2 Cô-lin-tô 4

1Năngđ nây, buz tuz Zâu hâuđ lênh sađ phunz, bix tuz stipx nâyx huungđ cumh pâuz, buz yâuc max tuih nyâuđ. 2Six, buz quanyf nzuf muif huungđ pinyx ayx nyayz nyăngz jau tauv laiv, buz yâuc max ayx puv maoh nyăngz jau, max coi wănc Zâu Tênb-Huungh nyăngz wac, six buz coong senz gâyf, yămz Zâu Tênb-Huungh nyăngz cah đangc, ayx phunz muif lanh munh nyăngz stimz nyâuđ stunx buz six senz nyăngz. 3Năngđ coong buz nzônh nyăngz Cuđ Jenx zuc tăng, six cungb zuc tăng yămz wax đomc zuc mêtc nyăngz munh cuungv, 4yămz wax đomc max zen nyăngz munh, zuc nây stâyv sangc nyăngz manđ ayx phunz stiz nyăngz stimz nyâuđ mâyc buđ ninyh, ayx tuz stiz mangc max phătc Zâu Jix-Tuz nyăngz Cuđ Jenx nyăngz gwăngz eeng, senz nzâyz Zâu Tênb-Huungh nyăngz hanyh jangx wax Tauh. 5Wâyc buz max cănh nzônh buz, six nzônh, Zâu Yê-su Jix-Tuz six Zâu, yâuc wâyc Zâu Yê-su buz bix ayx nyâuh nyăngz pâuz. 6Wâyc Zâu Tênb-Huungh, coong: “Gwăngz six tăng nzămc nyăngz tinc siux setb taih,” Nănh six siux gwăngz yămz buz nyăngz nyâuđ njaf ayx phunz hayh pâyz tuz tauv Zâu Tênb-Huungh nyăngz gwăngz eeng, siux yămz Zâu Yê-su Jix-Tuz nyăngz minb setb taih wax Tauh.

7Six buz zaub nâyx đomc saix nyăngz jax dlaih ănz wax đomc nib eengz, phunz wax đomc gwăngz eeng nyăngz tômx jab tuz ayx setb taih six tăng Zâu Tênb-Huungh, max zâyf tăng buz; 8buz zuc nyokb đuungx hâyđ, six max zuc peetc; zuc nyâuđ wangb, six naih njih mungc; 9zuc munh ayx huđ, six max zuc quanyf; zuc munh bopc, six max tayc; 10buz zuc nzâyz Zâu Yê-su tayc nyăngz jau yămz buz nyăngz stinb max setc tiny, phunz Zâu Yê-su nyăngz săngh mengc lauf tuz hinđ yămz buz nyăngz stinb; 11buz hănđ năngx jinh săngh, yâuc wâyc Zâu Yê-su bix zuc jaoz phunz tayc nyăngz jau max setc tinyh, phunz Zâu Yê-su nyăngz săngh mengc lauf tuz hinđ setb taih yămz buz nâyx nomz hayh tayc nyăngz stinb. 12Năngđ nây, tayc nyăngz jab six ayx cumh pâuz yămz buz, nzof săngh mengc six yămz nyâuh. 13Six buz naih nyâuđ zen, cayx năngđ tuz ja taih nyăngz wac nâyx, coong: “Yaz zen, yaz nzăngđ coong,” wâyc nây buz six lauf zen, buz nzăngđ coong, 14wâyc pâyz tuz coong ayx phunz Zâu Yê-su săngh taih wax Tauh six lauf ayx phunz buz tuz săngh taih cloon Zâu Yê-su, yâuc ayx phunz buz cloon nyâuh tinyh đoih tuz ninyh yămz Nănh nyăngz cah đangc. 15Wâyc zuc, wax đomc muif huungđ setb taih six wâyc nyâuh, nongc phunz Zâu nyăngz pôz tuz phutx ninyh pong muif đoif nzuf, phunz naih đuungx lanh munh sâuf hâuđ Zâu Tênb-Huungh phunz Nănh tuz gwăngz eeng.

16Wâyc nây, buz songđ max tuih nyâuđ. Max cun, buz nây cungh ngwaic nyăngz stinb a zuc đoonh ninyh, six buz nyăngz stimz nyâuđ yâuc muif noib tuz coi wănc pênx săngb nyăngz staox taih. 17Wâyc nâyx zanyf buz pongh tix cay max lauh nyăngz zâuđ nanc, six ayx phunz buz tuz stâyv quâyx nyăngz gwăngz eeng, max hayh jac, yâuc max naih luungđ năngđ, 18wâyc buz six max zâyf lov mangc tuz phătc nyăngz, six lov mangc max phătc nyăngz. Wâyc mangc tuz phătc nyăngz six hayh jac, mangc max phătc nyăngz six stâyv quâyx yămz.