2 Cô-lin-tô 6

1Năngđ nây, wâyc buz cloon Zâu Tênb-Huungh ayx cumh pâuz, buz joođ nyâuh năngx gâyf cungb stipx Nănh nyăngz pôz taih ayx max setb laiv huungđ — 2wâyc Nănh coong:

“Yămz năngx naih congv nyăngz săngx huđ, Yaz six mungv yâuc tauz mâyh,

yămz tuz njâuv nyăngz noib, Yaz six stăngc njâuv mâyh.”

Mangc bex, nâyx yenh stâyv six năngx naih săngx huđ congv. Mangc bex, nâyx yenh stâyv six tuz njâuv nyăngz noib. —

3buz max ayx phunz munh longđ laiv huungđ stoif, phunz buz ayx nyăngz cumh pâuz max zuc munh pib mađ, 4buz ayx nyăngz muif huungđ, six phunz munh hayh saz tuz coong buz six Zâu Tênb-Huungh nyăngz pâuz: yămz buz zuc tanyđ nyăngz zâuđ nanc senz lub nzongf, zâuđ max naih luungđ, yâuc zuc dlauc wâyb, 5zuc bopc, zuc yămz nzauh, zuc munh loou, zuc ayx cumh pâuz zâuđ, zuc tanyđ mâyc njoomh, yâuc tanyđ nyâuđ sab, 6yămz đăngb zeengh nyăngz jau, yămz manyh pec nyăngz jau, nongc nyâuđ tanyđ, yâuc dlênc stimz dlênc âyx, yămz Zâu Singx-Lingh, yămz stăngz nyăngz jau yâuc ayx nyâuđ zanyx, 7yămz senz gâyf, yămz Zâu Tênb-Huungh nyăngz tômx jab; nzauf wax đomc peengh stimz nyăngz tungh zăngc ănz byaoh puf cloon staix puf, 8pongh gongx max six pongh huđ, zuc hib max six tuz zanyb; cayx năngđ puv maoh nyăngz munh, yâuc senz săngh zen; 9mangc cayx năngđ max naih munh pâyz tauv, yâuc tuz đuungx lanh munh pâyz; mangc cayx năngđ cayx tayc, six — phanv mangc! — lauf năngx jinh săngh; mangc cayx năngđ cay zuc phađ, yâuc max zuc tayx tayc; 10mangc cayx năngđ stauh zâuđ, six muif dlih numđ nyađ; mangc cayx năngđ zâuđ, six ayx phunz munh đuungx tuz puv quâyx; mangc cayx năngđ max naih luungđ, yâuc naih muif huungđ dloih.

11Cô-lin-tô nyăngz yâuf pez lex, buz goib nzetx ănz nyâuh; yâuc coib buz nyăngz nyâuđ. 12Max zâyf coong tăng buz max pungx phunz nyâuh, nây six wâyc tăng nyâuh nyăngz nyâuđ cănh max lêc; 13oix zuc clao phunz buz năngđ nâyx — yaz coong ănz nyâuh cayx năngđ coong ănz cănh nyăngz sây nâyx — nyâuh lauf oix zuc coib nyâuh nyăngz nyâuđ.

14Năngx gâyf cloon max zen nyăngz munh songc bănx tanz, wâyc gongx cloon huđ hayh tinyh songc tuz max? Nzof gwăngz cloon nzămc hayh tinyh songc tuz max? 15Zâu Jix-Tuz cloon Bê-li-an hayh tinyh hoopđ tuz max? Nzof zen nyăngz munh cloon max zen nyăngz munh hayh songc laiv huungđ phănc max? 16Zâu Tênb-Huungh nyăngz đăngb tinc cloon miuc hanyh laiv hayh tinyh songc heh? Wâyc pănh six Zâu Tênb-Huungh nyăngz đăngb tinc, senz stâyv quâyx săngh wax Tauh, cayx năngđ Zâu Tênb-Huungh coong nâyx:

“Yaz six cloon stiz yămz yâuc setb ninyh setb lauf yămz stiz cah njaf;

Yaz six ayx stiz nyăngz Zâu Tênb-Huungh,

nzof stiz six ayx Yaz nyăngz pec stingx.”

17Wâyc nây,

“Oix zuc tăng nănh stiz setb ninyh

yâuc lanyc năngx gâyh stiz,” Zâu coong,

“yâuc năngx gâyf tongf tauv naih wâyx nyăngz tax huungđ,

Yaz songđ stipx nyâuh.”

18Nzof

“‘Yaz six ayx nyâuh nyăngz Pha,

nyâuh six ayx Yaz nyăngz toonz, sab,’

Njoongh Quaix nyăngz Zâu coong ayx nâyx.”