Skip to content
BibleKenya

Dao Ao Dai Literal Text

2 Cô-lin-tô 5

Wâyc pănh pâyz tuz coong năngđ coong pănh nây nib minc nâyx sênz pyau tamf zuc lakb ninyh, pănh six năngx naih stâyv quâyx nyăngz pyau yămz wa guungh, tăng Zâu Tênb-Huungh zâyv taih, max zâyf bamh munh nyăngz puf ayx taih. Wâyc pănh six cungb yônx mengc yămz nâyx sênz pyau tamf, yâuc jinh đangh sâub sâuđ zu ayx tuz tauv pănh muf yămz wa cah zâyc guungh nyăngz pyau, phanv pănh numđ pănh jinh đangh zuz guyz quav, max zâyf numđ căng căng. Wâyc zuc pănh nâyx zanyf yămz nâyx sênz pyau tamf, pănh six cungb yônx mengc yămz wâyc zuc tanyđ zâuđ nzongf, wâyc nây pănh six max zâyf joođ êu zay queengx, pănh six joođ nongc tuz zuz ănz, phunz laiv huungđ hayh tayc nyăngz tauv laiv six tuz coi pênx săngh nyăngz nzuf. Zâu Tênb-Huungh six bênc pănh taih nongc phunz nâyx đomc cumh pâuz wax Tauh, Nănh yâuc sađ Singx-Lingh nongc ayx tingc stinh phunz pănh. Wâyc nây, oix zuc muif dlih pungx stimz, wâyc pâyz tuz coong tinyh phanv pănh năngx jinh săngh yămz nâyx nomz stinb a nyăngz săngx huđ, pănh six năngx jinh gâyh Zâu côz — wâyc pănh six păngc zen stimz bix japc ninyh, max zâyf păngc mâyc mangc phătc. Buz six muif dlih pungx stimz yâuc numđ nyađ, nođ gâyh nâyx nomz stinb a bix muf cloon Zâu yămz six năngx gongx têx. Wâyc nây, buz nongc nzuf nyâuđ nzac jab ayx phunz Zâu numđ nyađ, hănđ six yămz wa pyau max six ninyh gâyh pyau. Wâyc zuc pănh muif lanh six zuc yămz Zâu Jix-Tuz nyăngz stămđ stoif tinc cah đangc, phunz muif lanh munh hayh stipx cănh nyăngz phănc, âyz nănh yămz yangh stâyv ayx gongx max six ayx huđ nyăngz jau.

Năngđ nây, wâyc pâyz tuz coong Zâu six hoopđ zuc cumh nzav, buz songđ quinb ayx phunz munh zen. Nzof Zâu Tênb-Huungh yâuc cănh pâyz buz yox nzuf, yaz yâuc mungc coong nyâuh lauf pâyz tuz buz yox yămz nyâuh nyăngz stimz nyâuđ. Buz max zâyf cănh tanv buz ănz nyâuh, six wâyc oix phunz nyâuh tuz numđ nyađ wâyc buz, phunz nyâuh hayh naih wac tauz cloon cungb âyz pâyh sangc bix ayx nzetx lub wax đomc munh, max zâyf tăng nyâuđ njaf. Wâyc zuc, năngđ coong buz ayx minb đupx, six wâyc Zâu Tênb-Huungh; nzof năngđ coong buz ayx neetb, six wâyc nyâuh. Wâyc Zâu Jix-Tuz nyăngz stăngz ayx phunz yaz buc, yaz nyâyh taih: ah lanh munh wâyc tinyh đoih bix tayc; năngđ nây, muif lanh munh six tayc. Nănh tayc tayv phunz muif lanh munh, phunz năngx jinh săngh nyăngz munh tauv laiv, six max zâyf cănh wâyc stiz bix săngh nzof, six săngh phunz tayc tayv stiz yâuc tuz ayx săngh taih wax Tauh. Wâyc nây, tăng nây staox ninyh, buz max âyz bamh munh nyăngz zux ix bix mangc laiv lanh munh nzof. Max cun cah đangc buz lauf âyz bamh munh nyăngz zux ix bix mangc Zâu Jix-Tuz, six nâyx zanyf bux max âyz wax huungđ zux ix mangc Nănh nzof. Wâyc nây, tinyh phanv laiv lanh yămz Zâu Jix-Tuz cah njaf wax tauh six săngh ah lanh zuyx săngb taih nyăngz munh. Lôx nyăngz muif huungđ quaix nzuf; yetx stong tuz pênx săngb nyăngz taih. Nâyx đomc muif huungđ six tăng Zâu Tênb-Huungh taih, Nănh ayx phunz pănh păngc Zâu Jix-Tuz bix tuz cloon Nănh hoopđ nyâuđ taih, yâuc jaoz phunz buz ayx nây hoopđ nyâuđ taih nyăngz cumh pâuz, cayx năngđ Zâu Tênb-Huungh yămz Zâu Jix-Tuz cah njaf, bix ayx phunz bamh canz tuz cloon Nănh hoopđ nyâuđ taih nâyx, yâuc max stunx tauv bamh munh nyăngz stoif, songđ jaoz wax cuyb hoopđ nyâuđ nyăngz cumh pâuz phunz buz.

Năngđ nây, bux six ayx Zâu Jix-Tuz nyăngz tâuc jenx munh, cayx năngđ cay Zâu Tênb-Huungh nongc buz bix êu nâyx: Buz tayv Zâu Jix-Tuz joođ nyâuh: “Oix zuc cloon Zâu Tênb-Huungh hoopđ nyâuđ taih!” Zâu Tênb-Huungh phunz max ayx quaix stoif wax Tauh, ayx cayx năngđ cay naih stoif nâyx tayv phunz pănh, phunz pănh hayh tuz păngc Nănh bix săngh Zâu Tênb-Huungh nyăngz peengh stimz munh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.