauh bix ja, six wâyc nyâuh tuz joomz nyâuđ tauv buz coong manyf phunz nyâuh wax đomc jau, yămz Zâu Tênb-Huungh nyăngz cah đangc. 13Păngc nây, buz bix tuz oonz nyâuđ.

Nzof, buz cănh tuz oonz nyâuđ nyăngz jau, six buz tuz numđ nyađ năngx nzongf têx, yămz Ti-tatc nyăngz numđ nyađ, wâyc nyâuh tinyh đoih ayx phunz nănh nyăngz stimz nyâuđ tuz oonz looc. 14Wâyc năngđ coong yaz tanv nyâuh laiv huungđ ănz Ti-tatc, yaz lauf max numđ nyayz, lauf cayx năngđ buz senz coong muif huungđ ănz nyâuh nâyx, nzof buz tanv nyăngz wac six lauf senz tanv năngđ nâyx ănz Ti-tatc. 15Nzof Ti-tatc yâuc stăngz nyâuh tinyh đoih năngx nzongf têx timb, laiv zanyf nănh săngx tauv nyâuh mungv wac nyăngz jau, nzof nyâuh yâuc cumh nzav stinb sinx taih stipx nănh ayx năngđ laix. 16Yaz numđ nyađ wâyc yaz hayh tuz zen nyâuh yămz manf dlayc.